小城故事

https://youtu.be/t0QY-5iSXas 今時今日做歌手很難，做廣東歌歌手更難，陳慧敏(慧敏哥)還要奔波港澳兩地，雖然辛苦，但她笑言「自己鍾意，值得嘅」。從大型唱片公司轉到獨立歌手身份，在無瓦遮頭的日子，凡事都要自己管理，但可以自由選擇想合作的音樂人，藉住交流急速成長。不過慧敏哥認為這並不足夠，她決定出走100日，用旅行尋找真正自我，雖然途中曾面對錢財和性命危險，但回想起來便覺得是上天提醒她凡事要堅強和勇敢，才可以安然無恙回家，和音樂生涯不謀而合。「我寧願食少啲，都想做啲自己鍾意同嚮往嘅作品，咁先開心架嘛！」 ‧ 慧敏哥坦言做音樂成本很高，但只要是喜歡或覺得有價值的，就應該即管嘗試。 唱片成本數以十萬計 「唔係YouTube聽幾次歌就得」 廣東歌市場愈見狹窄不能賺錢，早已不早新聞，但仍有很多人願意繼續出歌，無非都是愛與夢想。慧敏哥從香港大型唱片公司轉到澳門唱片公司，近年更開公司成為獨立歌手，自由度大大增加。「以前會有人幫你安排一切，而家就要自己負責，不過我覺得係好事嘅。不過我覺得以前嘅經驗，對而家一腳踢好有幫助。」慧敏哥坦言現今不可能單純唱歌，一定要發掘更多技能，例如做幕後音響控制；自己剪輯有份拍的廣告片等等，然而做音樂凡事都是錢，資金不足只好放慢製作新歌速度，「增值」自己尋找更多收入來源。「做一隻專輯八隻歌，就算有自己嘅創作，好便宜咁計都可能要40萬，唔係喺YouTube聽好多次就可以Cover到。」 ‧ 就算連同自己創作曲詞，一張碟成本都要數以十萬計，對獨立歌手來說絕不容易負擔。 不過慧敏哥依然堅持出歌做碟，不單是想藉歌曲抒發自己或對城市的感受，更是和音樂人交流成長的過程。在年初發佈的新歌《莫名哀傷》，邀得周國賢作曲，小克填詞，她表示是人生收過最艱深的一份歌詞。「小克嘅歌詞蘊含好多哲學思想同個人情感，五個字有五十個意思，但消化完歌詞你就會明白咩叫真正嘅『哀傷』，真係會得著好多同埋趣味所在。」坊間對此曲讚不絕口，她覺得歌曲本身就是有價值的藝術品，但每個人心中對它的價值都不同，亦未必能紅遍天下。不過她認為只要自己喜歡的音樂，希望可以創造價值的事，都值得放手一試。就算最後回報不如預期，但過程中一定會有可歌可泣的故事值得回味和學習。 https://www.youtube.com/watch?v=E4diyD0RJI0 ‧ 周國賢和小克合力炮製的《莫名哀傷》，慧敏哥坦言是入行以來最難閱讀的歌詞。 旅活100日 與死神擦身而過 上年適逢自立門戶開公司，甚麼都要自己做的時候，慧敏哥才發現不夠熟悉自己，於是決定出走一百日，尋求外界衝擊和自我對話，順道一圓少時夢想。好多人都覺得長時間旅活很美好，但事實卻非如此般美好，她從少到大對埃及很有憧憬，可說是「Dream City」，但去到時才感覺不如預期所想。「埃及嘅生活節奏好急速，無車停俾你過馬路，次次都好怕魂斷此地，再加上太多事發生，離開時真係有啲失落。」除了埃及，她又試過在巴基斯坦遇到騙子，但她堅持不付錢，更大膽和騙子說一不就放我走，一不就死在這裡，最終真是被她的氣場震攝，再加上Hostel職員協助成功逃離。事後她也笑言當時不知哪兒來的膽量，但她更加深切體會到，女子獨遊一定要給人一個強悍的形象，以及不好就範付錢，否則受害者只會更多。 ‧ 旅活一百日令慧敏哥學懂要堅持不就範，以及要給人一個強悍的形象。(陳慧敏FB專頁圖片) ‧ 縱然旅途上有不快，但慧敏哥依然覺得得著很多，甚至很想再一次旅活。「可能下次就由埃及開始！」(陳慧敏FB專頁圖片) 話雖如此，旅行總有美麗與哀愁，慧敏哥走到巴基斯坦北部城市Passu，她形容當地大自然景色比新西蘭更壯麗；另外伊朗人都很友善和親切，而且真的說到做到。「喺伊朗遇到動亂，無上網無飛機成個星期，大家喺Hostel反璞歸真咁傾計、唱歌、煮飯、捉棋，反而成為旅程最開心嘅回憶之一。」有想去的地方，就會有想回來的地方，慧敏哥返來澳門後，當下就覺得物價水平差太遠，治療腳傷都要幾百元，但幾百元已經可以在巴基斯坦生活一個月，但經歷過洗澡、三餐甚至生命都未必穩定的時候，反而會更加珍惜生活在大都市以及擁有一切。 疫情之下工作大減，慧敏哥覺得有讓自己寫歌、反思人生的機會，最希望可以繼續出歌和舉辦音樂會。另外她亦在澳門參與舞台劇及電影，若疫情放緩的話，預計年底就會上演。正如前文提到歌手已經不可以單靠唱歌維持生計，但勇於跳出舒適圈圓自己心底的夢，抱著一試無妨的心態，隨時會收到不錯效果，不單是慧敏哥，所有人也是。 ‧...

https://youtu.be/Hr5RCEd5d9k 曾經有被訪者和編者講過一句話「好多嘢唔敢做係因為冇人踢你一腳，走出去先發現其實冇想像中咁難。」辭職講就講得多，仲要去環遊世界，聽落好離地，但有冇諗過點解冇做過？旅遊專欄作家查花（Chary）面對工作不快，決心喺30歲之前裸辭，揹住Backpack走遍六大洲同埋好多未知國度，就算成個行程用咗527日同花咗十幾萬，但佢覺得當中嘅遭遇、不同地方嘅人物故事、仲有世界萬千景色，呢份收穫嘅價值已經遠遠唔止十幾萬。究竟流浪在外嘅生活係點？點樣慳錢？點靠一個Backpack過哂四季？今次就等查花親身同大家分享呢一年心路歷程啦！ ‧ 查花花了527日環遊六大洲，但自言仍有很多地方意猶未盡。 探索未知國度  尋找「赤子之心」 好多鍾意旅行嘅人都不甘於朝9晚6嘅工作環境，加上辦公室政治氛圍，令查花覺得工作同佢初衷愈走愈遠。而且有咗第一次獨遊澳洲經驗後，佢更希望30歲前遊歷七大洲，於是決心辭去NGO社企工作，踏上五百多日，橫跨2018 - 2020年嘅超長旅程，從俄羅斯到中東，再到南美秘魯馬丘比丘都有佢嘅足跡。女仔獨個兒流浪在外無依無靠，然而正正因為冇人同你傾計，你會更加留意周邊嘅人同景物，例如可能識到同行者會搭順風車，會被當地人邀請去佢地屋企食飯，呢啲都係一般五日、七日旅行唔會體驗到。佢曾經走入一啲未被國際承認嘅國家，例如位於非洲嘅索馬里蘭，儘管佢嘅知名度好低，遊客極少，但當地人卻是世界數一數二友善同熱情。「果度嘅人生活好簡單，只係想大家開心就足夠，例如行行下街會有司機會停低，拉低車窗純粹問你今日過成點﹖呢種赤子之心係無辦法喺任何一個國家搵到。」 ‧ 到訪索馬里蘭後，她發現很多人連離開國家都很困難，香港人能夠環遊世界實在很幸福。 查花笑言旅活外地超過一年，佢好驚訝原來好多人都識香港。「幾乎每次都被外國人問︰究竟香港人點睇佢地？」查花憶起一次在俄羅斯，剛巧遇到電視台採訪，反而令到佢擔心會傷害佢地民族自尊心。「其實俄羅斯同好多國家一樣，未去過嘅人會覺得佢地好冷漠，係『戰鬥民族』，但真係相處落嚟時係非常熱情，個個當你家人而令你唔想離開。」不論身處俄羅斯，抑或經常被傳媒為危險國度嘅土耳其東部，大家油然自生果種恐懼，只係基於無好好了解過果個地方。當你去到嘅時候，自然搵到有人情味同自己喜歡嘅一面。 ‧ 五百多日旅程收穫豐富，左上方來自馬達加斯加的「孤獨棋」，更吸引不少朋友請求代購。 零下40度苦等一個鐘巴士 編者同樣熱愛旅行和攝影，睇住查花喺俄羅斯貝加爾湖冰天雪地嘅靚相，就知道背後其實藏著好多逾越生死嘅關頭嘅故事。「當時因為接我去貝加爾湖嘅司機甩底，結果我要冒住零下40度企喺一個冇樓冇室內地方嘅郊區一個幾鐘，好驚好徬徨，不斷問路過嘅車有冇多一個位俾我去，幾經辛苦先搵到一架車車我去貝加爾湖。」好多人覺得環遊世界好爽，但佢坦言途中都有好多難忘經歷，有時為咗慳錢要露營，又試過因為撞車幾乎命喪異地。不過最終成功喺30歲完成目標，再辛苦再危險都值得，至少為人生刻上不能磨滅嘅難忘回憶。「我仲有好多地方未去，或者去得唔夠，例如印度、斯里蘭卡等等，既然人生有限，何不走出去見識更多世界嘅美態﹖」 ‧ 查花很喜歡收集海報，由訊息和繪畫手法都彷彿紀錄著一個時代變遷。 最好嘅計劃就係無計劃 527日嘅長旅程，令查花學識最好嘅計劃就係唔計劃，因為計劃永遠趕不上充滿意外嘅現實。既然無計劃就不如好好認識當時身處嘅地方，了解周圍人民嘅故事。「我覺得呢個世界有千千萬萬種生活方式，透過同當地人傾計，你會發現生活以至生命都有好多可能性。」正因為查花喺Facebook同Blog寫過好多細膩嘅人物故事，亦無咩人分享過不存在國度嘅見聞，反而感動到出版商邀請佢，將兩年旅活的經歷結集成書，成為《那些陪我走過世界的故事》。佢覺得陪佢走過咁耐嘅，唔止旅途見到嘅風景同人，仲有一直堅持下去嘅信仰。「戴頭巾係唔想啲汗滴落去塊面同件衫，都代表旅程好熱好辛苦，後嚟就變咗一種信仰，勉勵自己發生咩事都一定解決到，放棄的話，之前辛苦走來嘅路都會白白浪費。」好好記住一路走過來嘅原因，自然有走下去嘅動力。 ‧ 查花覺得問清楚自己「點解當初決定走呢條路」，先有堅持完成旅程的信念。

https://youtu.be/ksUSmsrV7Oc 我們對香港這片土地有多熟悉？科技發展確是令生活更方便，但人和城市之間關係變得疏遠。走過城市時只顧望手機畫面，忽略各樣揉合嶺南文化同西式建築和風景，結果漸漸消逝或變成廢墟而無人知曉。不過近年有很多有心人如Hiuman一樣，希望將城市故事和建築美學，從頹垣敗瓦中重現眼前。她更開設專頁「香港遺美」，用文字和相片分享香港各處被遺忘之角落，讓大家知道香港不單是金融中心，更希望抬頭凝望這座城市時，依然是多元而美麗的香港。 ‧Hiuman指大家很易會忽略城市變遷，失去時才醒覺已經太遲。 紀錄就是一場時間競賽 雖然香港摩天大樓林立，但不少建築物依然看到英殖時期至今，建築風格甚至生活模式變化。「以九龍醫院為例，當時華人未必完全接受西方建築風格和醫療技術，所以興建時會加入中式設計如樓頂瓦片、遊廊等等，實用之餘亦不失美觀。」Hiuman指香港建築已成為歷史載體，新一代香港人可透過它們，了解百年來本地文化如何發展到今時今日。不過香港寸金尺土，舊建築只要未達法定古蹟標準，依然很大機會敵不過時間巨輪而被拆卸，使探索舊建築變成一場時間競賽。「深水埗、九龍城、上環呢啲地方較早發展，舊建築亦會較多，但近年舊區更新速度好快，拍攝同記錄都愈嚟愈難。」與其經常撲空，Hiuman覺得不如改變心態，放下手機多留意城市細節，或會從居住多年的城市中，發現更多意想不到之處。 ·若想探索城市舊建築，切忌破壞一磚一物，帶走相片和回憶已經足夠。 保育唔止戀舊 更應新舊並存 我們經常都說：不要失去時才知它的可貴，探索城市也一樣道理，最好方法就是拍攝記錄。Hiuman曾經到訪太子一家已結業的醫館，邊拆卸邊拍攝，僅有半小時時間，連全貌都無法拍下。她慨歎醫館是昔日上學必經路段，為甚麼一直都無為它記錄呢？在博物館不願接收文物下，見證著各種歷史物件匆匆被遷拆而消失，才是她最遺憾一刻。然而香港政府在保育政策方面非常被動，因為很多建築物屬私有產權，保育與否仍取決於業主。「好多人覺得大館喺保育後變得商業化，但現實地諗保育成本其實好大。與其冇意義咁丟空喺度，將佢發展都係好事。我覺得重點唔係懷舊，而係新舊並存，係好有潛力嘅商機。」觀乎外國如軍艦島、德國集中營等地，將保育結合商業元素，從而打響城市知名度，甚至賺取可觀收入。Hiuman認為長遠可多舉辦文化導賞團，讓本地及外國人都能欣賞香港獨特城市景觀。 ‧圖中醫館拆卸後，醫館老闆的女兒感謝她留下倩影，這都是金錢買不到的滿足感。 ‧很多讀者沒想到電影《食神》經典場景依然存在，彷彿讓大家重新認識香港一樣。 「好多香港人未見過呢個香港！」 Hiuman自稱「城市漫遊者」，喜歡無目的遊走城內，尋找不一樣的香港。但獨樂樂不如眾樂樂，她決定在Facebook開設專頁，取名「香港遺美」以記錄被遺忘的唯美事物。她指相片和文字缺一不可，因為兩者有互相補足作用，而專頁讀者多為年輕人，尤其女性為主。她很驚訝經常收到留言，指專頁帶他們看到香港未知一面。這反令Hiuman更覺得要負起一點點責任，將香港的「美」送給讀者，希望大家擁有一雙發掘城市的眼睛。「近年大家成日講移民，我想留低佢地，香港係我地架嘛！咁靚嘅地方，我真係好唔捨得離開......」香港人每日營營役役，不妨停留半分鐘仰望周遭，感受過城市味道。其實，香港真的很美。 ‧Hiuman認為保育不只戀舊，更新舊並存及加入商業元素，才有「續航能力」。 記者：Agnes Au 攝影 / 剪接：KH Li

https://youtu.be/SmXdHQAsBNA 「勞力是無止境」這句寫得好中，想做自己有興趣嘅嘢的確唔易。現時本地創業難，投身夕陽行業創業更難，偏偏有人肯冒這麼大風險，幾年前進軍鐘錶業。EONIQ創辦人之一Quinn Lai坦言唔易，但本地鐘錶曾喺全世界享負盛名，應該俾更多香港人體驗呢門精密工藝。創業之路經歷社運、經濟不穩、疫情，好多公司面臨委縮甚至結業，但Quinn無氣餒，反而認為有危就有機。「呢度做唔到咪轉個方法做，例如整手工錶可以擴闊本地市場，其實一定係有得做。」今次就同大家一齊整錶，了解佢地嘅營商心得。 ・EONIQ首創1對1手工錶體驗工作坊，配件、Logo甚至錶針都可以完全自訂。 網購量不如預期 轉打Offline市場 近年冒起唔少主打年輕人嘅鐘錶品牌，由EONIQ產品以美金訂價已經知道，佢地主打海外同網絡市場，再利用個人化模式，製作獨一無二手錶作生招牌。不過情況反而不如預期。「東南亞網購未算發達；加上電競市場急速崛起；另外喺劍橋分析(Cambridge Analytica)盜取Facebook個人資料事件爆發後，網絡宣傳難咗幾倍，加上香港個散播率特別慢，都係我地2014年冇預計過。」 雖然錶帶供應商依然叫佢地唔好再做，不過Quinn同另外兩位創辦人Charles同Jacky都認為，既然入咗鐘錶業呢個坑，不如擴展埋線下實體市場。佢地首創1對1手工錶體驗工作坊，咁啱興起一股本地手作、工藝潮，反而受到年輕人歡迎。工作坊嘅成功令三人都迷戀鐘錶工藝，甚至背負住「香港製造」嘅責任，錢同價值未必係最重要嘅事。 ・Quinn認為線上利潤較實體市場高，但佢地享受整錶同埋溝通，係咪賺大錢未必係最重要嘅事。 講原創但俾人抄橋點算？ 時下創業，好多嘢都講原創、DIY，但要做到百分百原創，似乎又唔係想像咁易。Jacky坦言品牌創業一年後，已經發現內地展銷會出現疑似抄襲品牌。「不論風格、錶款、網站設計，點會咁啱又係三個人，甚至連創辦故事都幾乎一模一樣。」儘管佢認為完全抄襲唔道德，但事實根本就冇得避，與其係咁不如做好自己品牌。「以前大學教授講過，外面有好嘅Idea但你唔借嚟用係你唔啱，關鍵係有冇將個概念Value-add，有競爭一定會有得益。」Quinn覺得EONIQ擁有SEO排首名的優勢，就算多咗客人要訂製手錶，上網搵資料或者格價時都會搵到佢地，觸及率高咗反而對佢地嚟講係好事。 ・主力產品設計嘅Jacky覺得抄襲無法避免，與其糾纏不如發掘更多方向發展。 眾籌創業要計清楚「CAC」 EONIQ創業時喺網上集資近百萬港元，第一批資金主要用作買貨及海外宣傳之用，但Quinn指「再一次」唔幸運，俾咗十萬搵美國PR公司幫手宣傳，但美國唔會保證會有幾多媒體報導，結果臨出街就俾特朗普嘅新聞蓋過，十萬港幣倒哂落海。結果三個人要重新計算搵一個新客人所花費嘅成本，亦即係Customer Acquisition Cost。「我地計過CAC佔成本30%係最適合，計埋入貨、租金、人工等等，扣扣埋埋可能得返10%利潤，隨時有意外要變負數虧蝕，所以要學習點樣網上營銷，點樣落廣告宣傳搵啱嘅市場。」畢竟鐘錶唔係日用品，Quinn認為搵到有能力回頭嘅客人，或者靠佢地推介出去，先係令公司長久經營下去嘅關鍵。 ・Charles坦言全自訂手錶可以有幾百萬個可能性，冇Plugin可以用就唯有靠自己摸索。 打著香港品牌旗號，遇上手工藝潮流，似乎一切都係喺最啱時間做最啱嘅事，但背後都遇過死Server、宣傳完無效等挫折。Charles勸勉新晉創業家唔好怕錯，試完出錯可能會啟發到新嘢，未必係壞事；Jacky就覺得參考唔同成功例子，再加入自家元素，創造新嘅風格同品牌，咁樣創業初期嘅時間同經濟壓力，都會比完全由零開始有效得多。 ・經歷過社運、疫情依然保持業績，三人都覺得關鍵就係要夠投入同了解市場狀況。

https://youtu.be/fvHO95P1o7Y 肺炎疫情之下，好多人嘅收入都有影響，連幕前演員同歌手都無一倖免，小肥同J.Arie 雷深如都笑言搵得一千得一千。不過難得多咗時間，佢地兩個早前開咗YouTube Channel「肥JLL」，實行拍「Seven」片做YouTuber同開Live大展歌喉，點知仲忙過平時生活。不過咁樣反而有意想不到收穫，發現好多人先覺得香港歌手唱Live係得㗎！究竟可以點樣喺日漸狹窄嘅廣東歌市場，獲得大家喜愛之餘，又搵到自己一片天？ ‧兩人開設「肥JLL」YouTube Channel，內容貫徹佢地「Seven」風格，仲吸引古天樂出手協助！ 拍片大爆「Seven」事！竟引起古天樂興趣 疫情令好多活動唔係延遲就取消，歌手生計都好受影響，J. Arie作為獨立歌手，無固定底薪，坦言有嘢就做，搵得一千得一千；小肥就好彩啲，因為簽嘅合約有固定月薪，但大家都不約而同話時間多咗，於是就將上年年尾已經想開Channel拍片嘅計劃正式出爐。「最怕係睇得太多Comment，咁樣反而會打擊信心，所以我地就想拍自己嘅嘢，一嚟題材冇限定，二嚟拍片都係Just for fun，夠Fun先會拍得開心。」佢地除咗分享平日打拳健身嘅搞笑事之外，仲拍片煮「地獄料理」送俾Fans，點知吸引到演藝人協會會長古天樂出手幫助，將佢地嘅「Seven」事推俾更多人知。「古會長好好人，佢同我地討論拍咩題材先適合，始終歌手形象都好重要，所以有啲玩得太盡嘅題材就要收斂一下，仲有會長千叮萬囑我地一定要唱歌！」為咗貫徹又搞笑又癲嘅風格。佢地仲搵咗填詞人梁栢堅，改篇《逼得竉物太緊》做《Switch得動物咁盞》，成功吸引網民注意。 ‧除咗《逼得竉物太緊》外，仲搵咗梁栢堅等填詞人改詞翻唱《Switch得動物咁盞》。 小肥：原來開Live好易提升人氣 有啲嘢真係唔做唔知咁好反應，小肥不忘古會長建議，閒時會開Live唱下歌，同粉絲互動，點知FB Page嘅Like數即刻破萬！「原來好多觀眾覺得香港歌手啲Live係唔得，可能偶爾佢地聽到我地啲Live係得㗎喎，咁就會去專頁聽埋其他作品。唉點解唔早啲開Live呢？」佢覺得要將自己掂嘅地方講俾更多人知，但歌手都係職業，演出亦要保持水準，咁先會做到個Brand出嚟。 J. Arie：寫到好歌俾人更滿足 作為唱作人，J....

https://youtu.be/IVe9DT4U1Tw 以前細個放學返屋企，做完功課有得玩吓玩具，對小朋友嚟講已經係一日最開心時光。90後嘅阿Yuen當年同好多女生一樣，夢想擁有一個美少女戰士專用嘅變身器。不過對玩具嘅熱愛並冇喺踏足社會後退卻，反而更想搵返呢股童年回憶。10年前阿Yuen開始搜羅各種魔法少女動畫周邊產品，仲喺Facebook開設「Yuen Yuen Toy 魔法少女日常」，將歡樂帶俾大家。訪問當日走入工作室，與其話係工作室，用魔法屋形容可能更加貼切。「工作室就係我嘅玩具房，入嚟之後就會唔記得所有煩惱！」望住阿Yuen玩玩具嘅神情，先知道擁有一顆童心，確係最快樂不過嘅事。 ●阿Yuen自細鍾意睇《美少女戰士》等魔法少女卡通。「主角又靚又識變身，仲會教訓壞人，宣揚愛與正義，覺得好吸引。」 長大後快樂愈走愈遠 工作室幾乎被一片粉紅色淹沒，當中佔大多嘅係經典動畫《美少女戰士》，從玩具向嘅變身器、攻擊棒、毛公仔；到糖果玩具、文具等日用品都係佢嘅收藏目標。雖然收藏品豐富，但原來阿Yuen都係近10年先踏上收藏之路，更成為佢嘅生活重心。「當年偶然行過深水埗嘅文具舖，見返細個時用過嘅嘢，勾返起好多童年回憶，於是決心搵返嚟儲。」後來阿Yuen甚至連當年見過但唔夠錢買，或者錯過入手機會嘅玩具都有收藏，希望重拾昔日嘅童年快樂，就算過程有幾辛苦，但獲得嘅快樂同滿足感卻係無價。「好似當我地長大左，擁有嘅野愈來愈多，但相對快樂就同我地就愈來愈遠，所以我就想借助玩具嘅分享，將快樂帶比大家。」 早前《美少女戰士》動畫推出25週年之際，推出各種復刻版玩具，雖然外型完美而且結構精密，但阿Yuen覺得還是當年嘅玩具多咗一份純真。「可能個時社會經濟唔算發達，玩具製造商用親民定價，務求可以帶比人最大快樂，糖果玩具就係最好例子，有得食又有得玩，重點係夠平，可以一次滿足晒幾個願望。反而復刻版太過完美，冇咗『玩具』嘅感覺。」正正就係簡單嘅小玩意，先至最能夠反映當年生活以至社會面貌。 ●25年來推出過嘅美少女戰士產品，種類多到匪夷所思，講得出嘅都可以有。近年還推出接近生活的化妝品和日常用品，繼續吸乾粉絲荷包。 難忘初次日本尋寶體驗 網絡世代之下，不論《美戰》或其他動漫周邊產品，入手變得好容易，甚至可能低價買到好嘢。阿Yuen除咗去實體舖尋寶之外，日本嘅「Yahoo! 拍賣」（簡稱日拍）及各大拍賣網站亦係佢成日流連嘅地方。「不過『日拍』畢竟喺海外而且可能語言不通，無辦法確保寄出時狀態，大家可能要睇下個價錢承唔承擔到風險。」佢建議新手可以喺本地網站熟習流程，溝通好再影埋相先寄或者當面交收。不過佢最難忘都係第一次去有「收藏家天堂」之名嘅中野Broadway，幾乎令佢銀包「血流成河」！「果陣去到見到成個櫥窗都係《美戰》，男朋友形容我係癲咗，成粒鐘點拉都唔肯走，又逐件影相睇價錢，日本人睇到我應該都嚇親。」不過買到心頭好嘅話，再辛苦再難搵都值得，喺佢收藏品之中最有價值嘅係「永恆攻擊棒」、「永恆聖杯」及「延長棒」，阿Yuen指因為三件玩具可以合體，當年嚟講好有Gimmick，但好難搵齊哂三件，所以而家市面上好稀有，可能要差唔多七、八千蚊港紙先買到，真正「千金難買心頭好」。 除此之外，為咗有得玩又有得收藏，阿Yuen曾經有「雙收」甚至「三收」習慣，代表買兩至三件同一款產品。「一件用嚟玩；一件用嚟儲；一件用嚟後備 ，可能有人會唔明白點解要咁做，但玩具本身唔係應該用嚟玩架咩？」不過因為地方所限，阿Yuen近年都調整心態減少呢種習慣。或者咁諗，希望更多人可以買到佢地，其實都未嘗唔係好事。 玩玩具要在意價值？ 好多人都會推介手上最貴嘅收藏品，但芸芸《美戰》產品之中，阿Yuen最鍾情反而係同自己細個有連繫嘅小物，包括一條唔起眼嘅香口膠同計數機。「其實愈平愈簡單嘅產品就愈難搵，好似呢條香口膠咁，好難先搵得返一條包裝咁完整嘅，所以買到個刻好興奮！」阿Yuen覺得儲玩具最重要儲得開心，唔需要太過在意到底保唔保值。「儲玩具本來係一個開心減壓過程，如果太過focus落個價錢度，令到自己心情波動，咁樣反而喪失初衷。所以買咗返黎就唔好後悔，好好enjoy，暫時忘記生活嘅煩惱啦。」 ●最多人收藏變身器玩具，因為收藏及升值能力夠高。不過對佢嚟講，最有意義嘅3樣收藏品係美少女戰士漫畫、兒時用過嘅計數機同香口膠。 ●以往有朋友質疑「咁大個人仲玩玩具」、「冇價值」，阿Yuen甚少在意他人目光，最重要可以忘記煩惱。 ●阿Yuen曾親身飛到日本參與當地限定活動，順道到中野尋寶。 ●阿Yuen曾經同朋友舉辦「MG魔法少女市集」，集合唔少經典少女動畫玩具及精品，吸引大家交流同回憶童年。

好多插畫家鍾意喺社交平台開Page分享作品，同時亦希望向大眾傳遞唔同訊息。乍看本地插畫家彌歌魚筆下人物圓潤大眼、俏皮可愛，如同日本少女漫畫般，卻從中展現社會唔同面貌，有對體制反抗；也不乏描述兩性關係之間平衡等等。佢希望透過每一筆，可以從討論漫畫延伸到表達內心感受，再昇華到希望對社會重要議題引起討論。 用畫筆為不同議題發聲 一般人覺得插畫是一種藝術，但自細鍾意畫畫嘅彌歌魚，認為插畫本身具有溝通和表達作用，所以喺中學時開始將自己感受結合畫作。「初時喺電視睇到一啲新聞，有感受想講，但又唔知點樣用言語講，咁不試下用畫畫方式直接表達出嚟。估唔到反應唔錯，而且大家會好理性討論，俾到一個渠道大家抒發，幫到自己又幫到人，絕對唔係單純用錢或者Like數滿足到。」 彌歌魚指畫插畫都係自己興趣，所以都唔會迫得太緊。「一星期大概作畫三至四次，每次2至4個鐘。如果有動畫要做，一日有36小時都唔夠！」佢嘅筆下題材多樣化，包括情緒、校園欺凌、性別平權和勵志等等，希望大家可以多啲關愛身邊嘅人。「曾經有一幅畫係講學生自殺潮，指岀教育系統及情緒嘅問題，看到唔少讀者關心同討論內容，從中獲得很大的支持和鼓勵。」 ● 在彌歌魚作品之下，不乏各種社會議題，佢覺得係一種使命感，希望大家關注。 ● 彌歌魚作品有時會係小動物嘅溫馨故事、搞笑圖文，也有連載漫畫故事。 「我只係做緊正確嘅事」 圖文創作嘅另一個特色，就是以政治時事梗引起廣泛迴響。彌歌魚從無畏懼大膽表態，勇於批判社會，也表明自己政治立場。「有時對某啲社會議題甚至政治立場，如果專頁有一定支持者，反而會多咗一種責任感同抱負，唔係要迫大家表明立場，但至少要俾人知道呢個社會發生緊咩事。」不過宣示政見後，彌歌魚坦言有唔少追隨專頁嘅粉絲Unlike，或者有人覺得唔應該喺呢度講政治，佢就好平淡而堅定地接受。「其實Facebook點都會有人Unlike，Instagram相對會好啲，但始終初初讀者唔係因為香港時事而follow我，未必個個都想睇。」尊重大家，本身就係創作者甚至大眾最應該有嘅品德。 不過，原來表態對自己插畫前途有影響，呢點讓彌歌魚覺得好意外。之前整過一個紙娃娃公仔機，可以俾大家製作自己想要嘅髮型、道具、背景，曾經網上好受歡迎，但自從表態之後不久就被下架。「雖然的確係好影響到我，話唔開心都一定係假，不過我覺得值得。」 ●彌歌魚曾在今年推出紙娃娃公仔機廣受歡迎，惜最終因政治因素被下架。 你所關心的，就是靈感來源 彌歌魚表示任何題材，只要自己想畫，或者大家又有興趣去探討嘅，都會喺佢部Ipad Pro嘅Procreate出現。「我會出多啲街睇多啲新聞，了解一下社會同身邊嘅人發生咩事。」佢希望自己可以繼續畫出唔同主題作品，同大家一同成長。「雖然內容同訊息都會一直變動，但鍾意畫畫嘅心情會一直持續，我發覺自己愈畫愈鍾意！」 ●彌歌魚現時仍為大學生，上年同朋友開左動畫媒體公司「甜椒工房」，身兼導演同動畫師，笑言「36個鐘都唔夠！」  

https://www.youtube.com/watch?v=l2apKwjxa0k 賽馬一直被視為男性主導，女生想進入這個近乎全男班圈子時，似乎非常困難和力不從心。蔣嘉琦(KK)為追尋策騎奔馳夢想，花更多力氣和時間訓練，以行動證明女騎師絕不比男騎師遜色，更寫下香港女騎師一日贏四場頭馬新紀錄，揚威海外。雖然這位香港史上贏馬最多的女騎師已經退役，但她仍希望以另一種方式，繼續延續與馬匹的緣分。 ‧KK曾一日贏得四場頭馬，打破香港女騎師紀錄。 騎師生活不如外界所想 說起走上騎師之路，KK形容爸爸是自己的伯樂。「我本身好鍾意動物，8、9歲個時試過騎馬，好鍾意！後來爸爸有日同我講馬會有個見習騎師招募計劃，問我有冇興趣，我就決定試下。」當時計劃大約20至25個學員名額，但報名人數就多達千人，可謂爭崩頭。KK順利通過面試，但刻苦訓練才是真正重頭戲，和她原先想像截然不同。見習騎師主力學習馬匹知識如馬房管理，每日凌晨4點就要起身。「每日要落馬房照顧馬匹，例如擦毛、沖涼同餵食，除咗跑馬兩日之外，每日生活都係咁。」聽上去既艱辛又枯燥乏味，但KK說最難捱是長期節食。「女騎師需要維持喺九十磅至一百零三磅才算合適，所以就算幾肚餓都好，都要忍住唔可以食嘢，好需要自制能力。」 香港騎師界向來都由男性作主導，KK卻指性別沒有太大影響，兩者發展機會是均等。「賽馬係唯一一項男女可以同場競爭既運動，身為女性就更加需要努力鍛練體能，先可以配合男性嘅作賽力量同體能。」其實不論男女，只要喜歡與動物接觸，對策騎有興趣，又不怕馬和艱辛訓練，都可以嘗試投身這行業。 ‧入行要求不算高，最重要不好怕馬就可以。 ●不少人羨慕騎師收入豐厚，KK笑言見習騎師只有約一萬元底薪再加獎金。 傷患中斷策騎事業  KK不諱言策騎生涯中，一日贏四場頭馬最難忘。「其實騎果四隻馬都唔係熱門，無諗到贏足四場。」作為賽馬場上稀有女將，加上優異成績，一度令KK成為賽馬界人氣王，風頭一時無兩。但就在事業發展順利時，KK卻受到傷患困擾。「一匹馬重千磅，我左手兩邊韌帶撕裂同骨膜炎，手指屈唔到又發唔到力，唔可以控制韁繩。」最終和家人商量後，最後決定在高峰時期退下來。儘管無法繼續征戰賽場，她仍表現豁達。「的確係好大轉變，但無得話可惜，有傷患在身其實都無得夾硬嚟，唯有靠自己move on。」 重新出發轉戰馬匹貿易 KK騎師生涯嚴格來說只有短短2年，但始終與馬匹結下10多年情緣，相當不捨。「我發現最鍾意都係馬，就算做唔到騎師，都可以做相關職位。」KK選擇留在馬圈，學習馬匹貿易知識，更不時飛到世界各地，出席馬匹拍賣會。「我宜家主力幫馬主物色好馬返香港比賽，一路做一路學習。」昔日在馬鞍上英姿颯颯，現時生活回歸平淡，KK認為在騎師生涯都對她做人處事影響深遠。「比賽好多時候都需要好快作出判斷，同時充滿各種變數，未到終點一刻都唔應該認輸。」 ●KK曾在杜拜及美國獲「最受歡迎人物」和「最佳女見習騎師」獎項。 ●KK認為做事要有自信，堅持做喜愛的事，不要後悔。

https://youtu.be/kkQPmteAZAY 每次經過「M字頭」快餐店都會聞到好香薯仔味，但細個屋企人要小編默書有九十五分先准去，所以好努力讀書。後來賺到第一份糧，唔係去買模型買衫，而係搵間好食嘅薯條店大吃一餐。唔單止小編，其實好多人都有呢種渴望，Facebook專頁「我係薯條控」版主薯毛毛感受一定最深，佢唔止鍾意食咁簡單，仲開Page品評過百間餐廳嘅薯條，為城市嘅薯條留下倩影。「薯條對好多人嚟講唔係主菜，結果專做薯條嘅舖好易執笠，點解我地唔可以視佢為正餐，品嘗一道薯條？」 ‧薯毛毛覺得薯條唔止可以做主菜，甚至應該用嚟品嘗。 鍾意食薯條 ＝ 小學雞？「整得好都唔易！」 同人講鍾意食薯條，可能好多人第一反應都會覺得「小學雞」，薯毛毛冇否認呢個講法，但要整得出色絕非易事。「咁平常嘅食物都整得好食，甚至有自己風格嘅話，其他主菜味道一定唔會差。」撇除快餐店薯條嘅刻板印象，而家食薯條嘅形式已經千變萬化，包裝零食嘅又有；酒吧佐酒小食嘅又有；甚至薯條專門店都有，可見呢個風氣愈嚟愈強。薯毛毛覺得香港餐廳嘅薯條都好有特色，例如用咸蛋炒、中式醬汁甚至麻婆豆腐味都有。但想「反璞歸真」感受薯條質素的話，北海道或者歐洲薯仔會有優勢，而且粗身薯條嘅薯仔成份都會高啲入味啲。薯毛毛喺香港食過過百間餐廳嘅薯條，又點會唔衝出海外？最難忘一定係比利時同荷蘭都有嘅Frites Atelier，歐洲薯仔喺米芝蓮三星大廚設計嘅薯條菜式下，薯毛毛認為不論醬汁、薯條質素、油份以至價錢嚟講都接近滿分。嗱，大家下次旅行識揀啦！ ‧Frites Atelier喺比利時同荷蘭都有分店，薯毛毛以接近滿分評價此店！ 寫食評要夠專先好睇 薯毛毛決定開Page之前都諗過度過，畢竟IG、Facebook寫食評嘅人真係多到數唔哂，但專講某種食物嘅人又唔算多。「三年前開Page都怕有冇人睇，可能係勾起大家嘅刺激，出嚟反應又出奇地好。」但佢覺得大家都係鍾意睇數字多過睇文字，要有固定讀者先可以長期寫落去，所以就設計出一套評分制度。「評薯條會分為份量及賣相、薯條質素、醬汁及調味同埋價錢，再整埋地圖方便搵食，咁樣大家就會有興趣睇同討論。」不過食評呢樣嘢好主觀，試過有讀者同佢嘅評價完全唔同，佢第一時間唔係堅持己見，而係去了解點解人哋會咁諗。「可以嘅咪再去食多次Fact Check下，同讀者交流話唔定會啟發到新嘢，甚至佢哋會推介小店叫你去試，絕對係好事嚟。」 ‧薯毛毛寫食評絕對係一絲不苟，仲試過唔滿意啲相再食多次，其實可能係想食薯條咋嘛！ 開Page係愛？定係責任？ 有人試過建議薯毛毛拍片甚至出書，佢都一一拒絕，因為搞Page終究係興趣，唔可以影響正職。不過佢覺得開Page嘅人，不知不覺間會多咗一份責任，已經唔係搵個地方出下相講下嘢咁簡單。「如果個Page唔係要搵錢嘅話，所以就唔覺太大壓力，當然完全無壓力就假嘅，例如有時諗應該點寫落去呢？不如寫下薯條周邊嘅嘢，例如啤酒、漢堡等等；相可唔可以影好啲？我試過唔滿意啲相，特登再食多次。提醒自己要保持文章嘅質素，未到最後一刻都仲有嘢改善，其實就係責任嚟。」 飲酒可以揀劈酒或者品酒，點解薯條唔可以用「品薯心態」？由茶餐廳到西餐、酒吧都會見到薯條蹤影，好食嘅薯條會令成餐飯昇華，但薯毛毛笑言薯條已經昇華同專頁甚至生命綑綁埋一齊，缺一不可。佢認為不論搞專頁，抑或製作薯條嘅餐廳都好，一定要做好自己嘅作品，保持質素同熱誠先會吸引到大家再返轉頭，甚至成為忠實擁躉。 ‧薯毛毛提大家，開Page又好整薯條又好，唔單止要有愛，仲要為讀者負責任。

https://www.youtube.com/watch?v=GeApcgSHSUk 唔同人可能對張子丰都有唔同印象，早前有追電視劇嘅話，就會知佢係演員；有留意廣東樂壇嘅，就會知佢係歌手，不過佢最想展示比大家睇嘅，係佢導演嘅身份。三十出頭就成立自己嘅製作公司，執導過MV、廣告甚至電影等等，合作嘅藝人來自五湖四海，能夠自編自導似乎係唔少行內人嘅夢想。不過對佢嚟講，其實打拼嘅背後都有唔少辛酸，但知道自己做緊嘅嘢都係向導演方向前進，而成功脫穎而出嘅關鍵就係一個字「Creativity」 - 創意。 ‧張子丰集演員、歌手、導演於一身，但一切都是為咗電影導演而走。 從周星馳到科幻片 再到拍MV拍戲 「細個冇咩娛樂，自然就係將周星馳電影煲完再煲。我諗電影圈內差唔多年紀嘅人，都一定係睇佢大。」張子丰劈頭就講咗對電影有著情意結嘅來源，佢佩服周星馳演古裝又得時裝又得，最重要都係創造力爆燈，可以諗到好多無人諗到嘅橋段。但由鍾意電影變成想入行拍電影，就要數到《Back to the Future》呢輯科幻片。「科幻片最正就係啲劇情現實睇唔到，所以我嘅作品好想俾觀眾脫離現實，又有觀能上嘅刺激，最終帶出想表達嘅訊息或者社會現實。」佢將呢個想法放入自己歌曲嘅MV裡面，例如《推銷員之死》MV有麥皮蟲滿佈喺佢塊面，《完美情人》MV充滿AI、未來感嘅場景，所以Fred先會堅持唱歌，因為可以透過歌曲同自導自演MV，講佢想講嘅嘢。 ‧張子丰嘅歌曲MV中，可以到處見到科幻場景，目的要俾觀眾睇到現實不可能嘅事。（完美情人MV截圖） 除咗自導自演MV，張子丰仲幫尹光拍過MV。佢笑言大家唔好停留喺《少理阿爸》果個年代，其實尹光又In又玩得。「呢行一定要與時並進，但同前輩好似尹光，合作時就算年齡有差距，但佢嘅想法可能同我地唔同，話唔定會發掘到好多可能性。」作為導演除咗要夠幻想力，仲要有好好嘅溝通能力，了解成個片場運作。但呢種技能喺佢做電視劇演員時，又可能要稍為轉變。「因為拍劇個畫面係導演嘅幻想，其他演員收到Order就擺十個Pose俾你睇，但我就會諗『乜我咁樣幻想唔好咩？』話雖如此，佢依然好尊重其他導演諗法。「咁樣自己做導演時，人地都會尊重返我。」 ‧張子丰認為做得呢行除咗要夠勸力，仲要夠醒同夠Creativity。 真係有興趣同捱得先好入行 隨住媒體同網絡盛行，愈嚟愈多人想入行，但偏偏呢行成日有開工冇收工。張子丰都表示無辦法，新人唔單止要醒頭醒尾，仲要肯搏肯捱。「公司每年都會收Intern，但有啲人嚟面試問佢點解想入嚟，佢地話要計學分，咁你梗係話鍾意呢行或者電影啦，係咪先？但就算入到嚟都可能要由最低做起，我自己曾經試過洗一個荒廢好多年嘅廁所。」雖然大家未必頂得順洗廁所，但可能要做啲好基本嘅野，例如打掃Office、做Admin嘢甚至買飯盒。不過佢就話千祈唔好因為工作咁瑣碎而求其做，因為導演、上司可能會留意佢地表情反應，究竟係開心咁做定黑住面咁做，所以可唔可以係呢行發展得順風順水，事業更上一層樓，就係睇呢啲細微位，大家識做啦！ ‧《潮神》MV唔單止尹光打破傳統形象，更俾咗團隊唔少啟發。 「今日嘅MV係為咗下一套電影」 或者有人會覺得，張子丰想做導演，但點解又要拍劇又要唱歌？但其實所有工作都冇離開過「做導演」呢條路，因為透過同人合作先可以激發創作靈感。如果知道自己嘅路，就會識揀Project、工作嚟做。「開頭拍MV又辛苦但又冇咩錢，點解仲要做？就係為咗下一個廣告，拍廣告為咗可以拍戲，拍呢套戲為咗可以拍下一套戲。有咗呢個心態，人生條路就會走得易啲，未必會如願，但至少知做緊咩。」 ‧張子丰認為知道自己嘅終極目標，人生嘅路就會走得容易啲。