28.7 C
Hong Kong

類別

小城故事

【時裝革命】華服長衫加入牛仔布大玩Fusion 「中裝唔一定老土!」 – 專訪「新裝如初」設計師林春菊(Janko Lam)

https://youtu.be/Peb-UKjeV6g 電影《花樣年華 》中,張曼玉一身舊上海風情傳統旗袍,盡顯女性體態美,至今仍教人津津樂道。然而不論旗袍,還是經過演變嘅長衫,呢啲曾經流行嘅大眾服飾,如今只能喺婚宴、典禮等隆重場合先有機會著上身,展現風采魅力。面對外國成衣時裝興起,本地時裝設計師林春菊(Janko) 帶着一股熱誠,並創立自家中式服裝品牌「新裝如初」,揉合現代服飾特點和傳統工藝,讓中裝重歸日常生活。 「連現代中國人都唔太重視中裝」 現今工業與科技發達,製衣成本下降,造就「速食時裝」(Fast Fashion)興起,款式要不斷推陳出新,「生命週期」只有一季甚至更短,務求緊貼當季潮流。Janko讀現代時裝出身,深明行業發展,她慨嘆人們漸漸忘記衣服蘊含嘅內涵。「唔理係高級、中級、低級或者街邊檔品牌都好,你唔會對好多舖留有深刻印象,或者有值得去講嘅價值。」 眼見不少亞洲國家例如日本、韓國或越南等,國民十分重視自家民族服裝,相比之下香港以至中國也顯得遜色,Janko認為與文化認同有關。「漢服對中國人嚟講,本身都唔算好重視。大家日常便服都係西服為主,好難喺街上見到長衫蹤影。」Janko希望通過新派設計,盡量將傳統特色保留,再加入現代剪裁設計,簡約地呈現華服長衫之美,令大家唔會輕易遺忘佢嘅獨特風格。 ●Janko畢業於時裝設計系,曾在電視台服裝部工作。她創立品牌新裝如初,以現代元素重新演繹傳統中裝。 ●Janko指中裝加多點現代設計,其實很適合日常穿搭。 潮爆牛仔布旗袍 叫好叫座 對好多人嚟說,旗袍長衫是上一代產物,會覺得老土不入流,又點會肯著出街?Janko覺得要令年輕人接受旗袍作為日常服飾,最重要係「時尚度」同「舒適度」。「過往傳統旗袍多用真絲,圖案又龍又鳳又花,唔係大排延席都唔會著。如果人地覺得老土,其實呢條路好難行落去。」為咗令長衫回歸生活,即使著返工或出街都唔會突兀,Janko只保留傳統中裝標誌性特徵如企領、斜襟和中國鈕,布料使用牛仔布,再加上拼貼同水洗效果,令華服臉貌即刻年輕化。「牛仔布係非常平民化既物料,現代人無邊個屋企無牛仔產品。」不過用牛仔布做中裝,一啲都唔易。「中國鈕講求細緻,但牛仔布料好硬,每次做完之後,手指都會腫哂。」除牛仔布外,Janko亦愛用棉、麻、絲等天然物料物料作面料,配合新式線條剪裁,著得舒服又可以融入周圍。 ●Janko只保留傳統中裝標誌性特徵如企領、斜襟和中國鈕,布料使用牛仔布,再加上拼貼同水洗效果,令華服臉貌即刻年輕化。 ●度身訂造和複雜步驟如手針、鈕會堅持本地製造,但製作時間可能以月計。 ●高山劇場內除咗一般門市外,仲舉辦「華服學堂」,傳授中裝製作基本功。 承傳艱難 要靠新血重組 雖然Janko銳意保留傳統中式服裝文化與工藝,可是始終難敵時代洪流,傳統旗袍裁縫師傅早已買少見少。「宜家喺香港仲有接生意嘅師傅,我諗十隻手指數得晒。」所以Janko還在高山劇場門市舉辦「華服學堂」,傳授中裝製作基本功,俾新一代感受一件手工衫嘅矜貴。「即使最後唔係作為職業,但過程中提升大家對華服興趣,其實都係一種教育同推廣。」不過Janko補充,要做到真正傳承,不能只單靠老師傅存在。「傳承需要喺傳統加入新元素進行重組,令到下一代人能夠容易接受,否則人哋唔會有興趣,咁樣就好難做到傳承。」 ●牛仔布洗水效果千變萬化,造出來的旗袍自然不同,所以每件作品都是獨一無二。

【文化傳承】原來路牌都有錯字?揭開路牌和香港發展神秘面紗 – 專訪道路研究社社長邱益彰Gary Yau

https://youtu.be/53XoUS765gs 理論上,路牌就係俾司機睇,但有冇諗過簡單一塊路牌,隨時蘊藏重要嘅香港發展史?舊式道路及路牌設計愈見稀有,彷彿同城市發展競賽一樣,最短時間搵到同埋紀錄。「道路研究社」社長邱益彰Gary Yau幾年前肩負重任,唔單止收集路牌特有嘅「監獄體」,更研究將呢啲文字「復活」,喺網絡分享俾大家。任務看似艱鉅,但佢好樂在其中,究竟路牌有咩吸引之處? 不完美,反而有人情味 包括編者在內,很多人都唔知路牌都有分新舊。新路牌字體工整,望落順眼;相反舊路牌睇上去粗糙,字體唔平衡甚至好似寫錯字,Gary指所謂嘅「錯字」只係異體字。「以前路牌都係囚犯手劃上去,例如葵涌嘅『涌』字;清水灣嘅『清』字,同埋舊式商場會用『商塲』,其實冇寫錯,只係舊式寫法。」有人會問,監獄體不過係中文字,有咩值得保留嘅地方。他認為人手製路牌充滿懷舊氛圍之外,字裡行間更有一份人情味,正正係今日嘅香港所欠缺。」 ‧細心留意葵涌嘅「涌」字,監獄體路牌會使用「コ」而非「マ」。 1997年西隧通車,政府全面改用電腦印刷路牌後,今日只剩返約六百塊「監獄體」路牌。大家可能覺得九龍舊區捕獲機會較大?咁就錯啦,新市鎮先係真正「監獄體集中營」。Gary指市區重建不時要換路牌,相反殖民地政府發展荃灣、屯門、沙田等衛星城市時,道路網絡早已規劃好,路牌自然可以「五十年不變」。唔單止咁,佢亦指香港嘅道路設計,至今仍然屬於世界頂級。「唔同台灣、日本,政府好聰明利用兩段式過路同調較燈號順序,令道路唔會出現人車爭路,即係行人過馬路果陣,汽車會喺白線前等待。」 ‧一年多前因颱風吹爛界限街其中一塊路牌,背後嘅初代路牌唔小心「走光」,原來當年中文係右去左邊呢! ‧Gary指監獄體路牌之外,坊間仲有唔少有趣路牌字體,隨時有一塊喺身邊。 好嘢就會有保留價值 鍾意一樣嘢,真係在所不辭。Gary坦言保育「監獄體」一啲都唔易,影相之餘仲要返去數碼化。「用喺路牌嘅大約只有幾百字,但常用字有7000-13000個,我地唯有喺電腦後製『造字』,亦係最花時間嘅工序。冇辦法,盡做啦!」小編同好多網民一樣,希望有機會可以喺電腦用到監獄體。雖然佢話要再等下,但可能係呢幾年懷舊同本土文化興起,反應意外地好。「呢啲嘢政府唔會主動提起,但大家可以用生活化角度,感受細微而且在地嘅香港城市發展,對傳承文化有好大幫助。」 提到喺網上分享字體,Gary幾年前喺Facebook同Instagram開設「道路研究社」專頁,幾年間搵到唔少志同道合,反應唔錯。佢覺得要引起觀眾興趣,文章數量係其次,識得「抽水」之餘仲要保持質素先係最緊要。「例如一年幾之前,因為打風吹爛咗界限街一塊路牌,暴露咗幾十年前初代路牌出嚟。喺專頁分享之後,唔少人發現路牌文化同生活息息相關,而且消失速度好快,漸漸就會自己發掘落去。」監獄體路牌終有一日會消失,但Gary認為吸引到大家一齊研究同紀錄,就係專頁希望做到嘅嘢。 ‧Gary指坊間紀錄路牌文獻和書藉不多,資料也很零碎,故特意出書講香港道路及路牌大小事。 ‧Gary希望將監獄體「重生」,就算將來在路牌上消失,大家仍可以在電腦使用。

【球場以外】「我嘅世界唔止得足球!」燈神跳出Comfort Zone學做戲 – 專訪 Lulu Tung 董嘉儀

https://youtu.be/kQLOsQHwikM 董嘉儀,大家通常都叫佢「大埔Lulu」,睇開足球嘅可能會唔客氣直呼佢做「燈神」。自與本地足球隊和富大埔結緣開始,各種話題一直同佢形影不離。鍾意佢嘅粉絲有好多,但負評嘅都唔少。由做啦啦隊至今,不經不覺近十年時間,到底呢位小女子經歷各種風雨之後,點樣將真正嘅「Lulu 董嘉儀」帶俾大家呢? 一切從啦啦隊開始 Lulu也坦言和大埔密不可分,事關17歲時已經擔任和富大埔足球大使。「大埔Lulu」成功吸引唔少球迷入場,更被網友選為當年「港甲十大最具影響力人士」,其實都唔係壞事。喺機緣巧合之下加入足球隊,Lulu直認初時對足球係一無所知。「有99%女仔問『越位』係咩嚟架,想當日我都係會問呢啲問題,啲男仔都會解釋到嬲,哈哈!」但多得隊友同球迷幫手惡補,宜家認球員、分析戰績,到踢法風格都難唔到佢,對一個二十出頭嘅女仔,記到咁多嘢都唔容易㗎! 攻擊令「燈神」成長 做足球大使之餘,Lulu亦係模特兒。本身著波衫係工作需要,到世界盃歐國盃期間影下波衫相,講下撐邊隊,點知被冠以燈神之名。「初初大家只喺講笑話我著邊隊波衫,個隊就會輸,但後來好多人都真係唔開心。」Lulu回憶當時不知所措,又覺得好無奈。「睇波應該係一件開心事......睇返啲留言,我有諗過自己到底係咪做錯,令到大家咁唔好受。」 面對排山倒海嘅批評,Lulu承受住唔少壓力,但同時亦令佢急速成長。「我又唔會對著波衫呢個舉動而後悔,不過網上言論一定有好評同負評,點樣面對逆境都係人生重要一課。」 ●經歷打擊過後仲企得穩,Lulu表示上咗人生重要一課,學識面對逆境同攻擊。 打開Lulu社交媒體平台,除咗出席各種公開場合同埋活動,仲有唔少跑步、瑜伽相。Lulu話自己體弱多病,原本唔係運動型,不過宜家已經將跑步變成生活習慣,仲成功衝出海外比賽。「近年我參加唔同馬拉松比賽,10K同半馬都有。最難忘個次係去德國跑馬拉松,居民喺兩邊拎哂屋企啲工具為跑手打氣,加埋當地風景好靚,唔係跑步都冇機會感受。」唔單止咁,Lulu仲好努力學瑜伽,打算考埋導師牌。如果佢開班,大家又有冇興趣上佢堂? ●Lulu喜歡做運動,令佢暫時忘卻生活各種煩憂,好好做自己。 決心多元發展 唔怕被定型 「燈神」一役後,Lulu聲名大噪。今年26歲嘅佢決心跳出Comfort Zone,簽咗經理人公司,幾年間做過主持,更參與過舞台劇演出,又拍過電影,慢慢進軍成全方位藝人。「好多人都同我講:『你咪繼續去講波,喺足球界發展,你一定得啦!』但我都想試多啲唔同嘅工作,俾大家見到唔同嘅一面。」Lulu希望喺演戲方面有突破之餘,再放多啲個人想法喺角色入面,所以特登報咗演藝班Upgrade自己。「我本身對自己自信心唔係好強,上堂唔單止練基本功,仲就可以突破自己。老師講過『Lulu你唔係得呢條路,你都可以潑辣可以瘋狂!』」Lulu認為內心堅定同樣重要,畢竟好容易會俾其他人影響而迷失方向,所以要目標清晰,知道自己想追求乜嘢,先可以行到自己嘅路。 ● Lulu指足球的確令更多人認識佢,但自己並冇忘本。嚟緊LuLu都會繼續去球會幫手同宣傳。 ● 大埔Lulu這個名字早已成為董嘉儀代名詞,不過佢都希望大家會記得,佢係Lulu董土口。  

【自信嘅毒男】一條片過百萬Views是怎樣煉成的?關鍵係熊女郎要夠「爆」! – 專訪 FHProductionHK YouTuber 熊仔頭

https://www.youtube.com/watch?v=NWxkkaW69x4 大家嘅YouTube帳戶總會Follow幾個YouTuber,返工搭車冇嘢做都係靠佢地嘅片過活。小編相信唔少人都有Follow熊仔頭,或者用「初代YouTuber」形容佢同好拍檔藍仔頭,以及一班熊女郎,應該冇咩人反對。當年用幽默方式剖析港男港女好有共鳴,幾年間足足吸咗56萬Subscribers,每條片Clickrate都廿幾萬起跳。究竟喺呢個超級搶眼頭套底下,熊仔頭喺現實又係一個點樣嘅人? 鏡頭前型男 私下係毒男? 2012年,果陣只有19歲嘅熊仔頭同老友藍仔頭成立FHProductionHK,拍短片講年青人心聲。「初初唔識拍片,驚拍出黎啲野唔好睇,怕瘀俾同學笑,咁就話不如笠住個頭套啦!」結果鬆馳熊呢個頭套深入民心,至今仍然繼續以頭套形象示人。YouTube入面熊仔頭搞笑幽默,完全唔怯場。不過熊仔頭形容自己私底下係一個毒到不能嘅毒男。「我拍片個陣時會chok聲,感覺上精神啲有中氣,但自己平時毒到連去M記拎茄汁都唔敢插隊,哈哈!」 ‧鏡頭前嘅熊仔頭搞笑有趣,但背後其實都係一個唔敢拎茄汁嘅「毒L」。 爆笑Idea源自日常生活 之所以吸引咁多觀眾,就係因為主題圍繞生活日常,例如讀書、父母、時事等等。「我個IG有一句寫住:『I am surrounding the planet.』意思係我圍住個地球轉。大家想睇乜,咁我就去拍乜。」最令熊仔頭人氣急升必定係代表作《男人有話兒》系列,短片描述男女朋友相處,令唔少人(按:相信係男士為主,Right?)好有共鳴。本身佢地會上討論區搵下網民有咩趣事分享,但佢話之後根本唔駛再搵料。「之後嘅片都係真實故事演返出嚟,女人真係好可怕!」 既然睇得熊仔頭,又點少得一班「熊女郎」呢?佢地令影片生色不少之餘,亦引起(男)網民熱烈討論,當中最受歡迎必定係杜小喬,仲入選過幾屆「高登女神總選」。問到點先做到熊女郎,佢答咗一個字「靚」!「唔知點解靚女做戲特別好睇。我哋研究咗好耐,同一個角色比唔同人做,點解差咁遠?哦!原來純粹因為靚。」不過唔係靚女咪冇機會做熊女郎?答案係未必!「隨住觀眾想要另類口味,都會搵啲好肥或者性格趣怪,要夠極端先有戲劇效果,清一色靚女唔Work㗎啦。」熊仔頭覺得冇拍攝經驗嘅素人夠「出於污泥而不染」,能夠為觀眾帶來新鮮感,都係佢地Target嚟㗎。 ‧熊仔頭認為Idea唔駛天馬行空,反而夠寫實夠日常先會多人睇。 ‧杜小喬唔單止令熊仔頭嘅片更受歡迎,更令佢踏上藝人之路同高登女神。 Project「錢來就做」 顧客未必永遠是對的 熊仔頭形容自己「錢來就做」,但要喺成本之下攪盡腦汁,又想玩盡唔同主題,例如微電影《一天》、《我的小鬼兵》以及《我來自YouTube》,都未必人人接受。「拍咗多短嘅,又想試下拍長片,諗住多啲變化。初時大家都好鍾意,點知又有人話短好啲,應該keep住以前風格,咁我咪又拍返短。」大家可能同小編一樣,睇熊仔頭啲片都係講求直接,唔駛太有深度,最後帶出個「MK道理」,但近年風格變得愈來愈高深,出片量亦減少。「細個拍片為自high,講下MK嘢搞下笑就算。但如果片長十幾分鐘,就可以舖陳多啲,等觀眾自己去感受當中道理,咁先會俾大家有更深印象。」 隨住知名度增加,不少品牌都搵熊仔頭合作拍片。但商業同創作之間要點樣取得平衡?佢認為雖然「客戶永遠是對的」,但有唔少老闆已經願意放手,盡情俾佢地發揮。「同老闆講咁樣拍會好笑啲多人睇啲,可能我地夠多Reference,大多數都會認同。有啲客戶就好堅持自已個套,但我地會講太過hard sell唔好笑,反而會嚇走觀眾,最後佢地都會交返比我地去度橋。」熊仔頭坦言站係觀眾立場,當然唔希望太過商業化,所以盡力將影片拍到符合佢地風格,希望觀眾會欣賞同受落。其實佢地嘅成績表記係每條片點擊率同Comments,總有網民會在討論區批評,但熊仔頭一向都抱持開放態度,唔單止輕鬆面對,更樂於聽取各種意見。「當太多人鬧你個時,都會諗下係咪自己有錯呢?不如聽下人地講不斷改進。」喺呢個競爭激烈、花招百出嘅YouTuber時代,熊仔頭認為要成功,努力喺不二之法。「其實都係老土一句,面對競爭要不斷努力,盡量做好自己。」熊仔頭覺得做自己想做嘅事先係最重要,有熱誠先可以喺YouTube舞台上繼續發揮佢地嘅小宇宙。 ● 熊仔頭好尊重網民批評,甚至反思係咪自己有錯,再俾空間自己改善。

【實現造酒夢】妙用白蘭花精華 釀製香港人專屬美酒 – 專訪白蘭樹下創辦人張寅傑 Kit Cheung

https://youtu.be/UZdDXGzteQY 了解一個地方嘅風土人情,睇下當地嘅酒係一個好方法。不過香港地域同政策所限,一直都冇咩本地代表作,直到張寅傑(Kit)和張穎雋(Joseph)埋首新界八鄉一所青磚屋實驗室不斷鑽研,最終釀製出「白蘭樹下」(Perfume Trees Gin)。呢款代表香港嘅Gin酒,用盡本地植物製作,蘊含香港獨特文化,自然深受大家歡迎,難怪連Kit都好自豪話:「終於造出一款屬於香港人嘅酒啦!」 釀酒熱情結合農家智慧 「白蘭樹下」係第一支由土生土長香港人所製作嘅Gin酒,融合白蘭花淡香和草本植物清新。「好似一個感覺清爽,喜歡慢活嘅女孩子咁。」Kit係一名調酒師,有次喺調酒課結識當時任職護士嘅Joseph,兩人一見如故成為酒友,成日一齊飲靚酒,Kit笑言飲大兩杯之後萌生釀酒念頭。「酒可以話係唔同地方對自己身份認同嘅重要元素,我地身為香港人,不如整返隻有香港特色、有地區性嘅酒啦。」Kit和Joseph絕對唔係下爬輕輕,他們買哂材料同設備,喺錦田八鄉租咗間80年歷史嘅青磚屋,再翻新成工作室著手研究。「呢度夠靜,車都入唔到嚟,而且造酒同植物好大關係,好接近農作物,可以見識到各種農村智慧,例如老人家識得將剩餘農作物釀酒,但份量幾多呢?佢地又答唔到你。」Kit笑言造酒唔止要落手做,仲要觀察其他人點做,將啱用嘅嘢套用喺自己身上,咁就容易成功啦。 來自眾人回憶的白蘭花 好多人講過,成功係來自無數次失敗。Kit和Joseph應該好明白箇中道理,佢地試過將唔同種類的花入釀,包括雞蛋花、洛神花等等,但一係效果未令人滿意,一係Marketing唔啱。「雞蛋花其實唔係唔好飲,但飲落去令人諗起峇里島,冇香港Feel喎。」最終決定採用清新優雅,而且為人熟悉嘅白蘭花作基調。「外國人眼中代表香港嘅可能係洋紫荊,但公公婆婆晨早拎住白蘭花叫賣嘅情景,先係每個香港人最地道嘅集體回憶,見證香港精神同傳統價值。」有留意樽身的話,仲可以睇到其他配料,例如當歸、陳皮、龍井、檀香等傳統草本植物,令「白蘭樹下」每一滴都充滿香港獨有氣息。 雖然白蘭花香氣怡人,但要釀製成酒絕對係一項挑戰,皆因白蘭花保存時間極短,所以時間掌握非常重要。「我地同農夫喺白蘭花開花前採摘,然後即刻將花蒸熟,先拎到白蘭花提萃液拎去蒸餾。」一年多造酒過程中,兩人經歷無數次試驗,Kit笑指唔成功反而仲開心。「唔同成份、比例、配搭順序都會影響味道,令到成個研發過程變得好好玩。我唔鍾意浪費,就算整出嚟唔成功都會照飲。」 ● Kit認為要親身認識農作物,選擇最好材料造酒。 無奈遠赴荷蘭蒸餾 Kit與Joseph要將所有原材料由香港送到荷蘭蒸餾,但佢地認為係值得。「要喺外國蒸餾嘅話,最好選擇一定係Gin酒發源地 - 荷蘭,因為當地有好多豐富經驗嘅釀酒師。」「白蘭樹下」樽身於法國製造,樽蓋產自葡萄牙,單單將樽身和樽蓋運到荷蘭入酒再組裝,又增加唔少運費。問到點解唔喺香港建造有蒸餾裝置嘅酒廠,佢就坦言面臨不少阻礙。「香港土地有限,蒸餾廠佔地多,而且租金成本好高。」申請蒸餾廠牌照牽涉多個政府部門,包括食環署酒牌、環保署排污牌、消防處危險品牌等等,手續繁複。「如果可以係香港設廠,釀造香港人嘅酒梗係最好啦,但香港政府好得意,要先租場先傾點做,傾唔成就要浪費哂啲錢同時間。」Kit坦言政府對製造業支援力度不足,令他們無法在香港設立蒸餾酒廠。「希望幾年後可以喺香港開到蒸餾廠,造出一支百分百來自香港嘅Gin。」 ● 樽身由香港書法品牌「賣字」繪畫,樹上還寫滿各種原材料。 讓香港味道永久保存 釀造過程經歷重重難關,「白蘭樹下」終於在2018年12月推出市面,大受香港人歡迎,唔少酒吧都有引入。Kit和Joseph更希望將白蘭花香擴散至世界各地,現時「白蘭樹下」已在台灣發售,英國和日本巿場則正在洽談。「我地下年四月會去英國參展,希望等多啲人認識呢支香港Gin酒。」除擴闊銷售渠道,Kit很高興「白蘭樹下」令更多香港人願意了解「酒」嘅內涵。「我見到飲酒文化慢慢改變緊,以前啲人飲酒係因為生活太辛苦,宜家飲酒就係為享受生活。所以佢地會嘗試認識好酒,想知道自己飲緊乜嘢。」Kit希望這位「清新慢活的女孩子」,能夠在香港人心中佔一席位。 ● Kit坦言白蘭樹下不便宜,但要將原料由香港拿到荷蘭蒸餾,「一分錢一分貨」自然仍受追捧。 ● 香港人飲酒不再花天酒地般表面,現代人願意了解「酒」嘅內涵,其實都是一件好事。  

【幕後功臣】一雙手塑造荷里活經典角色 識設計更要識解剖! – 專訪荷里活電影特效化妝、角色造型設計及雕塑師片桐裕司(Hiroshi Katagiri)

電影角色要怎樣才會給觀眾留下深刻印象?浮誇外表?色彩絢爛?作為電影創作關鍵部份,塑造角色形象任務落在特效化妝及造型設計師身上,但實際創作時如何帶出表現力和感染力呢?今次請來參與過多部荷里活電影及電視角色人物製作,來自日本的電影特效化妝及角色造型雕塑家片桐裕司(Hiroshi Katagiri),將製作現場工作思路歷程大公開! 崇尚電影角色設計 隻身勇闖荷里活 片桐裕司自少喜歡動漫和美國電影,特別是恐怖電影。在他13歲時,無意間在書店中發現一本有關特效化妝的書,他就下定決心要去美國學習,立志成為電影特效化妝師,創作角色造型。片桐裕司明白在電影世界中,充滿魅力的角色人物往往能夠第一時間吸引觀眾注目,是向觀眾傳遞信息的重要途徑,因此電影界非常重視角色造型製作。「人們看電影或作品時,角色造型會直接影響觀感,假若做得不好,就會影響觀眾投入度,變相不會享受劇情。」在18歲高中畢業後,片桐裕司隻身遠赴美國,學習粘土雕刻技術。後來他加入知名特效化妝工作室「Stan Winston Studios」擔任造形師,累積經驗。當時曾參與《A.I》、《侏羅紀公園3》、《時光機器》等眾多電影作品角色創作。現時為角色造型雕塑家及導演,繼續在荷里活及不同地方從事各種不同藝術製作。 ●18歲高中畢業後,片桐裕司隻身遠赴美國,學習粘土雕刻技術。後來他加入知名特效化妝工作室「Stan Winston Studios」擔任主要造形師,累積經驗。(被訪者提供圖片) ●要塑造一個又一個經典角色,不論是人物、怪人、怪獸、機器人,每個都要有獨特之處。雖有看似非常困難,不過片桐裕司有一套人物設計法則。 角色人物設計法則 要塑造一個又一個經典角色,不論是人物、怪人、怪獸、機器人,每個都要有獨特之處。雖然看似非常困難,不過片桐裕司有一套人物設計法則。「角色人物設計最重要因素就是了解生物肢體結構,能夠理解就可以大幅提升角色人物設計效率,同時加強角色魅力。例如利用各種姿勢動作,從而表現出角色人物真實感。」只要能夠掌握設計法則,就可以讓整個設計過程更有效率,最長時間也只需時約6個月就能從設計到完成人物塑造工作。 ●特效化妝師會利用陶坭捏出或雕出角色造型雛形。(被訪者提供圖片) 不能單憑想像 醉心研習解剖學 別以為特效化妝及造型師的工作只需要專注設計出電影角色造型,片桐裕司表示了解劇本內容是前期工作重要一環。「要令角色形象深入民心,需要很多元素結合。除角色細膩造型和特徵外,角色登場方式以及導演拍攝手法都會有所影響,所以我們會向導演了解整個故事後,才開始構思外型。」 接下來的階段,特效化妝師會利用陶坭捏出或雕出角色造型雛形。「有時只需製作小型雕塑便可,但亦會因應導演要求,整出1:1實際大小。」有些角色需要演員配合試身,為減少溝通誤會,片桐裕司會與導演確認心中所想。「特效化妝師和造型師較了解實際人物整體造型,可與導演互相協調,同時抓緊製作時間,避免變動而延遲完成。」 為追求更高階的造型雕刻製作水準,達至栩栩如生,片桐裕司還進一步研習解剖學,深入了解人體結構。「好多時候大家覺得角色融入奇幻元素,其實都要憑空想像出來。但不論真實生物還是幻獸,很多時觀眾會將眼前角色與現實比較。要讓觀眾投入電影之中,信服有這種生物或角色存在,就必須回歸到掌握生物的骨骼、肌理、毛髮膚質和姿態。」 ●片桐裕司認為,要讓觀眾投入電影之中,信服有這種生物或角色存在,就必須回歸到掌握生物的骨骼、肌理、毛髮膚質和姿態。(被訪者提供圖片) 「落手做」才是王道 靠著細膩藝術技巧電影角色創造與眾不同的造型效果,片桐裕司獲得不少好評。在荷里活奮鬥近30年,他認為這份工作有趣之餘,也非常特別。「在電影業中,造型雕刻這個部份讓他覺得十分快樂,有時更像一班喜歡著怪獸的大小孩一樣在玩耍。」近年,片桐裕司專注於傳授雕塑技巧,學生不乏有藝術工作者,更多是對行業有興趣的年輕人。「如果希望從事角色造型設計工作,我建議要自己親手製作作品,因為單純喜歡設計並不足夠,而是必須享受創作過程,真正落手實行才可。」他認為角色造型師要具備熱情,以一顆純粹的心,專注於製作上。「能力不是最重要,而是自己對這個愛好有多投入。」片桐裕司希望每個人都能夠放膽實踐自己的夢想,享受自己喜歡的工作,毋忘初心,方得始終。 ● 片桐裕司主要代表作品非常多,例如《環太平洋》、《超人:鋼鐵英雄》等等。而他最喜愛《加勒比海盗-神鬼奇航4:幽靈海》中的美人魚。(被訪者提供圖片) ●片桐裕司教授雕塑課程,不分技巧程度與職業,能夠運用在不同領域及工作上。(被訪者提供圖片)  

【身兼四職】豪華旅遊達人開茶飲店 玩盡各種調配Formula – 專訪旅遊達人袁學謙 (Benedict Yuen)

https://www.youtube.com/watch?v=Msm5dTLMWNw 唔少香港人都係一隻無腳既雀仔,一放假就想去轉旅行散散心。旅遊達人袁學謙(Benedict)更將旅遊成為佢嘅職業,帶住航拍機四圍享受世界。近年更擔任「離地自由行」節目主持,帶領攝製隊踏足歐洲、非洲、俄羅斯。想法多蘿蘿嘅佢貫徹自己「大膽嘗試」宗旨,開設茶飲店「+-x茶」,實行進軍飲食界,連「飲食才俊」都做埋!不過佢就話表面風光,背後辛酸,究竟點解去旅行都覺得係苦差? 豪遊世界 非洲一啲都唔落後 諗返起當年無錢,或者想體驗下在地生活,捱麵包住Hostel「窮遊」絕對係首選。不過Benedict自家製作嘅旅遊節目《離地自由行》,竟然一反常態,以豪食豪住豪玩做賣點。Benedict帶觀眾飛到東非、德國和俄羅斯,自己都有好深體會。「人大咗唔能夠7點起身趕去景點,反而想花多少少,Book間靚酒店好好Relax下。而家我專攻豪遊路線,觀眾一諗起去嘆世界要搵資料,就會諗起我同個節目。」Benedict笑言做完節目後,重新認識很多地方,當中最有趣必定要數到非洲。佢話非洲唔單止唔落後,而且係好多人豪遊都會揀非洲,例如高級酒店更要2,000美元一晚;熱氣球都要幾千港元搭一次等等。不過非洲天氣變幻莫測,日間可能有30多度,但晚間只有4度,打破好多人以外非洲 = 酷熱嘅傳統想法。不過能夠在熱氣球一睹動物大遷徙,以及飽覽無盡漫天星空,呢啲畫面的確一生難忘。不過Benedict笑指當地原居民話佢地日日都望到,唔明點解都市人要俾咁多錢嚟睇,果然每個城市嘅人都係咁! ‧非洲都可以豪遊,一晚酒店隨時幾千蚊美金㗎! 全職旅人好易做? 唔好睇Benedict成日坐頭等艙周遊列國,全職旅人一啲都唔易做,背後好多辛酸只有自己知。「大家可能以為拍節目,幕後有哂Writer、搵料、傾Sponsor,錯!其實全部都係我一個人做哂。」Benedict認為好難靠旅遊KOL維生,所以要主動搵多啲收入來源。當成為《離地自由行》主持後,坊間對佢認識多咗,自然獲得更多工作機會。「本身我有做司儀同Marketing工作,偶然都會拍廣告,一般都同旅遊有關。一個Job大約$20000 - 50000都有,視乎駛唔駛出Trip啦!」佢坦言自己一人身兼四職,幾乎不眠不休工作,咁先可以賺到第一筆資金,俾佢成為創業老闆開設茶飲店。 ‧Benedict無諗過非洲都可以好凍,打破好多人對非洲嘅傳統思維。 創立本土茶飲品牌 大玩實驗風格 喺世界旅遊咁耐,點都會有啲特別收獲,Benedict甚至搵到佢嘅創業契機。有次佢喺倫敦行市集,試到一隻抺茶覺得好特別,無諗過日本以外都可以喝到咁正宗嘅抺茶,於是膽粗粗聯絡創辦人,試下拎個代理返香港,結果大家一拍即合,就成為「Matchaeologist抹茶主義」。拎到代理權之後,Benedict即刻萌生其他生意念頭。「呢隻抹茶粉除咗直接飲用,仲可以用嚟烘培,如果拎嚟做自創茶飲都得喎!」 有咗Idea之後,Benedict身體力行,與兩名朋友合共投資約100萬元,幾個月前喺上環開設「Teaculation +−×茶」。不過創業期間都遇到唔少問題,例如選址、請人、研發產品等等,佢坦言唔係錢可以解決,好彩三個Partner各司其職,先可以順利。「香港市場大部份茶飲都來自台灣,一般已經有既定formula,但我地作為『本地薑』品牌,有好大自主性,所以我地嘗試玩多d花樣,突破傳統框框。」 而家+−×茶三大熱賣飲品係宇治抹茶拿鐵、焦糖旺鳳梨氣泡茶、草莓鮮乳沙冰,佢地更會不時搞搞新意思,例如金沙鹹蛋鮮乳沙冰同最新手作蕨餅抹茶拿鐵,聽落去怪怪地,飲唔飲得㗎?但飲落去又幾好味,呢啲就係小店獨有嘅彈性。 Benedict更有意將+−×茶發展特許經營,嚟緊仲計劃反攻茶飲最盛行嘅台灣,首間海外分店預計喺年底在台北西門町面世,同時打算進軍東南亞。「其實東南亞茶飲需求仲大過香港,但我地可能會微調口味,例如泰國要甜啲、果味重啲,所以必需要清楚佢地市場口味。」 打四份工好瘋狂? 走過萬千遍野,Benedict原來仲未去過南美洲,但佢媽咪去過,佢就好想跟隨媽咪嘅步伐,去認識呢個遙遠國度。佢認為人生就如馬拉松,過程係辛苦,但一日唔放棄,成功就會來臨。「我宜家打緊4份工,每日訓得4-5個鐘,犧牲好多娛樂時間,可能好多人會覺得好瘋狂,但可以試唔同嘅野。雖然好辛苦,但今時今日嘅成績的確係靠咁樣逼出嚟,所以大家唔好放棄,好快就會成功。」 ‧ 「本地薑」茶飲唔駛咁公式化,可以玩多啲,推出更多市面少見嘅飲品。 ‧Teaculation +−×茶於選址上環內街,客人依然唔少,但租金僅為大街1/3,減輕負擔。

【Slashie唔易做】新聞主播化身司儀演員歌手 「我一啲都唔悶唔嚴肅!」 – 專訪 Slasher 方健儀 Akina Fong

https://youtu.be/GWyx2u22keI 某年大台改革晚間新聞時段,提早至11時播放,往後幾年間都係由方健儀擔任主播。望住Akina正氣凜然同嚴肅外表,仲不知不覺間成為佢嘅Fans,睇埋先肯訓覺。不過自從Akina講完「多謝支持,後會有期」之後,離開大台七年後嘅今日,已經變成一位多才多藝嘅Slashie,即係大家講嘅自由工作者。今日坐喺鏡頭前笑臉迎人,而且演技大爆發,實在同大眾腦海嘅印象完全唔同。究竟真實而且性格搞笑多變嘅方健儀,點樣形容自己嘅Slashie人生? ‧坊間對方健儀仍然停留喺大台年代,足足要花咗幾個月時間擺脫固有形象。 方健儀 = 悶、嚴肅? Akina離開大台之後,曾經喺廉政公署擔任高級新聞主任,佢認為自己離開ICAC前一刻,仍然係一個追求穩定嘅人。「本身人工唔係低,但見到愈嚟愈多人跳出Comfort Zone,不如俾一年時間自己,放假又好,挑戰人生都好,就咁走上Slashie呢條路。」不過唔好以為有人氣就好易接Job,坊間對Akina嘅印象仍然停留喺大台年代,嚴肅、正經、唔笑、悶等等嘅形容詞彷彿同佢劃上等號,令到好多客人都唔夠膽搵佢。佢認為唯一解決方法就係咩Job都接,甚至唔要面自薦去信電台做主持,呢個過程足足花咗幾個月時間。「好彩大家反應都好好,把握多啲機會就令自己個人3D咗,俾人知道真正嘅方健儀係一個咩人,大家先放心搵我。」 兩句對白拍足八個鐘 自從方健儀成為Slasher之後,唔單止司儀、公關培訓班、電台、專欄可以成日見到佢,連唱歌拍戲都撈埋,問到最鍾意做邊樣,佢就覺得司儀係最有挑戰。「做司儀練稿時間唔多,有時可能要背一大段字同人名,仲有好多突發場面,只可以靠自己當場執生,成功過關又好有滿足感。」至於拍戲就令佢又尷尬又難忘。「拍《寒戰II》明明得兩句對白,以前做新聞十秒讀完,點知竟然要拍八個鐘,仲要同影帝梁家輝做對手戲,我個樣表面睇上去好自信,實際就騰騰震。」不過多得呢次蝦碌經驗,令佢之後再接拍短劇、電影都更有信心,最近更為政府拍宣傳片,將搞鬼幽默嘅一面呈現出嚟。「呢個先係真正嘅我!」 ‧Akina話睇返《寒戰II》嘅自己都會笑,所以俾5分僅僅合格啦! 皮革賺得少但有成功感 不過Akina最初嘅Slash大計仲諗住做埋皮革,甚至不時將作品放喺專頁賣。「我問師傅可唔可以幫手教班,師傅都以為我講笑,去到我辭職後就真係幫佢地手,教年輕人整散紙包、卡片套。」佢都曾經參加過手作市集,通宵達旦𠝹皮、揼釘,雖然最後只係賺一、兩千蚊,但對好珍惜一手一腳用針線用心機賺返嚟嘅錢,呢種快樂唔係返工俾到佢。近排佢仲整咗啲AirPods皮套,如果大家有興趣不妨搵佢落單啦! ‧Akina認為做Slash要面皮厚,仲要好好訂立目標,唔好要求太高。 唔好將目標Set得太高 以前做主播頻頻出鏡,對之後做Slashie有幫助?方健儀認為唔一定,不過佢認為以前做記者嘅性格,有利佢應對唔同場合。「做Slash最緊要面皮厚,多啲自薦同Sell自己,俾人『食檸檬』好正常,唔得嘅咪下一次。另外啱啱出嚟果陣,預咗期望要大幅降低,甚至set到原本收入一半,達到目標咪慢慢再加上去,否則希望愈大失望愈大。」另外多啲出席唔同場合,唔好淨係影相打卡,要多啲交換卡片傾下計建立網絡。世界上無免費午餐,所有成果都要靠自己爭取,Akina認為有想做嘅事,就唔好諗咁多,行出第一步先知個世界係點樣。「人生係有旋轉門,試過唔啱咪返嚟,究竟人生係康莊大道定係驚險小徑,其實都係你自己決定。」 ‧唔試過又點知唔得?所以無論幾多歲,想做就做,唔好諗太多。

【慢工出細貨】小店逐碗日煮300碗米線 「為熟客為招牌賺少啲無所謂」 – 專訪老闆娘雲南米線負責人 李傑生

https://www.youtube.com/watch?v=mnPxt2VKRiY 一提起荃灣,大家除咗諗到「天空之城」之外,都會知道區內有好多好嘢食。不過美食又點會俾你咁易搵到?香車街熟食市場呢個名可能比較陌生,但一講「老闆娘」呢三個字,可能大家都有啲印象。一座無冷氣嘅熟食市場,日頭人流唔多,但唯獨老闆娘雲南米線門口人山人海,究竟有咩秘密,可以令一眾食客等到身水身汗,都要食到呢碗米線?「老闆娘老闆」李傑生五個字點出真相:「抵食夾大件!」 ‧湯底同炸醬係「老闆娘」致勝之道,而且小鍋米線一定要逐鍋煮,咁先夠入味。 招牌炸雞大到嚇親你! 抵食夾大件講就容易,但又有幾多間可以做到?李傑生開舖近十年,笑言第一次食老闆娘雲南米線的話,佢地嘅招牌炸雞同炸豬扒一定會嚇親大家。對佢而言,關鍵就係抵食夾大件。「三大舊新鮮炸雞真係落足料,出面其他人用半塊雞,我咪用足一塊,話哂係招牌,賺少啲唔緊要啦,最緊要食得開心同記得我地。」除咗炸雞,佢地自創湯底亦係另一個重點,除咗秘製麻辣湯底,仲有孜然味濃嘅蒙古湯同埋甚少見嘅蟲草花湯,再加埋雲南風味炸醬,所有食物都係即叫即煮,而且仲特登調較辣度,適合香港人口味,五十蚊就可以食到,實在難得。 做得雲南小鍋米線,一定要逐鍋煮,上碟時間一定會比較長,而且成本都會高。小編走入廚房重地探秘,喺三四十度無冷氣嘅環境做嘢,仲要對住幾個火爐煮米線,個個都真係「真漢子」。李傑生笑指以前客人幫襯要睇緣份:「因為員工真係頂唔順,所以夏天會放暑假,而家已經勤力咗,夏天淨係開夜市,未有Facebook專頁之前,大家成日話要撞彩,嚟到睇下開唔開,就算開都可能好多人排隊。」兩個鐘訪問期間,門口真係不斷有人等,冬天仲要等足一個鐘先有得食,果條人龍坐滿成條走廊。不過受歡迎背後,李傑生坦言做雲南米線成本唔低。「我地營業時間唔算好長,就算開半日但伙記都要出足糧,加上而家請人唔容易,後生仔唔太想入行,所以廚房樓面都缺人,我辛苦啲冇所謂,希望同員工一齊繼續做落去。」 ‧咩叫價廉物美?三大舊招牌炸雞同各種特色湯底應該就係最佳例子。 「街市先係我嘅根」 如果係多年擁躉,應該都會記得「老闆娘」回歸街市之前,曾經有段時間搬到地舖,但對李傑生同一眾員工而言反而做得仲辛苦。「地舖舖租貴投資大,而且我地出餐時間長,好難控制成本。果陣一齊嘅Partner唔係做呢行,可能以為俾錢就實賺,結果最後拆夥,我就唔諗地舖啦!」佢指每日可以賣300-400碗米線,雖然呢個數字對比大集團嚟講只係好少,但可以睇得出佢地對每一碗米線都落足功夫,亦都因為咁而儲到好多熟客。「試過兩次搬舖,有諗過抖返段長時間,但好多熟客都問我幾時再開返舖,又話好掛住炸雞同魚肉春卷。無計,街市先係我嘅根。」 經歷過高低起跌,李傑生認為成功之道就係要做好出品,無其他捷徑。「要長期做落去,寧願賺少啲都要慢工出細貨,要維持質素係好難,但要成功就要有耐性。另外不時都要俾客人有驚喜,例如我地新推出麻辣胡椒湯底,咁樣佢地咪唔會咁易食厭一樣嘢。」呢位「廚房大佬」直言唔會開分店,因為投資額太大,而且唔能夠控制食物質素。作為隱世喺熟食市場頂樓嘅小店,未必需要通街廣告,但將最好嘅食物留俾再辛苦都要嚟幫襯嘅知音人,睇到捧場客食到津津有味嘅笑容,對呢位「老闆娘」嚟講,比一切都嚟得重要。 ‧「老闆娘老闆」李傑生坦言街市係佢嘅根,加上好多熟客支持,經歷兩次搬舖,最終都選擇回歸原址。

【HEHE室友】拍同志網劇贏盡口碑 希望大家「做人唔好咁Sterotype」- 專訪《我的HEHE室友》製作團隊「四仔工作室」

https://www.youtube.com/watch?v=uXWGL5Wn5vU 近年同志劇集愈嚟愈多,早前日劇《大叔的愛》更紅遍亞洲,而泰國、內地和台灣「BL劇」同樣深受歡迎。後來問hehe朋友有冇香港本土出品嘅同性戀劇集,原來由「四仔工作室」製作嘅網絡處境喜劇《我的HEHE室友》,深受同志們歡迎。雖然冇大卡士演員坐陣,但勝在搞笑貼地,成功吸納「腐女」同埋同性小眾追睇。今次請嚟「四仔工作室」團隊,了解一下到底點樣憑呢套網劇贏盡觀眾口碑。 唔好諗錯隔離,「四仔工作室」同大家諗嘅「四仔」無關,只係由四個男仔組成。「初初成立個陣好興『Running Man』呢類遊戲Show,所以我地開咗個系列叫『四仔有限挑戰』。不過出嚟反應一般,拍咗一排之後覺得係時候要結束。」正當打算「收山」,Pat心血來潮決定挑戰自己,嘗試拍網劇。「反正都係最後一次拍攝,不如盡地一鋪,拍自己一直以來都最鍾意嘅嘢,就係處境喜劇啦。」《我的HEHE室友》故事講述同性戀者鍾夕與「直男」雷達係相識廿幾年嘅絕世「巴打」,長大後成為同居室友,除咗性取向唔同之外,兩人生活習慣都差天共地,結果發生唔少笑話。 ‧四仔工作室最初由四位男仔組成,後來加入女成員「格仔」,仲有句口號「四仔有格仔」! 「HEHE」唔一定係「乸型」! 拍劇集當然唔少得題材同劇本,呢部份全由主角之一 - 飾演鍾夕嘅阿Pat負責。雖然近年社會對同性戀嘅觀感已經開放咗好多,但其實咁多年黎都冇完全以同性戀為核心題材嘅香港劇集,而《我的HEHE室友》唔單止開創先河,仲可以拍到咁寫實貼地,完全係因為Pat「做返自己」,以同性戀者第一身創作。「美國有套好成功嘅sitcom劇集叫『Will & Grace』,係一個男同志同女性Best friend一齊住嘅故事。我本身都係一個HEHE,對呢類材好有興趣,當時就諗:『香港可唔可以拍返套呢?』所以就即管試下拍。」 以往主流媒體出品嘅劇集,同性戀角色好多時離唔開講嘢陰聲細氣、造型同手勢好女性化,甚至連角色名都令觀眾定型「同志=乸型」,但《我的HEHE室友》中兩位主角完全巔覆主流既定印象。「直男雷達好婆媽同斤斤計較,鍾意儲印花;但鍾夕就比較麻甩,男性化少少,生活習慣上比較污糟隨性,同傳統想象嘅HEHE有好大分別。」Pat解釋因為以往角色,令好多人對男同性戀者有刻板印象,所以希望透過網劇,撕走同志身上唔應該存在嘅標籤。「香港社會成日好Sterotype HEHE呢樣野,先入為主覺得Gay就一定係女性化、好淫蕩、好鍾意周圍勾引男人,但現實並唔係咁樣。」Pat筆下角色形象一改傳統,創作出一個貼近現實嘅「HEHE」角色,自然令大家鍾意及討好,第一季拍足廿幾集,愈嚟愈受大眾歡迎。 ‧四位都希望透過《我的HEHE室友》,唔再定型同志 = 攣呢個刻版印象。 小眾劇集帶來大影響 雖然香港作為國際化城市,但對同性戀議題就異常保守,「四仔工作室」喺拍攝《我的HEHE室友》時都曾經遇上阻滯。「我地有一集要搵課室拍攝,最初有間學校都話OK,但後來知道我地拍攝嘅主題,就因為佢地嘅宗教背景同各種原因,最後都拒絕我地。」雖然團隊感到無奈,但佢地仍然覺得自己做緊嘅事好有意義,更冇諗過一套咁小眾嘅劇集,可以為觀眾帶嚟正能量甚至有行動。「有一集講啊夕好多年冇同屋企人聯絡,新年心血來潮打電話俾屋企人拜年。點知有個住喺外國嘅觀眾喺YouTube留言,話睇完呢集之後就即刻打電話返香港,同佢屋企人拜年傾計。短短一句話就令我地覺得好感動,原來我真係可以影響到人。」 要改變社會風氣同埋意識形態唔容易,最直接就係透過媒體影響,但點先可以吸引到觀眾長期收睇?幾位成員都笑笑口,話拍劇梗係要去到盡。「你會喺節目內出現Kiss、打X機等等,初時大家都會對鏡頭敏感,但呢啲都係真實大家會做嘅嘢,愈寫實愈平常嘅嘢,大家先有同感,慢慢落去大家就習慣。」Pat認為要喺「市場需要」同「忠於自己」之間取得平衡。「如果呢樣嘢唔係自己鍾意,只係為咗取悅觀眾同迎合市場嘅話,個團火好難維持落去;但如果淨係掛住拍自己鍾意嘅野,冇考慮觀眾又未必會成功同有動力。」Pat希望《我的HEHE室友》可以盡一點力,為香港嘅同志發聲,令社會更關注性小眾議題,亦希望同志們可以更加放膽去愛。「只要遇上合適嘅人,其實性別就已經唔係限制。」   ‧《我的HEHE室友》劇內有唔少大膽鏡頭,但Pat認為唔去盡,觀眾唔會感受到個種真實感。 ‧《我的HEHE室友》曾獲提名角逐「2018香港電視大獎 — 網絡劇獎」,最後更成為「金遙控」得主。    

最新消息