小城故事

電影角色要怎樣才會給觀眾留下深刻印象？浮誇外表？色彩絢爛？作為電影創作關鍵部份，塑造角色形象任務落在特效化妝及造型設計師身上，但實際創作時如何帶出表現力和感染力呢？今次請來參與過多部荷里活電影及電視角色人物製作，來自日本的電影特效化妝及角色造型雕塑家片桐裕司（Hiroshi Katagiri），將製作現場工作思路歷程大公開！ 崇尚電影角色設計 隻身勇闖荷里活 片桐裕司自少喜歡動漫和美國電影，特別是恐怖電影。在他13歲時，無意間在書店中發現一本有關特效化妝的書，他就下定決心要去美國學習，立志成為電影特效化妝師，創作角色造型。片桐裕司明白在電影世界中，充滿魅力的角色人物往往能夠第一時間吸引觀眾注目，是向觀眾傳遞信息的重要途徑，因此電影界非常重視角色造型製作。「人們看電影或作品時，角色造型會直接影響觀感，假若做得不好，就會影響觀眾投入度，變相不會享受劇情。」在18歲高中畢業後，片桐裕司隻身遠赴美國，學習粘土雕刻技術。後來他加入知名特效化妝工作室「Stan Winston Studios」擔任造形師，累積經驗。當時曾參與《A．I》、《侏羅紀公園３》、《時光機器》等眾多電影作品角色創作。現時為角色造型雕塑家及導演，繼續在荷里活及不同地方從事各種不同藝術製作。 ●18歲高中畢業後，片桐裕司隻身遠赴美國，學習粘土雕刻技術。後來他加入知名特效化妝工作室「Stan Winston Studios」擔任主要造形師，累積經驗。（被訪者提供圖片） ●要塑造一個又一個經典角色，不論是人物、怪人、怪獸、機器人，每個都要有獨特之處。雖有看似非常困難，不過片桐裕司有一套人物設計法則。 角色人物設計法則 要塑造一個又一個經典角色，不論是人物、怪人、怪獸、機器人，每個都要有獨特之處。雖然看似非常困難，不過片桐裕司有一套人物設計法則。「角色人物設計最重要因素就是了解生物肢體結構，能夠理解就可以大幅提升角色人物設計效率，同時加強角色魅力。例如利用各種姿勢動作，從而表現出角色人物真實感。」只要能夠掌握設計法則，就可以讓整個設計過程更有效率，最長時間也只需時約6個月就能從設計到完成人物塑造工作。 ●特效化妝師會利用陶坭捏出或雕出角色造型雛形。（被訪者提供圖片） 不能單憑想像 醉心研習解剖學 別以為特效化妝及造型師的工作只需要專注設計出電影角色造型，片桐裕司表示了解劇本內容是前期工作重要一環。「要令角色形象深入民心，需要很多元素結合。除角色細膩造型和特徵外，角色登場方式以及導演拍攝手法都會有所影響，所以我們會向導演了解整個故事後，才開始構思外型。」 接下來的階段，特效化妝師會利用陶坭捏出或雕出角色造型雛形。「有時只需製作小型雕塑便可，但亦會因應導演要求，整出1:1實際大小。」有些角色需要演員配合試身，為減少溝通誤會，片桐裕司會與導演確認心中所想。「特效化妝師和造型師較了解實際人物整體造型，可與導演互相協調，同時抓緊製作時間，避免變動而延遲完成。」 為追求更高階的造型雕刻製作水準，達至栩栩如生，片桐裕司還進一步研習解剖學，深入了解人體結構。「好多時候大家覺得角色融入奇幻元素，其實都要憑空想像出來。但不論真實生物還是幻獸，很多時觀眾會將眼前角色與現實比較。要讓觀眾投入電影之中，信服有這種生物或角色存在，就必須回歸到掌握生物的骨骼、肌理、毛髮膚質和姿態。」 ●片桐裕司認為，要讓觀眾投入電影之中，信服有這種生物或角色存在，就必須回歸到掌握生物的骨骼、肌理、毛髮膚質和姿態。（被訪者提供圖片） 「落手做」才是王道 靠著細膩藝術技巧電影角色創造與眾不同的造型效果，片桐裕司獲得不少好評。在荷里活奮鬥近30年，他認為這份工作有趣之餘，也非常特別。「在電影業中，造型雕刻這個部份讓他覺得十分快樂，有時更像一班喜歡著怪獸的大小孩一樣在玩耍。」近年，片桐裕司專注於傳授雕塑技巧，學生不乏有藝術工作者，更多是對行業有興趣的年輕人。「如果希望從事角色造型設計工作，我建議要自己親手製作作品，因為單純喜歡設計並不足夠，而是必須享受創作過程，真正落手實行才可。」他認為角色造型師要具備熱情，以一顆純粹的心，專注於製作上。「能力不是最重要，而是自己對這個愛好有多投入。」片桐裕司希望每個人都能夠放膽實踐自己的夢想，享受自己喜歡的工作，毋忘初心，方得始終。 ● 片桐裕司主要代表作品非常多，例如《環太平洋》、《超人：鋼鐵英雄》等等。而他最喜愛《加勒比海盗－神鬼奇航4：幽靈海》中的美人魚。（被訪者提供圖片） ●片桐裕司教授雕塑課程，不分技巧程度與職業，能夠運用在不同領域及工作上。（被訪者提供圖片）  

https://www.youtube.com/watch?v=Msm5dTLMWNw 唔少香港人都係一隻無腳既雀仔，一放假就想去轉旅行散散心。旅遊達人袁學謙(Benedict)更將旅遊成為佢嘅職業，帶住航拍機四圍享受世界。近年更擔任「離地自由行」節目主持，帶領攝製隊踏足歐洲、非洲、俄羅斯。想法多蘿蘿嘅佢貫徹自己「大膽嘗試」宗旨，開設茶飲店「+-x茶」，實行進軍飲食界，連「飲食才俊」都做埋！不過佢就話表面風光，背後辛酸，究竟點解去旅行都覺得係苦差？ 豪遊世界 非洲一啲都唔落後 諗返起當年無錢，或者想體驗下在地生活，捱麵包住Hostel「窮遊」絕對係首選。不過Benedict自家製作嘅旅遊節目《離地自由行》，竟然一反常態，以豪食豪住豪玩做賣點。Benedict帶觀眾飛到東非、德國和俄羅斯，自己都有好深體會。「人大咗唔能夠7點起身趕去景點，反而想花多少少，Book間靚酒店好好Relax下。而家我專攻豪遊路線，觀眾一諗起去嘆世界要搵資料，就會諗起我同個節目。」Benedict笑言做完節目後，重新認識很多地方，當中最有趣必定要數到非洲。佢話非洲唔單止唔落後，而且係好多人豪遊都會揀非洲，例如高級酒店更要2,000美元一晚；熱氣球都要幾千港元搭一次等等。不過非洲天氣變幻莫測，日間可能有30多度，但晚間只有4度，打破好多人以外非洲 = 酷熱嘅傳統想法。不過能夠在熱氣球一睹動物大遷徙，以及飽覽無盡漫天星空，呢啲畫面的確一生難忘。不過Benedict笑指當地原居民話佢地日日都望到，唔明點解都市人要俾咁多錢嚟睇，果然每個城市嘅人都係咁！ ‧非洲都可以豪遊，一晚酒店隨時幾千蚊美金㗎！ 全職旅人好易做？ 唔好睇Benedict成日坐頭等艙周遊列國，全職旅人一啲都唔易做，背後好多辛酸只有自己知。「大家可能以為拍節目，幕後有哂Writer、搵料、傾Sponsor，錯！其實全部都係我一個人做哂。」Benedict認為好難靠旅遊KOL維生，所以要主動搵多啲收入來源。當成為《離地自由行》主持後，坊間對佢認識多咗，自然獲得更多工作機會。「本身我有做司儀同Marketing工作，偶然都會拍廣告，一般都同旅遊有關。一個Job大約$20000 - 50000都有，視乎駛唔駛出Trip啦！」佢坦言自己一人身兼四職，幾乎不眠不休工作，咁先可以賺到第一筆資金，俾佢成為創業老闆開設茶飲店。 ‧Benedict無諗過非洲都可以好凍，打破好多人對非洲嘅傳統思維。 創立本土茶飲品牌 大玩實驗風格 喺世界旅遊咁耐，點都會有啲特別收獲，Benedict甚至搵到佢嘅創業契機。有次佢喺倫敦行市集，試到一隻抺茶覺得好特別，無諗過日本以外都可以喝到咁正宗嘅抺茶，於是膽粗粗聯絡創辦人，試下拎個代理返香港，結果大家一拍即合，就成為「Matchaeologist抹茶主義」。拎到代理權之後，Benedict即刻萌生其他生意念頭。「呢隻抹茶粉除咗直接飲用，仲可以用嚟烘培，如果拎嚟做自創茶飲都得喎！」 有咗Idea之後，Benedict身體力行，與兩名朋友合共投資約100萬元，幾個月前喺上環開設「Teaculation ＋−×茶」。不過創業期間都遇到唔少問題，例如選址、請人、研發產品等等，佢坦言唔係錢可以解決，好彩三個Partner各司其職，先可以順利。「香港市場大部份茶飲都來自台灣，一般已經有既定formula，但我地作為『本地薑』品牌，有好大自主性，所以我地嘗試玩多d花樣，突破傳統框框。」 而家＋−×茶三大熱賣飲品係宇治抹茶拿鐵、焦糖旺鳳梨氣泡茶、草莓鮮乳沙冰，佢地更會不時搞搞新意思，例如金沙鹹蛋鮮乳沙冰同最新手作蕨餅抹茶拿鐵，聽落去怪怪地，飲唔飲得㗎？但飲落去又幾好味，呢啲就係小店獨有嘅彈性。 Benedict更有意將＋−×茶發展特許經營，嚟緊仲計劃反攻茶飲最盛行嘅台灣，首間海外分店預計喺年底在台北西門町面世，同時打算進軍東南亞。「其實東南亞茶飲需求仲大過香港，但我地可能會微調口味，例如泰國要甜啲、果味重啲，所以必需要清楚佢地市場口味。」 打四份工好瘋狂？ 走過萬千遍野，Benedict原來仲未去過南美洲，但佢媽咪去過，佢就好想跟隨媽咪嘅步伐，去認識呢個遙遠國度。佢認為人生就如馬拉松，過程係辛苦，但一日唔放棄，成功就會來臨。「我宜家打緊4份工，每日訓得4-5個鐘，犧牲好多娛樂時間，可能好多人會覺得好瘋狂，但可以試唔同嘅野。雖然好辛苦，但今時今日嘅成績的確係靠咁樣逼出嚟，所以大家唔好放棄，好快就會成功。」 ‧ 「本地薑」茶飲唔駛咁公式化，可以玩多啲，推出更多市面少見嘅飲品。 ‧Teaculation...

https://youtu.be/GWyx2u22keI 某年大台改革晚間新聞時段，提早至11時播放，往後幾年間都係由方健儀擔任主播。望住Akina正氣凜然同嚴肅外表，仲不知不覺間成為佢嘅Fans，睇埋先肯訓覺。不過自從Akina講完「多謝支持，後會有期」之後，離開大台七年後嘅今日，已經變成一位多才多藝嘅Slashie，即係大家講嘅自由工作者。今日坐喺鏡頭前笑臉迎人，而且演技大爆發，實在同大眾腦海嘅印象完全唔同。究竟真實而且性格搞笑多變嘅方健儀，點樣形容自己嘅Slashie人生？ ‧坊間對方健儀仍然停留喺大台年代，足足要花咗幾個月時間擺脫固有形象。 方健儀 ＝ 悶、嚴肅？ Akina離開大台之後，曾經喺廉政公署擔任高級新聞主任，佢認為自己離開ICAC前一刻，仍然係一個追求穩定嘅人。「本身人工唔係低，但見到愈嚟愈多人跳出Comfort Zone，不如俾一年時間自己，放假又好，挑戰人生都好，就咁走上Slashie呢條路。」不過唔好以為有人氣就好易接Job，坊間對Akina嘅印象仍然停留喺大台年代，嚴肅、正經、唔笑、悶等等嘅形容詞彷彿同佢劃上等號，令到好多客人都唔夠膽搵佢。佢認為唯一解決方法就係咩Job都接，甚至唔要面自薦去信電台做主持，呢個過程足足花咗幾個月時間。「好彩大家反應都好好，把握多啲機會就令自己個人3D咗，俾人知道真正嘅方健儀係一個咩人，大家先放心搵我。」 兩句對白拍足八個鐘 自從方健儀成為Slasher之後，唔單止司儀、公關培訓班、電台、專欄可以成日見到佢，連唱歌拍戲都撈埋，問到最鍾意做邊樣，佢就覺得司儀係最有挑戰。「做司儀練稿時間唔多，有時可能要背一大段字同人名，仲有好多突發場面，只可以靠自己當場執生，成功過關又好有滿足感。」至於拍戲就令佢又尷尬又難忘。「拍《寒戰II》明明得兩句對白，以前做新聞十秒讀完，點知竟然要拍八個鐘，仲要同影帝梁家輝做對手戲，我個樣表面睇上去好自信，實際就騰騰震。」不過多得呢次蝦碌經驗，令佢之後再接拍短劇、電影都更有信心，最近更為政府拍宣傳片，將搞鬼幽默嘅一面呈現出嚟。「呢個先係真正嘅我！」 ‧Akina話睇返《寒戰II》嘅自己都會笑，所以俾5分僅僅合格啦！ 皮革賺得少但有成功感 不過Akina最初嘅Slash大計仲諗住做埋皮革，甚至不時將作品放喺專頁賣。「我問師傅可唔可以幫手教班，師傅都以為我講笑，去到我辭職後就真係幫佢地手，教年輕人整散紙包、卡片套。」佢都曾經參加過手作市集，通宵達旦?皮、揼釘，雖然最後只係賺一、兩千蚊，但對好珍惜一手一腳用針線用心機賺返嚟嘅錢，呢種快樂唔係返工俾到佢。近排佢仲整咗啲AirPods皮套，如果大家有興趣不妨搵佢落單啦！ ‧Akina認為做Slash要面皮厚，仲要好好訂立目標，唔好要求太高。 唔好將目標Set得太高 以前做主播頻頻出鏡，對之後做Slashie有幫助？方健儀認為唔一定，不過佢認為以前做記者嘅性格，有利佢應對唔同場合。「做Slash最緊要面皮厚，多啲自薦同Sell自己，俾人『食檸檬』好正常，唔得嘅咪下一次。另外啱啱出嚟果陣，預咗期望要大幅降低，甚至set到原本收入一半，達到目標咪慢慢再加上去，否則希望愈大失望愈大。」另外多啲出席唔同場合，唔好淨係影相打卡，要多啲交換卡片傾下計建立網絡。世界上無免費午餐，所有成果都要靠自己爭取，Akina認為有想做嘅事，就唔好諗咁多，行出第一步先知個世界係點樣。「人生係有旋轉門，試過唔啱咪返嚟，究竟人生係康莊大道定係驚險小徑，其實都係你自己決定。」 ‧唔試過又點知唔得？所以無論幾多歲，想做就做，唔好諗太多。

https://www.youtube.com/watch?v=mnPxt2VKRiY 一提起荃灣，大家除咗諗到「天空之城」之外，都會知道區內有好多好嘢食。不過美食又點會俾你咁易搵到？香車街熟食市場呢個名可能比較陌生，但一講「老闆娘」呢三個字，可能大家都有啲印象。一座無冷氣嘅熟食市場，日頭人流唔多，但唯獨老闆娘雲南米線門口人山人海，究竟有咩秘密，可以令一眾食客等到身水身汗，都要食到呢碗米線？「老闆娘老闆」李傑生五個字點出真相：「抵食夾大件！」 ‧湯底同炸醬係「老闆娘」致勝之道，而且小鍋米線一定要逐鍋煮，咁先夠入味。 招牌炸雞大到嚇親你！ 抵食夾大件講就容易，但又有幾多間可以做到？李傑生開舖近十年，笑言第一次食老闆娘雲南米線的話，佢地嘅招牌炸雞同炸豬扒一定會嚇親大家。對佢而言，關鍵就係抵食夾大件。「三大舊新鮮炸雞真係落足料，出面其他人用半塊雞，我咪用足一塊，話哂係招牌，賺少啲唔緊要啦，最緊要食得開心同記得我地。」除咗炸雞，佢地自創湯底亦係另一個重點，除咗秘製麻辣湯底，仲有孜然味濃嘅蒙古湯同埋甚少見嘅蟲草花湯，再加埋雲南風味炸醬，所有食物都係即叫即煮，而且仲特登調較辣度，適合香港人口味，五十蚊就可以食到，實在難得。 做得雲南小鍋米線，一定要逐鍋煮，上碟時間一定會比較長，而且成本都會高。小編走入廚房重地探秘，喺三四十度無冷氣嘅環境做嘢，仲要對住幾個火爐煮米線，個個都真係「真漢子」。李傑生笑指以前客人幫襯要睇緣份：「因為員工真係頂唔順，所以夏天會放暑假，而家已經勤力咗，夏天淨係開夜市，未有Facebook專頁之前，大家成日話要撞彩，嚟到睇下開唔開，就算開都可能好多人排隊。」兩個鐘訪問期間，門口真係不斷有人等，冬天仲要等足一個鐘先有得食，果條人龍坐滿成條走廊。不過受歡迎背後，李傑生坦言做雲南米線成本唔低。「我地營業時間唔算好長，就算開半日但伙記都要出足糧，加上而家請人唔容易，後生仔唔太想入行，所以廚房樓面都缺人，我辛苦啲冇所謂，希望同員工一齊繼續做落去。」 ‧咩叫價廉物美？三大舊招牌炸雞同各種特色湯底應該就係最佳例子。 「街市先係我嘅根」 如果係多年擁躉，應該都會記得「老闆娘」回歸街市之前，曾經有段時間搬到地舖，但對李傑生同一眾員工而言反而做得仲辛苦。「地舖舖租貴投資大，而且我地出餐時間長，好難控制成本。果陣一齊嘅Partner唔係做呢行，可能以為俾錢就實賺，結果最後拆夥，我就唔諗地舖啦！」佢指每日可以賣300-400碗米線，雖然呢個數字對比大集團嚟講只係好少，但可以睇得出佢地對每一碗米線都落足功夫，亦都因為咁而儲到好多熟客。「試過兩次搬舖，有諗過抖返段長時間，但好多熟客都問我幾時再開返舖，又話好掛住炸雞同魚肉春卷。無計，街市先係我嘅根。」 經歷過高低起跌，李傑生認為成功之道就係要做好出品，無其他捷徑。「要長期做落去，寧願賺少啲都要慢工出細貨，要維持質素係好難，但要成功就要有耐性。另外不時都要俾客人有驚喜，例如我地新推出麻辣胡椒湯底，咁樣佢地咪唔會咁易食厭一樣嘢。」呢位「廚房大佬」直言唔會開分店，因為投資額太大，而且唔能夠控制食物質素。作為隱世喺熟食市場頂樓嘅小店，未必需要通街廣告，但將最好嘅食物留俾再辛苦都要嚟幫襯嘅知音人，睇到捧場客食到津津有味嘅笑容，對呢位「老闆娘」嚟講，比一切都嚟得重要。 ‧「老闆娘老闆」李傑生坦言街市係佢嘅根，加上好多熟客支持，經歷兩次搬舖，最終都選擇回歸原址。

https://www.youtube.com/watch?v=uXWGL5Wn5vU 近年同志劇集愈嚟愈多，早前日劇《大叔的愛》更紅遍亞洲，而泰國、內地和台灣「BL劇」同樣深受歡迎。後來問hehe朋友有冇香港本土出品嘅同性戀劇集，原來由「四仔工作室」製作嘅網絡處境喜劇《我的HEHE室友》，深受同志們歡迎。雖然冇大卡士演員坐陣，但勝在搞笑貼地，成功吸納「腐女」同埋同性小眾追睇。今次請嚟「四仔工作室」團隊，了解一下到底點樣憑呢套網劇贏盡觀眾口碑。 唔好諗錯隔離，「四仔工作室」同大家諗嘅「四仔」無關，只係由四個男仔組成。「初初成立個陣好興『Running Man』呢類遊戲Show，所以我地開咗個系列叫『四仔有限挑戰』。不過出嚟反應一般，拍咗一排之後覺得係時候要結束。」正當打算「收山」，Pat心血來潮決定挑戰自己，嘗試拍網劇。「反正都係最後一次拍攝，不如盡地一鋪，拍自己一直以來都最鍾意嘅嘢，就係處境喜劇啦。」《我的HEHE室友》故事講述同性戀者鍾夕與「直男」雷達係相識廿幾年嘅絕世「巴打」，長大後成為同居室友，除咗性取向唔同之外，兩人生活習慣都差天共地，結果發生唔少笑話。 ‧四仔工作室最初由四位男仔組成，後來加入女成員「格仔」，仲有句口號「四仔有格仔」！ 「HEHE」唔一定係「乸型」！ 拍劇集當然唔少得題材同劇本，呢部份全由主角之一 - 飾演鍾夕嘅阿Pat負責。雖然近年社會對同性戀嘅觀感已經開放咗好多，但其實咁多年黎都冇完全以同性戀為核心題材嘅香港劇集，而《我的HEHE室友》唔單止開創先河，仲可以拍到咁寫實貼地，完全係因為Pat「做返自己」，以同性戀者第一身創作。「美國有套好成功嘅sitcom劇集叫『Will & Grace』，係一個男同志同女性Best friend一齊住嘅故事。我本身都係一個HEHE，對呢類材好有興趣，當時就諗：『香港可唔可以拍返套呢？』所以就即管試下拍。」 以往主流媒體出品嘅劇集，同性戀角色好多時離唔開講嘢陰聲細氣、造型同手勢好女性化，甚至連角色名都令觀眾定型「同志＝乸型」，但《我的HEHE室友》中兩位主角完全巔覆主流既定印象。「直男雷達好婆媽同斤斤計較，鍾意儲印花；但鍾夕就比較麻甩，男性化少少，生活習慣上比較污糟隨性，同傳統想象嘅HEHE有好大分別。」Pat解釋因為以往角色，令好多人對男同性戀者有刻板印象，所以希望透過網劇，撕走同志身上唔應該存在嘅標籤。「香港社會成日好Sterotype HEHE呢樣野，先入為主覺得Gay就一定係女性化、好淫蕩、好鍾意周圍勾引男人，但現實並唔係咁樣。」Pat筆下角色形象一改傳統，創作出一個貼近現實嘅「HEHE」角色，自然令大家鍾意及討好，第一季拍足廿幾集，愈嚟愈受大眾歡迎。 ‧四位都希望透過《我的HEHE室友》，唔再定型同志 ＝ 攣呢個刻版印象。 小眾劇集帶來大影響 雖然香港作為國際化城市，但對同性戀議題就異常保守，「四仔工作室」喺拍攝《我的HEHE室友》時都曾經遇上阻滯。「我地有一集要搵課室拍攝，最初有間學校都話OK，但後來知道我地拍攝嘅主題，就因為佢地嘅宗教背景同各種原因，最後都拒絕我地。」雖然團隊感到無奈，但佢地仍然覺得自己做緊嘅事好有意義，更冇諗過一套咁小眾嘅劇集，可以為觀眾帶嚟正能量甚至有行動。「有一集講啊夕好多年冇同屋企人聯絡，新年心血來潮打電話俾屋企人拜年。點知有個住喺外國嘅觀眾喺YouTube留言，話睇完呢集之後就即刻打電話返香港，同佢屋企人拜年傾計。短短一句話就令我地覺得好感動，原來我真係可以影響到人。」 要改變社會風氣同埋意識形態唔容易，最直接就係透過媒體影響，但點先可以吸引到觀眾長期收睇？幾位成員都笑笑口，話拍劇梗係要去到盡。「你會喺節目內出現Kiss、打X機等等，初時大家都會對鏡頭敏感，但呢啲都係真實大家會做嘅嘢，愈寫實愈平常嘅嘢，大家先有同感，慢慢落去大家就習慣。」Pat認為要喺「市場需要」同「忠於自己」之間取得平衡。「如果呢樣嘢唔係自己鍾意，只係為咗取悅觀眾同迎合市場嘅話，個團火好難維持落去；但如果淨係掛住拍自己鍾意嘅野，冇考慮觀眾又未必會成功同有動力。」Pat希望《我的HEHE室友》可以盡一點力，為香港嘅同志發聲，令社會更關注性小眾議題，亦希望同志們可以更加放膽去愛。「只要遇上合適嘅人，其實性別就已經唔係限制。」   ‧《我的HEHE室友》劇內有唔少大膽鏡頭，但Pat認為唔去盡，觀眾唔會感受到個種真實感。 ‧《我的HEHE室友》曾獲提名角逐「2018香港電視大獎...

https://youtu.be/ar1-arlzGbs 減肥係女人嘅終身事業，講就容易，點樣做先有效都係一大學問。近年瑜伽瘦身深受大眾歡迎，一提到瑜伽就自然諗起林芊妤（Coffee），除咗擁有人皆羡之嘅完美身形，佢亦經常喺Youtube同Instagram教人做瑜伽同分享keep fit、湊B心得。究竟呢位炙手可熱嘅瑜珈導師，點樣一步步得到大家喜愛及認同呢？對佢嚟講，一切都係「經驗」。 瘦就係靚已經Out啦！ 以往香港社會一向流行「瘦先至靚」風氣，不過Coffee認為唔少女士嘅心態上已經轉變，傾向追求健康自然美。「好多女仔用唔同方法節食，覺得變到一條柴咁先覺得好。但近呢幾年運動風氣好好，大家都係想追求健與美。」時下女性興做瑜伽，減肥操肌之餘，又可紓緩壓力同保持心境開朗。「由3歲到80歲，瑜珈都係拉筋同保健。慢慢甚至可以放鬆心情，舒援工作疲勞和壓力，改善精神和心情。。」 ‧瑜伽無分年紀，反而愈少運動和筋硬嘅人更應該做，幫身體拉筋。 星級導師的堅持 Coffee教學課程非常受歡迎，有不少名人紅星都會跟佢上堂。市場需求咁大，全因有自信同用心教學，注重安全。「我係一個好注意安全嘅老師，希望教佢地正確瑜伽知識，以後無論喺出面參加Group Class，定係上網睇片跟住做都唔會整親。另一方面我會不停push佢地進步，希望佢地學完之後繼續練習，唔會擺低一排之後打回原形。」Coffee希望透過自己努力，感染他人。 問到Coffee覺得教學經驗定沙紙重要，佢坦言經驗比資格更重要，最重要係教學時有自信。「我上堂個陣要考齊牌照同訓練足夠，所以教學生時好有信心，好似中醫睇症咁，即刻知道佢身體有咩毛病。但坊間將上課同訓練時間縮短，就算考到個牌都冇信心落場，所以經驗比資格更重要。」從教學中，Coffee得到前所未有嘅滿足感。「有個學生上完堂，同我講背部同膝蓋疼症改善左，我覺得好開心，因為健康永遠都比身形外表更重要。」 女士共同目標：瘦身、瘦腰、瘦大腿 每個女生都渴望擁有「零贅肉」完美身形，Coffee深明觀眾需要，就係要夠快、有效，所以拍片主攻大家感興趣嘅題目，現時YouTube Channel已經有接近80萬人訂閱。「香港人鍾意目標為本，瘦身、小蠁腰、瘦大腿、瘦手臂都係好受歡迎嘅關鍵字，再加埋『速成』、『快速見效』呢啲字眼，好多女仔就會睇住嚟練習。」Coffee一般會喺星期六下午兩點左右出片，另外亦會喺Instagram上開live，一邊教大家做運動，一邊同粉絲傾下計，keep住曝光率。「其實有好多人問我點解拍片教人咁蝕底，冇收錢架喎！其實我從來都冇諗過呢樣嘢，因為一開頭純粹想將我識嘅嘢同人分享，呢件係一件好好嘅事，有咁多Followers同subscribers係錦上添花，都要多謝大家支持。」 ‧Coffee認為教學經驗較重要，因為一睇學員就知道身體有咩毛病，從而針對改善問題。 ‧Coffee YouTube頻道有近80萬訂閱者，深明女士們追求嘅關鍵。 事業型變成家庭優先 Coffee今年忙於照顧啱啱出世嘅小朋友，雖然仍會出Post拍片，但要調整工作同生活模式。「最大犧牲當然係自己嘅睡眠時間，優先照顧小朋友；而拍片時就可能突然聽到小朋友喊或者爬入嚟鏡頭，會用多咗時間，係辛苦咗但都開心嘅。」 或者有人會認為Coffee未夠完美，網絡平台有時也會有人批評或提出各樣意見，但Coffee面對壓力時，仍保持源源不絕嘅正能量。「好多時都係自己鑽牛角尖，我會調節自己諗法，如果唔係有心做錯，其實毋須太擔心。冇人係完美，要學識面對真實嘅自己，唔好將自己睇得太高。」Coffee認為要取得成功，就要忍受人生挫折。「人生從來唔會一帆風順，但每個逆境都係我地學習嘅好機會。」瑜伽唔只為Coffee帶嚟完美身段，更磨練出堅強意志心態，俾她睇得更多，走得更遠。 ‧Coffee認為唔好將自己睇得太高，要學識面對真實嘅自己，並且從逆境學習。  

https://youtu.be/FkqRkYT1v4s 望住日本鐵道圖，99%香港人都會睇到頭痛，用放大鏡都搵唔到要搭邊條線。但對於鐵道迷嚟講，佢地醉心研究路線、車輛、時刻表，覺得火車唔止交通工具般簡單，更係旅程中重要一環。呢股驚人鐵道迷風潮，連香港人都被吸引，Johnny Li亦係「落坑」份子之一。火車究竟有乜咁特別？呢次就由呢位「鐵路達人」帶大家領略日本鐵路魅力吧！ 「鍾意火車最開心幫到大家」 男人似乎對車情有獨鍾，Johnny揀火車全因佢屋企對住港鐵車廠，日日睇住地鐵出出入入，對佢嚟講係「世界奇觀」。以前俾人知道自己對某種交通工具，可能會被恥笑「死毒L」、「宅男」。不過Johnny一於唔理，任由大家叫佢「鐵道迷」、「鐵膠」，除咗已經聽慣之外，佢知道愈嚟愈多人會搵佢解決困難，原來係有「利用價值」。「以前有親戚覺得我個興趣好奇怪，不過當佢地去到東京大阪蕩失路，急call搵我救命，自此唔敢睇少我，哈哈！」Johnny自己都覺得幾安慰，研究一樣嘢十幾年，再活用知識幫大家Plan行程搵路，已經唔係興趣咁簡單，係一門專業，試問又有幾多人有咁嘅耐性？ ‧Johnny覺得鐵道迷唔係「毒L」，自己開心又幫到人，「唔識路咪又係打俾我求救」，佢又講得啱喎！ 每次去到日本，大家為去食好嘢狂買藥妝，但Johnny就選擇鐵道旅行，到訪偏郊車站及鐵路博物館成為必去行程。「我可以坐喺個無人嘅車站幾個鐘，乜都唔理淨係望住個大海，有火車經過就影相，不知幾舒服。乜旅行唔係應該咁樣架咩？」不過要數最瘋狂一次，就係Johnny和朋友特登飛東京留兩日，為咗睇一個喺上野限定開放嘅荒廢車站，Johnny坦言好慶幸自己能夠親身到訪。「出發前幾日先決定買機票，好純粹咁因為車站荒廢近二十年，開放次數絕無僅有，連網上都只係得好少相同影片，真係好難得。如果今次唔去，呢世都未必有機會。」 ‧Johnny走訪不同特別小站，其中北海道的北舟岡站眼前海景，令佢非常難忘。 ‧Johnny鍾意結合火車與海，因為香港睇唔到呢啲景色。 開Page聚腳吹水 Johnny正職係媒體攝影師，研究日本火車十年有多，佢兩年前喺Facebook成立專頁「Johnny鉄道撮影札記」，記錄各種千辛萬苦旅程。「還掂我啲相放喺硬碟，都係得個擺字，不如分享俾大家睇下不一樣嘅日本，同埋自己嘅第一身探險體驗。」雖然去嘅地方同景點唔主流，但反而吸引唔少鐵道迷同鍾意深度遊嘅人。「香港好多人講日本，但無咩專頁會深度講日本鐵道同鐵道旅遊，呢個平台就變成大家聚腳地。有讀者PM我，睇完我嘅文章，下次旅行去咗果個地方，對我嚟講係好大鼓舞。」 ‧兩年前開設「Johnny鉄道撮影札記」，將Hard Disk大量相片分享俾讀者，成功吸引一班固定觀眾，反應好好。 「鐵人」必去朝聖推介 鐵道旅日方便快捷，但望住路路線圖密密麻麻，車站啲名咁複雜，Johnny坦言都試過搭錯車。「唔敢講自己識哂每個站每條線，但大家問到嘅通常都識。」講到佢私伙推薦景點，一定係「日本三大最美無人車站」嘅四國下灘站，亦是他人生第一個鐵道旅行目標。「下灘站係海邊小站，車站無職員得個小月台，但眼前就係無盡嘅大海，睇日落真係世界級！同時呢度經常被JR揀做青春18車票海報拍攝地，當年去四國真係為咗去下灘架咋。」 ‧下灘站係Johnny私伙推介地點，雖然列車班次少，但可以無障礙咁欣賞絕美日落。 體驗在地文化最佳方式 鐵道與生活息息相關，Johnny要揀一啲影相靚位，有時經過住宅區工廠區，完全感受當地人在地生活，以及鐵路嘅深厚感情。「有一次喺新宿送別一架行埋當日就退役嘅火車，好多人嚟到都唔捨得，唔少小朋友喺度喊，職員同大家合照，證明鐵道喺日本人心中，已經唔係交通工具，香港一定冇可能做到。」Johnny認為旅程就算因各種意外無法完美結束，但當中一定有值得回憶同驚喜嘅地方，亦是佢堅持鐵道旅行嘅原因。 ‧對Johnny嚟講，鐵道唔係單純交通工具，更加係體驗在地文化最好方式。

https://www.youtube.com/watch?v=g1ktpcIo1ig 提起Cocktail，第一時間就會想到吸睛的外型和味道層次豐富，讓人驚喜無限，調酒師就是賦予每杯Cocktail魅力的靈魂人物。雖然Cocktail Bar近年才漸見盛行，但入行已近十年的調酒師Shelley Tai希望打破外界標籤，讓大家明白調酒師不單要熟知巧妙運用調酒技巧，還要懂得跟客人的相處技巧，絕對是一門專業。 ● Shelley入行十載，因一杯「Last Word」使她覺得Cocktail不只賣醉，還可以欣賞和品嚐。 吧檯工作更具挑戰 Shelley和很多人一樣，日間只是普通上班族，但晚上就走進酒吧做侍應，很快就發現文職不適合自己。「我好怕悶，唔想日日都重覆做同樣工作，我想有多啲變化。」不諳調酒的她毅然辭職，在餐廳水吧從低做起，後來輾轉到不同夜場和酒吧，現在來到Quinary。當大家下班後到酒吧輕鬆消遣，Shelley才開始一日工作，儘管工作時間日夜顛倒，她仍然樂在其中。「每日返工，做到第二朝。有時送酒嚟仲要搬搬抬抬，體力勞動好大，對女仔嚟講會辛苦啲，但學到好多實用嘅調酒技巧，能夠學以致用，並創作出屬於自己的雞尾酒其實都係一件令我嚮往嘅事情。」 調酒師係專業嚟！ 每個調酒師必定有一杯影響他們的Cocktail，「Last Word」讓Shelley重新認識Cocktail價值。「因為『Last Word』比較Classic，我發現Cocktail唔一定俾人賣醉，而係可以用嚟欣賞同品嚐。」大多Cocktail以外觀花巧吸引客人，但Shelley認為味道同樣重要。「Cocktail嘅設計的確會令客人飲落開心啲，甚至令本身唔飲酒嘅人願意嘗試，但味道唔好就點講都冇用，所以要兼顧外觀同味道。」Shelley會從生活細節發掘創作靈感，不斷調較新口味，希望為味蕾和視覺帶來驚喜。「好似『玉冰燒』係用中國米酒為基調，再配上5種唔同香料嘅芝士條，一杯酒就可以喺味覺上經歷不同變化，幾有趣啊！」 在外國，調酒是一種專業。不過Shelley說若想在香港成為調酒師，也並非想像般困難。「其實學調酒唔難，就好似廚師煮野食咁跟住食譜，跟返份量就可以調到酒，宜家好多地方都肯俾機會新人嘗試。」但是除了掌握好基本知識，調酒師更需要懂得與客人相處之道，以及實戰經驗。要精通這門學問，Shelley平日亦會多看與酒歷史和知識相關書籍，希望透過調酒帶出每杯酒的獨有故事。當有機會去到國外旅行或比賽時，她亦常常到訪當地酒吧。「同當地人溝通可以了解好多當地文化同有咩特色食材，成日都會激發我創作靈感。」 ●Shelley坦言香港調酒界入行不難，但要變得專業就要從低做起和不斷學習。 ●Shelley認為調酒師是專業，因為不單要調配酒品，還要了解客人需要選擇合適Cocktail，絕對需要時間磨練。 調酒師唔止調酒 客人隻身坐在吧檯前，邊喝酒邊向Bartender傾訴心聲的電影情節，對Shelley來說絕不陌生。與客人聊天也是Shelley工作一部分，她很享受聆聽客人訴說故事。「調酒師工作唔係整一杯飲品咁簡單，仲要諗埋客人嘅情緒。我經常主動同佢哋傾計，睇下佢哋諗咩煩緊咩。」Shelley更會邀請客人做「白老鼠」，嘗試新調製雞尾酒，希望客人「酒後吐真言」。 「有時我會預備啲未出街或者設計緊嘅Cocktail俾熟客試，聽下有咩意見。而家佢哋會主動話想試，表達自己想法俾我知，不過有時真係會直接講好難飲。」Shelley認為調酒師與客人之間有對話與互動，才算一個完整的雞尾酒體驗。「每日可以見到唔同嘅人，講唔同話題，然後調製一杯適合嘅Cocktail，呢樣係做調酒師最特別嘅地方。」 Cocktail改變Shelley人生，若果要用一種cocktail形容自己，她認為也許是杯經典Old Fashioned，感覺簡單，經得起考驗，最重要「我鍾意！」入行至今已經十個年頭，未來仍想在調酒行業發展下去。「除咗調酒工作，我嚟緊會代表香港參加一個國際調酒大賽。每個調酒師嘅配方都各有唔同，所以同一款雞尾酒，味道不會一樣。希望可以做更多嘗試，令到我調製既酒可以耳目一新！」 ●Cocktail除了外型要吸引，味道都是重要一環，雙劍合壁才能受歡迎。 ●憑著堅持和努力，Shelley在Diageo World...

https://youtu.be/bCceUWBjmjA 到底水果應該點揀先叫靚？香港麻雀又點打？就算和生活息息相關，可能大家未必知道它的來源和正確做法。網上免費學習平台「Beginneros」透過教學片段，把書籍不會特別記載的冷知識及技能，透過社交平台分享。從而希望喺知識型社會裡面，男女老幼都享有平等學習機會。 題材貼地實用 由淺入深照顧每一位觀眾 或者養貓、製作PowerPoint、煲湯只係普通常識，但對於零經驗嘅人嚟講，有時真係無從入手。Beginneros成員Leo表示平台正為一班初學者而設，在唔同範疇尋找導師，將課程拆開數集，由淺入深教學及分享經驗，每段片唔會太長，方便觀眾吸收知識。「知識唔一定局限喺學術上，如手工藝、砌模型，呢啲唔太起眼但又實用嘅技能同興趣，都可以喺Beginneros學到。」 Beginneros已經有超過 70 個影片課程，題材多樣有趣，當中包括烹飪、手工藝品製作、攝影課程、甚至連打牌、打呔技巧都有。「我地事前花好多時間同導師研究，點樣拍同講啲咩，希望讀者喺有限時間內袋到最多知識。」另一位成員豪仔認為部份知識及技能唔會記載喺一般書籍，團隊就要發掘「滄海遺珠」納入課程之中。「例如揀生果咁，其實坊間好少會有專人去教，所以我地專門做咗呢個course，反應其實比預期中好。」成員主張就算偏門知識，同樣可以與他人分享，促進交流，填補自身不足。「透過知識連繫唔同嘅人，呢個先係我地想做到嘅目標。」 ‧左起為Kelly、豪仔及Leo，他們皆認為每日一篇冷知識「易入口」，更受觀眾歡迎。 ‧豪仔坦言現時平台未有太多收入方式，導師亦是免費協助，但未來會多作營銷及嘗試推出收費課程。 儘管題材百變，但並非每種題材都適合拍攝教學片。Leo指Beginneros設有導師自薦功能，希望分享自己所知俾讀者。團隊非常歡迎呢種做法，認為係同其他人互動交流好方法。不過要確保他們對題材非常熟悉同教授嘅知識都準確，若團隊認為自身知識不足，未必能「Fact-Check」內容真偽時，他們就會婉拒對方。「曾經有人自薦教大家睇通勝，雖然我地同意通勝內容包含好多知識，但唔係每個人都相信，而且包含部份個人見解，所以最後都係婉拒左果位導師。」 冷知識易入口 反應更好 除咗拍攝教學片外，Beginneros團隊希望用一個相對有趣味而且快速方式引起觀眾求知慾，所以每日分享各種「冷知識」。冷知識內容更貼地更生活化，除咗圖片外仲會以動畫呈現，務求簡潔清楚解答各種生活疑問。「部份觀眾覺得影片內容太認真，未必會花太多時間睇哂。但冷知識內容大家可能聽過，但從來冇了解過到底係點樣嚟，例如係太古廣場前身係咩、點解最初東京唔係日本首都等等。我地將冷知識重新包裝之後，大家可能用30秒至1分鐘就會睇哂，然後留言討論，就係我地想做嘅嘢。」Beginneros團隊更將冷知識集結成書，走入學校和實體社區，擴闊接觸層面。 經過4年發展，Beginneros至今已經係一個八人團隊，由拍攝、後製到營銷、出版，每個人都各司其職。豪仔非常重視與導師溝通同課程質素，所以喺影片設計同製作上都花足心機。「我地同導師討論點樣由淺入深導入主題，同埋希望佢地可以用最簡單嘅方式教授知識，所以一般都要寫好一個完整劇本或者講稿。」每個課程至少花一整天拍攝，再加上後期剪接製作，一輯3-4集教學影片需時近半個月先完成。「我地大家都係抽工餘時間拍攝，但盡量希望keep住製作水準，慢慢喺錯誤中學習，希望觀眾會睇得開心。」 ‧Beginneros在IG平台擁有近13萬粉絲，YouTube部份片段亦超過十萬Views。 ‧平台不時找來KOL或藝人拍攝，憑他們影響力再宣傳到不同界別觀眾。（YouTube截圖） 從「分享知識」到「共享知識」 而家平台不時會有廣告商贊助拍攝，亦會搵KOL或藝人擔任主持，運用佢地本身影響力宣傳Beginneros。現時Beginneros官方Instagram帳戶有超過13萬人追蹤，平均每篇帖文都有幾千人讚好，自然係一大鼓舞。不過免費影片學習同冷知識分享，所有設計同製作需要花費好多時間心血，大多數成員有正職，營運方面確實有難度。「我地唔係Fulltime去做，唯有利用有限資源同時間做到最大效果。呢度最初想免費分享知識，當時冇諗太多賺錢方式。不過如果有導師認為佢嘅知識係值錢而酌量收費的話，我地都會考慮。但自家製作嘅影片，觀眾仍然可以繼續免費收看。」Beginneros希望唔止單方面分享知識，亦想推廣「知識共享」理念。「嚟緊會設立一個開放式知識平台，每個人都可以提問，其他人又可以解答問題，真真正正做到知識共享。」學習知識擴闊眼界，亦能填補自身認知不足，其實只要每個人願意無私分享知識，相信就係令社會進步嘅最好方法。

https://www.youtube.com/watch?v=zd8jM2pYjEE 今時今日好多藝人都會搞小生意，很多人以為藝人衣食無憂，輕輕鬆鬆就能賺大錢，但鄧洢玲（阿旦）則笑言「有苦自己知」。從模特兒出道，曾在電視台主持節目，到兩年前成為按摩店老闆娘及自由身藝人，阿旦相信自己的表現會得到大家認同，以行動證明給大家知道，她不只靠外貌，還懂得用頭腦和自家努力，建立一門自己建立按摩店事業。 ● 按摩店選址銅鑼灣站上蓋，阿旦希望在鬧市營造環境寧靜舒適的按摩店，方便客人前來享受按摩，放鬆心神。 創業是一場更難打的硬仗  將興趣變成事業是很多人的夢想，阿旦初出道已經很喜歡按摩，所以初次創業順理成章開按摩店。「雖然平時對住人嘻嘻哈哈、好活潑咁，但私底下有時會比較沉靜，又有唔開心嘅時候，所以做運動之外，我都會去按摩揼骨釋放壓力同疲勞。」阿旦兩年前決定與朋友合資，更豪擲120萬港元，在銅鑼灣開設精品按摩店Blossom Secret Garden，提供頭部、足部、手部及全身按摩，亦有淋巴排毒及磁叉經絡按摩等服務。阿旦以秘密花園作為按摩店的設計靈感，希望客人可以短暫逃離煩囂，放鬆心情。由藝人搖身一變做按摩店老闆，阿旦坦言創業過程令她戰戰競競，亦有很多意想不到的狀況，令投資成本超出原先預算。「我地兩個（投資者）諗住少過100萬，但裝修設計要符合消防安全條例，又要喺Facebook、IG落廣告宣傳等等，呢啲都係意料之外要比錢嘅項目，而且個數唔係細。」 正所謂「創業難，守業更難」，按摩店在開業初期曾經歷過「淡季」，令阿旦一度非常彷徨。「我地在年頭開業，2月份天氣比較凍，客人唔想除衫做全身按摩，所以好少人嚟，個時真係好擔心舖頭生意。」阿旦說既然已經下定決心開店，就要做好服務質素，建立良好口碑，穩定客源。「我相信只要keep住一套system做得好，啲客人就會返轉頭再幫襯，而佢地又會再介紹其他人嚟，自然就儲落一班熟客，再加埋VIP制度，以前可能一個月嚟一次，而家可能一個月嚟兩三次。」由按摩店選址、裝修設計、試按摩師手勢，到糖水或花茶種類，阿旦都會親力親為挑選。「我地希望全面照顧客人，令佢地享受按摩，得到真正嘅放鬆。」 ● Elaine堅持為客人提供糖水、湯水或花茶，讓客人得到最全面而貼心的服務。 ● 阿旦指開業成本約120-140萬元，比預期中預算稍為超支。 《晚吹》唔可以齋「吹」？ 模特兒出身的阿旦，因加入ViuTV接拍真人騷節目《G-1格鬥會》，以及主持清談節目《晚吹—啪啪聲，太好聽》公開說「性」話題而知名度大增。問到節目只是「吹水」般簡單？阿旦笑說節目背後要下很多苦工。「我怕自己dead air冇野講，所以要用好多時間做資料搜集，盡量用資訊同資料去避免尷尬情況出現。」她認為包括自己在內，香港人思想仍然偏向保守，所以她說自己有心理壓力，不過很快便想通。「作為專業藝人，我需要有能力以正面、專業態度面對不同類型節目。」難得香港有一個前衛開放的清談節目，所以更要盡力為觀眾提供正確性知識。阿旦努力工作，結果不但沒有被定型，反而更吸納一班女粉絲。「曾經有個女仔在Facebook同我講：『好彩有呢個節目！』所以都好慶幸可以幫到大家。」 不要限制自己 無論幕前演出還是創業生涯，阿旦都全力以赴，現時按摩店業績穩步上揚，阿旦趁機開拓新業務，務求多元化發展。「按摩店已經開咗兩年，覺得係時候計劃在別區開設分店，另外快將推出按摩精油產品，等顧客按摩完之後，可以提供多啲周邊產品。」阿旦深信力不到不為財，更希望令生意更上一層樓。「雖然會有好多事情要處理，但辛苦完之後，抖擻精神，第二日又可以再衝過！」 ● 腳部按摩前會為客人免費提供10分鐘牛奶足浴，滋潤肌膚及令肌膚更有彈性。(被訪者提供圖片） ● 阿旦現時為自由身藝人，自由度和收入都比簽約電視台好。(被訪者提供圖片）