小城故事

穿著整套白衫裝備的劍擊手在場上劍來劍往，極具古代決鬥緊張感的比賽令人熱血沸騰。雖然香港的劍擊發展時間尚短，但卻已經在世界賽事獲得驕人的成績，到底運動員在背後付出多少青春熱汗呢？人稱「「大師兄」的香港擊劍運動員老將張小倫，從中學開始接觸劍擊，直至十多年後仍全心全意將自己奉獻給劍擊。小倫感歎成為全職運動員的路並不容易，走到現在全靠對劍擊的熱愛，「玩運動有許多高低起跌，在經歷過失敗、受傷種種難關後仍然堅持，堅持到見到希望，再有幸登上世界舞台那種滿足感是無可比擬的。」 

https://youtu.be/KhSOwjD9zNg 一眾身處娛樂圈嘅藝人想喺競爭激烈嘅環境中脫穎而出，絕對唔係易事。除咗顏值之外，仲要識得定時向觀眾派下福利，製造話題之餘又可以催谷人氣。曾經係女子組合Super Gear成員嘅鄧伊婷（Irina）就憑著性感演出，成功喺一眾網民心中留低深刻印象，更封被為「TVB御用姣精」，晉升做新一代「咪神」。唔好以為Irina多數被安排做性感尤物，就認為平日裡嘅佢都係咁風情萬種，原來鏡頭外嘅Irina仲有好多不為人知嘅一面，更多嘅係流露出佢對演戲嘅嗰團火。 忍笑仲難過「姣」人 由於劇中扮演嘅角色多數穿著性感、喜歡賣弄風騷，Irina就被傳媒同網友民封為「御用姣精」。Irina坦言冇諗過觀眾會咁樣評價，但佢就唔認為呢個「封號」負面，反而覺得好有趣。「其實我有睇返自己演出，覺得自己唔係好姣啫，同埋現實中嘅我唔係咁嫁嘛。」比人話「姣」唔單止冇hard feeling，Irina仲講笑咁話可以擺正牌「姣」係一種員工褔利。「可以姣下公司嗰啲男神，哈哈！」不過講到拍劇時嘅辛苦，Irina覺得最難嘅竟然唔係犧牲色相，而係忍笑。「原來忍笑係好難㗎！由其係一大班人一齊拍劇，好容易又會比隔離嗰個影響到，自己又要忍住唔笑，心理壓力都幾大。」 跳出框框演繹唔同角色 雖然係屬於性感嘅世界裡尋找到自己嘅位置，但對於一個演員嚟講，被外界定型可以話係大忌。所以拍咗唔少劇集後，Irina都想嘗試演繹唔同角色，實行挑戰自我。「好想做殺人犯！因為未試過做一個好多陰暗面、好變態嘅人。」而要走出自己嘅演藝路，Irina認為堅持好重要之外，仲要識得自我調整。「我哋呢行工作或者拍攝過程係有好多變化，所以做一個演員要『Be water』。」Irina覺得咩想試下，咁先唔會將自己局限喺一個固定形象裡面。提到疫情打擊各行各業，Irina嘅工作及收入唔多唔少都受到影響，連去內地嘅工作需要延期，不過好彩公司仍有工開。「好感恩有份參與新劇《十八年後的終極告白2.0》及《童時愛上你》，仲有幾個月時間準備好我嘅角色。」雖然疫情打亂原本計劃，但反而多咗時間做運動保持美好身段，順道發掘香港美景，都係一種意外收穫。「我好多類型嘅運動都鍾意做，例如健身、跑步、踩單車同游水。最近我就鍾意行山，發現香港有好多好靚嘅風景，重新愛上呢個地方。」 ●Irina喺IG上分享生活趣事之餘，仲不時大派福利，post出性感清涼照。 用感恩嘅心去面對未來 入行至今已經6年，Irina早就體會到做演員嘅不易。不過係各種辛苦同磨練下，佢更加肯定到自己對演戲嘅熱情，更訂下目標繼續迎接挑戰。「我發現自己真係好鍾意做戲！接住落黎我希望將今年接到返嚟嘅角色同新挑戰都做好。」無論角色大小，佢都期待未來能夠参演更多叫好又叫座嘅劇集。除此之外，Irina亦同另外一個平台合作拍攝影片，等更多觀眾會睇到自己「搞笑」嘅一面。對於Irina而言，佢好珍惜自己現時擁有嘅一切，並用感恩嘅心去面對未來。「有時可能覺得冇咗好好嘅機會好可惜，但係其實仲有更好嘅等緊你，我相信所有嘢都係上天最好嘅安排。」

https://www.youtube.com/watch?v=8zFxEOIL2rc ­ 「問世間情為何物」由古至今，愛情對好多人嚟講可以話係一個不解之謎，就算誕生出多如繁星嘅分析同解說，但始終都冇辦法達致充分理解。正因如此，一直都有唔少愛情專家，幫助大家解答疑難，當中李專寫嘅分析特別到肉，例如佢會勸大家：「轟轟烈烈的愛情往往最不可靠，反而彼此相處不累的細水長流才能天長地久。」李專擅長理性中見感性嘅愛情分析，往往幫助唔少人療傷，走出失戀之痛。佢至今出書12本，同時擁有3個專欄，Facebook專頁亦有十萬幾followers，不過一個作家要喺香港地生存絕對唔容易，究竟點樣先至可以將網絡文學重新包裝，令作品接觸更多人？就等佢同大家親身分享一下箇中嘅心得啦！ 以觀察力解開愛情真貌 唔好睇李專文質彬彬，成個標準文青咁，佢坦言到大學時期先真正開始認真閱讀。「Year 1、2嗰時我係瘋狂地走堂，然後長期進駐喺圖書館睇好多書，又寫低好多自己對愛情嘅睇法。」年紀輕輕、拍拖經驗唔算多，但就自資出版咗兩本書，亦間接令李專成為專欄作家。畢業後，李專曾從事室內設計，兩年後發覺並非自己理想生活，重新執筆寫作，排解內心鬱悶。「喺嗰個時期我嘅工作、愛情全部好唔順利，不斷諗自己有咩可以做。咁啱見到自己個Facebook Page反應唔錯，最後下定決心辭職。」展開年終無休嘅寫作生涯後，要定期出書，加上要兼顧專欄同Facebook Page，遇著無靈感又點算好？李專就話自己都算幾好彩，甚少遇著『靈感特薄』情況，佢認為係同觀察力有關。「網絡作家要面對嘅係文章可唔可以擊中一群讀者，而呢樣野係好即時性，因為會有like、有share、有人會討論你嘅文章係點，大概都會知道邊一啲嘅topic係大家都會想睇。」李專表示，專頁每星期平均收到超過20個「院友」們感情求助發問，也成為寫作靈感來源。「我唔會將佢地嘅戀愛故事情節寫成文章，而係從中得知邊啲範疇能夠加以發揮，著重描述大家共通感受。」李專認為每個人嘅愛同細節雖然唔一樣，但後悲傷就驚人地相似，所以將觀點同感受化成文字，嘗試喺粉絲情場失意之時，送上一點心靈安慰。 ●李專甚少遇著『靈感特薄』情況，佢認為係同觀察力有關。 香港人重「情」  本地網絡作家爭扎求存 喺文學紙本閱讀市場相對低迷嘅手機年代，原來仍有唔少專幫人自資出書嘅出版社，但要好賣，就要針對市場需要。「其實新人嚟講，寫愛情嘅嘢比較容易打入大眾market，始於香港人都比較鍾意睇兩性關係文章。」當時編輯給予李專很大自由度，只要圍繞愛情就可以盡情發揮。雖然愛情文學市場夠穩陣最易「吸粉」，不過正當大陸、台灣網絡作家收入高得令人咋舌之際，本地網絡作家就要掙扎求存。李專自言自己際遇算係順利，但單靠寫作仍難以應付日常支出。「喺香港揸筆搵食嘅難度係來自賺唔到錢，就算我有出書有幾個專欄，與此同時作為KOL有廣告合作，夾夾埋埋都唔可以話維持到正常嘅收人。」作家喺香港嘅生存空間不大，李專認為新時代嘅作家想要網絡上面突圍而出愈來愈難。「作品要吸引到大家去睇，就要視乎內容係咪喺你嗰個範圍裏面差唔多接近最好嘅。」佢認為有意寫作嘅人要由作品嘅質及量落苦功，把握唔同機會擴闊網絡，慢慢累積人氣。 ●有意從事寫作嘅人要由作品嘅質及量落苦功，先可以慢慢喺網上累積人氣。 作家的愛情操控課  情慾是天生，愛情是需要學習。感情路上面對嘅問題，並唔係通過純粹睇兩性關係嘅書，或者同朋友吐苦水交流就可以得到改善。李專向來收到唔少讀者求助，由脫單、失戀到處理復合都有，結果從中得到啟發，發展出寫作以外嘅新業務：愛情咨詢。首階段就開辦網上戀愛課程「愛情操控術」，透過有系統嘅情感心理分析，幫助客戶成功得到愛情。「明明用好熱情嘅方式對待對方但都失敗，究竟係點樣做先至可以approach到對方？唔少人都經歷緊呢種煩惱。」佢形容諮詢就好似睇醫生，透過視像會談，一步步跟進客戶進度。李專亦正計劃推出復合課程，指需求同樣極大，只因迷惘嘅人需要指引。「大家願意畀一嚿錢去解決呢個問題，已經唔係單純service平與貴咁簡單，其實係大家都唔知道可以點樣做。」唔少人人漸漸長大後，發現自己對待感情嘅態度同年少時嘅唔一樣，咁係因為我地當中所經歷嘅過程，唔多唔少都會跌倒過失敗過。李專希望大家無論發生咩事，只要當中有反省反思，攞得到袋到落袋，將來就算再面對類似問題，就唔會感覺咁徬徨無助。

https://youtu.be/1qIiO6qivos 2020年ViuTV有唔少出色節目，除咗《全民造星3》引起廣泛討論外，自家劇集《暖男爸爸》都令唔少觀眾讚好。雖然劇中部份演員拍劇經驗唔多，但靠住努力同主角鄭中基帶領大家之下，拍出一幕又一幕讚人熱淚場面。其中飾演幼稚園老師Miss Carmen嘅岑樂怡(阿妹)同鄭中基有唔少對手戲，佢坦言呢個機會唔係人人都有，而且獲益良多。雖然2020年充滿不快樂，也打亂阿妹原本計劃，但由做主持到拍長劇，再意外地化身「環保L」做埋YouTuber，分享貼地環保資訊，得到嘅經驗都係歡樂大於失落，或許都是疫情帶給大家嘅新體驗吧。 ‧ 阿妹坦言拍劇經驗唔多，仲曾經一個人喺外地拍劇，但學識好多有趣演技方法。 「迴避」鄭中基 才有極催淚獨腳戲 有得同相隔18年再次拍劇嘅「暴龍哥」鄭中基合作，相信好多人恨都恨唔到，正好阿妹飾演嘅幼稚園老師幾乎每場都要同鄭中基做對手戲，爆出好多拍攝趣事。「Ronald好照顧我地，而且大家都知佢好搞笑，成日喺開機前搞啲好爛嘅gag，的確可以放鬆心情易入戲啲。不過一去到啲沉重嘅戲份，拍之前真係要避開佢，費事『焗蟹』NG（編按：演員忍笑）。」阿妹指最初收到《暖男爸爸》監製邀請擔任幼稚園老師時，諗住都係打下招呼傾下計，無咩太大感覺，但監製講完角色發展之後，佢就知道要做好功課啦。因為難度在於Miss Carmen另一半其實無喺劇出現，有一幕自己喺便利店食住三文治嘅喊戲，所有情感都要嚟自阿妹嘅幻想。「無咗對手幫你，唔單止要靠自己幻想往事，仲要諗住件三文治好難食，相信無人會估到！」不過最終大家都為Miss Carmen流下唔少眼淚，一切都已經值得。 ‧ 苦練多時為咗獨自邊食三文治邊喊，最終成功令觀眾流下眼淚，已經很值得。 擔心環保又悶又膠 「無人做不如我做啦！」 時代變得太快，今時今日藝人同讀者距離變得好近，加上今年無哂實體表演，不少藝人轉戰網上開Facebook Live、Telegram同粉絲傾計等等，足以證明社交媒體對維持人氣好重要。阿妹自認好懶，覺得好重要或者好鍾意先會Post上網，但公司同事往往叫佢更新多啲或者拍下片，先會有客睇中你做嘢。直到年初喺外地拍攝途中，因疫情要提早返香港，酒店隔離期間睇咗一本關於環保嘅書，激發起佢開YouTube Channel嘅動力。「最初我都有擔心環保話題又悶又『膠』，但睇多咗點樣走塑同過環保生活，發現其實好易做到，既然無咩人講不如我講啦。」多咗喺YouTube同IG Story分享環保貼士後，佢都估唔到反應幾好，短短幾個月已經吸引到幾千名訂閱者。吸到到一班環保L粉絲後，自然會收到好多題材建議，阿妹都會細心考慮再一一回覆讀者，其實咁樣都係一種同拉近讀者距離嘅好方法啊！不過阿妹認為香港對環保工作支援實在不足，只可以靠自己生活做起，但有時都係邊做邊學，知道邊啲係對生態有唔好影響就唔做；相反地如果為咗某種環保方法，影響自己生活同情緒，咁就要停止。佢認為如果可以用到自己嘅影響力，肯踏出第一步，簡單如走飲管，用少個膠File，其實已經心滿意足。 ‧ 阿妹話做環保L都有壓力，但都係鞭策佢為大自然出更多力。 2021活在當下最重要 今年能夠同「暴龍哥」合作拍劇，又變成「環保KOL」，阿妹回顧返2020年仍然係豐收一年。只不過疫情之下，阿妹本身要拍嘅旅遊節目無法成行，去美國讀書嘅計劃都要無奈取消，但反而多咗時間拍YouTube，學拍片剪片，都係一種意外收穫。佢一直將拉丁文「Carpe Diem」(活在當下) 放喺心中，似乎完全應驗喺呢個時代。「以前會提早計劃下年嘅工作同目標，但而家學識諗到咩就做，唔知幾時突然再無機會做。」就算世界充滿負能量，關鍵都要識得及時改變心態，呢樣就係香港人最叻嘅地方。 ‧ 疫情之後想第一時間去旅行，應該都係全香港人嘅心願了吧！？

https://youtu.be/Zffy6QdKZoE 廣東歌壇之所以被喻為情歌泛濫，主要都因情歌受聽眾歡迎，名氣和商業上往往較易取得成功。不過近年唱作、文青風格甚至「宇宙系」歌曲嶄露頭角，使歌手性格也變得立體和別樹一格。洪嘉豪兩年前就在此環境下踏進樂壇，新人「光環」消褪後並無原地踏步，反而疫情下更逆市推出多首單曲，曲風和主題多變。很多人不喜歡2020年，不能舉辦音樂會作實體商業演出，對歌手很大損失，但他回首全年，依然認為得著和收穫遠比失落多，至少拉近了和歌迷的距離。「我造歌造得開心；聽眾、媒體又支持，已經心滿意足啦！」 ‧ 洪嘉豪認為疫情對音樂市場不會有太大影響，做好歌手本份之餘反而多了一種治療聽眾用途。 社交平台宣傳效力極大 2020年的洪嘉豪絕對可以用「勤力」形容，全年推出四首單曲，由主流情歌到電子快歌都有，和初出道的形象截然不同。受制於疫情限制，只好在網絡上宣傳新歌，反而拉近和聽眾之間的距離。「今年我先識用Telegram，原來有Fans幫我開咗個Group，我入去之後又會聽下佢地對新歌嘅意見、討論生活遇到各種困難，有時又搞下笑俾歡樂大家等等。」他認為主動回應樂迷意見，要讓Fans知道留言是有用，對維持人氣很重要。另外今年多在Facebook、YouTube Live等網上表演，有時做其他歌手嘉賓；自己有新歌又會邀請藝人一起Jam歌，互相Share、Comment的效果可以幾何級數增加。他相信就算疫情之後，這種生態依然會繼續發展，對歌手宣傳也未嘗不是壞事。 https://www.youtube.com/watch?v=sqnoFH18v2g ‧ 和不同藝人、歌手合作，再在社交平台互相分享，對雙方名氣都非常有幫助。 電子快歌無人聽？「唔好睇少！」 洪嘉豪初出道時，以一首《掉進海的眼淚》吸引不少歌迷注意，YouTube至今已過200萬Views之外，亦令他獲得新人金獎。不過新人光環消褪後，歌手希望建立個人風格之餘，又要在人氣及商業上保持平衡，似乎都是新生代歌手要面對的難關。曾經也質疑自己能力的洪嘉豪坦言，如新歌《窮小子》等情歌依然受歡迎，但主題已經由傷春悲秋轉到自愛。「我相信多咗娛樂方式，失戀都唔再係世界末日，情歌需求自然減少，而且外國愈嚟愈多歌曲係講愛自己同追夢，似乎更容易俾大家釋懷。」 ‧ 要令聽眾喜歡、有成績，必先要有自己喜歡，再做好歌曲質素的心態。 然而情歌之外，歌手總希望突破傳統框架，例如年初在瑞典製作的《我說不可以》打破廣東歌格局，用北歐電子曲風建立全新形象，更獲得第一首電台冠軍歌。來到年底，洪嘉豪依然覺得當初使命大於成績，畢竟觀眾和媒體接受程度高了，但本地無太多人製作，他將北歐招牌曲風帶回香港，希望給本地聽眾新鮮感。他由同公司的衛蘭身上領略到，與其計算每首歌成敗得失，倒不如選自己喜歡的旋律，盡力錄好每一首歌，「有麝自然香」，就如《我說不可以》一樣，好歌必定有好報。 https://www.youtube.com/watch?v=faANYqK1kbo ‧ 瑞典著名的電子曲風一時三刻未必成為主流，但至少為本地樂迷多了一種新鮮感，已經是一件好事。 明年「創作人」身份更重 經過不一樣的2020年，洪嘉豪認為得到的遠比失去的多，還笑說現在了解80%自己。踏入2021年，他希望將洪嘉豪內心、陰暗一面展現出來。「單曲年代派得台嘅都要夠『中』，但自己寫咗好多好靜嘅歌，又未必有機會揀到入碟，所以想做一個曲詞編監自己做哂嘅Project，成本控制得好啲所以公司都支持嘅，哈哈。」出道僅三年，但已經對自己音樂道路和計劃很清晰，亦能平衡音樂和商業，的確不負他「做個有性格的歌手」座右銘，但願之後也能在洪嘉豪的流行曲中，尋找獨特性格元素。 ‧ 2021年洪嘉豪三大目標，似乎也很值得樂迷期待的喔！

https://youtu.be/_43fGORyuxM 「台上一分鐘，台下十年功」這句說話人人皆知，但又有幾多人真的感受到背後辛酸？就算在舞蹈事業很有資歷的陳丹儀(Danie)，也曾經歷過被父母反對、壓力過大甚至受傷無法工作等等遭遇。然而讓人急速成長的時間，往往就是從低潮爬出來一刻，Danie說若無以前走過的路，就不會有踏上紅館舞台，站在郭富城、G.E.M. 鄧紫棋身旁伴舞，甚至為鄭秀文排舞等等寶貴經驗。很多人覺得跳舞只是興趣、課餘活動，而且發展空間不多，但事實又是否如此？今次小編就和Danie談談本地舞蹈界發展，以及分享「搵命博」的演出經驗，分享何為Dancer「專業」價值所在。 ‧Danie在舞台及教學上有超過十年經驗，亦曾和不同巨星和導演合作，對現時編舞工作十分有幫助。 演唱會之所以精彩，除關乎藝人功架，更是有舞蹈員伴舞襯托，才能帶來最佳舞台效果。在香港，演唱會的Dancer招募大部分都是由排舞師負責，或是經過Casting，雖然後者對舞者來講絕對是個考驗。「Casting需要考驗Dancer臨場發揮，就算即時要跳某種舞都能駕馭自在，不過亦因為這樣，令適應和抗壓能力會較好。」專業舞蹈員在舞台上，就算是一個舞步、一個表情都要力求完美。不過舞台機關多，讓他們表演不時要應付突發情況。Danie提到最驚險的一次要數到幾年前郭富城演唱會，她本來要由升降台跳到舞台，但由於機器故障，升降台卡在半空中，她思考了很久究竟應否跳出去。「因為個場太黑，如果跳出去做咗『空中飛人』點算啊？但諗咗幾秒決定死就死，好彩只係離舞台一米左右大步攬過。」全個團隊就算因機器故障只剩下半面台，但仍然臨危不亂完成演出，難怪Danie也說當時完成後，一眾Dancer在後台感動得大喊出來。這次經驗正正顯示出專業和價值不單在於平日演出如何出色，而是在危急或意外時能否及時找到應對方法，不論跳舞抑或任何行業也適用。 不少Dancer都是以Freelance形式接工作，是一個「手停口停」行業，收入不穩定自然有生活壓力，但Dancer是否只有在舞台上表演？其實並不全然，Danie認為跳舞有很多不同形式。「年輕有活力的自然會想做Dancer，追求舞台嘅刺激感；經驗多點就會負責幕後工作如編舞、排舞，亦可以開學校教跳舞等等。」正因為範疇多不勝數，使近年入行方法愈來愈多，近年常見的會到Studio參加Training Programme，坊間亦有各類比賽，若被導師或評判賞識，機會自然接踵而來。她認為關鍵不單是技巧有多好，而是對跳舞有熱誠，並且能夠駕馭不同舞種。「由以前參加比賽，期間不斷進修，到宜家帶隊有自己嘅crew，我成日接觸唔同人同環境，所以跳咗十幾年仍然對呢行充滿Passion。不過都有人唔願意接受新事物，或者唔想付出努力去鑽研其他舞種，結果一兩年就轉行，所以好睇你嘅堅持和視野。」 ‧經過郭富城演唱會的經驗，出色的舞蹈員要精通不同舞種，而且能臨場應付各樣突發問題。 ‧Danie坦言做Dancer真是「搵命博」，但在台上表演又獲得掌聲的滿足感，卻非其他工作能媲美。 有人會羡慕舞者的工作就是本身興趣，但其實有苦自己知。跳舞體力需求大，又長期跳動，受傷似乎也少不免，Danie曾經見過有Dancer練一字馬拗柴，送院時整個膝頭成90度，無法移動，狀甚恐怖，覺得跳舞如「搵命博」一樣。至於老一輩會認為跳舞不能當正職，Danie小時候亦被家人要求去讀護士，她笑說連針也不敢打。Danie最終決定以跳舞作為事業，更以行動證明自己。能夠在舞台上跳出一片天，Danie慶幸獲得廣泛掌聲，但原來她在舞台背後也有困惑一刻。「有朋友問我跳舞以外有咩興趣，我......我答唔出。好似將一生人都奉獻咗俾跳舞，不過之前受傷，加上疫情多咗時間休息，都係一個好好搵下新方向嘅機會。」Danie希望注重編舞工作，甚至在將來可以開設屬於自己的舞蹈室，對她來說無事無可能，只有不願嘗試和付出的人，試了未必有好結果，但不試就一定無結果，說不定在過程當中找到一些意想不到的想法，對未來人生有重要影響。 ‧對她來說凡事都先嘗試，一旦嘗試就要全程投入，自然會有好結果。    

https://youtu.be/hsjJk16i9WA 在香港做藝人絕不易，唔似其他地方只唱歌開演唱會就足夠養活自己。香港地市場細，要賺錢就要唱歌、演戲、主持通通都要識，殘酷但現實。以為自由身最自由？事實係訪問嘅聯絡都要自己一手一腳處理。不過凡事親力親為，質素自然有保證，機會陸續而來，早前同男友一齊上綜藝節目而再次引起關注嘅Crystal張紋嘉，深明自由身藝人嘅辛酸。話雖如此，無合約在身嘅藝人可以挑戰唔同事情，例如上年和鄧穎芝一齊搞生意賣衫賣大閘蟹，仲獲得「蟹后娘娘」稱號。藝人跳出電視框做小生意，究竟有咩著數？就等Crystal同大家親身分享一下箇中嘅喜怒哀樂。 ‧ 從HotCha走到自由身藝人，所有嘢都要自己處理，但可以急速成長都係好事。 無額遮頭要親力親為 而家愈來愈多藝人傾向自由身，但唔好以為無合約綁住好好，Crystal自言無人幫手，好多雞毛蒜皮嘅事都要自己學習同處理。「以前揀衫、接Job、錄歌都有唱片公司同事幫手，但當變成自由身嘅時候，出Invoice、聯絡都要一腳踢。當所有嘢殺到埋身嘅時候，根本冇時間做自己想做嘅嘢。」佢笑言明知最好嘅方法就係請人，但又擔心假手於人會做得唔好，成品質素有保證嘅代價就係辛苦自己。係咪搵自己笨？佢就覺得唔算。「不過學識咗將啲容易但花時間嘅事，留返有時間先做，好好專心諗點做好盤生意，又或者自己寫劇本、報下Acting課程，希望趁而家多咗時間Train好自己，有機會可以喺疫情過後重踏舞台。」 ‧ Crystal笑言佢同鄧穎芝做生意都係零經驗，好多物流、訂貨工序都要由頭學起。 藝人搞生意必勝？ 除咗唱歌演舞台劇，Crystal呢排仲多咗個身份 - 「蟹后娘娘」。佢同Vangie鄧穎芝不時搞啲小生意，由二手衫做到大閘蟹，今年再加碼賣月餅、糉同盆菜等等，搞食物生意成本唔係太高，佢指主要都係文件和行政費，五位數字已經搞得掂。幸好收入同反應都唔錯，上年賣大閘蟹嘅生意額都接近百萬，對佢地嚟講經營之道就係︰咩都親力親為，堅守產品質素。「蟹后娘娘」覺得藝人可以藉名氣宣傳，短時間內俾到好多人認識自己個品牌，所以社交平台真係要好好經營。「究竟幾時出Post、寫啲咩去宣傳都好重要，仲有就係將啲產品送俾其他藝人朋友，宣傳效力就更加大。仲有我地不時會親自送貨，親手送俾顧客俾驚喜佢地，都可以做靚個品牌形象。」不過另一方面，誇張啲講，藝人都將多年嘅名聲押咗落去，萬一產品服務有咩差池就入哂佢地數。「藝人名氣只係幫你起步，食物品質都係重點，其實客人覺得你嘅產品掂、價錢又OK，哪怕係咪名人都會回頭再買。」 ‧ Crystal、Vangie兩人多次合作，反應唔錯，Crystal仲得到「蟹后娘娘」稱號。 ‧ 對佢嚟講，做生意未必會賺到好多錢，但經驗同危機處理先係最大得著。 從《調教你男友》獲得使命感 喺HotCha三女要分開嘅時候，Crystal一度走入樽頸位，佢嘅方法就係「阿Q精神」，做一樣新嘢而唔諗舊事。「之前HotCha分開到上年出咗歌冇咩反應，每次想轉行想離開嘅時候，偏偏上天就會俾一個機會我，例如做舞台劇，又有主持工作，今年就有《調教你男友》(ViuTV真人騷)。」佢覺得呢啲機會都好具挑戰，例如《調》呢種真人騷幾乎無任何節目效果，但依然感動到唔少觀眾，關鍵就係嗰種真。Crystal覺得社交平台出現之後，藝人和觀眾嘅距離大大縮窄，所謂嘅「明星包裝」已經唔同以前。「觀眾會鍾意鏡頭前後都係真實，多於背哂稿好詳細咁流水式講出嚟，只要做返自己，大家就會發現到你嘅好處。」 https://www.youtube.com/watch?v=afXB_MgKcQ8 ‧ 節目出街之後，Crystal下定決心搞YouTube Channel，仲邀請埋男朋友一齊上鏡，反應唔錯。 在《調教你男友》播出後，好多人PM佢同男友Ronald，下次有音樂會有舞台劇一定要捧場，呢份鼓勵唔單止為佢賺來人氣，更多咗一份使命感。「舞台劇終究都唔係大眾娛樂，但如果呢套節目而識咗我地，肯入場睇舞台劇，至少我地努力都冇白費啊。」多咗人入場睇舞台劇係好事，但同時對Crystal嘅期望就會更大，而佢亦不諱言希望獲得一種認同同成就，所以兩者都係相輔相成。冇觀眾嘅期望，就唔會有佢嘅努力，不論Crystal定係大家，若果上天送咗一份禮物俾你，記住要好好珍惜同運用，機會一走就無得再怨。 ‧ Crystal認為所有嘢都係上天俾你嘅禮物同挑戰，抱怨之前試下點樣解決同克服佢，話唔定有意想不同效果。

https://youtu.be/23R0QlOGmhs 講到Kevinboy李健宏，年輕朋友可能會因為《玩爆你個腎》而認識佢；成熟啲嘅就知佢係樂隊LMF和好多演唱會嘅御用鼓手。佢幾乎可以同「玩」呢個字劃上等號，而最令人讚歎嘅係每次你以為唔知仲有咩玩嘅時候，佢又會俾到新嘅驚喜觀眾，例如玩探靈，喺北海道開酒吧等等，仲要搞得有聲有色，正如佢堅持「有得玩，梗係要玩到盡！」今次邀請到呢位紋身滿滿，自稱「中年鼓佬」嘅KB，除咗將不一樣嘅娛樂帶俾大家之餘，原來佢都有蝦碌同心驚膽跳嘅一面。如果小編用四個字形容嘅話，應該就係「估你唔到」！ ‧ 演唱會鼓手要帶起全場節奏，由玩得嘅KB擔任絕對係完美配搭。 「細細個睇KB打鼓大」呢句可能有啲誇張，但事實係各大演唱會好易見到佢嘅蹤影，例如許志安、鄭中基等等，當然仲有LMF，真係帶咗歡樂俾唔少香港人。問到鼓手喺演唱會嘅崗位，佢就以身體嚟比喻。「鼓手就係脊骨，結他、Bass等等就係眼耳口鼻、手手腳腳，鼓係用嚟帶起全場節奏。」他笑說因為要服侍歌手，所以標榜自己是服務業，要提供最舒適的節奏和音質外，歌手有時可能因為握手、緊張而唱慢咗甚至唱錯咗，鼓手就要配合佢地或者用鼓聲提點表演者，真係少啲經驗同反應都唔掂。「有時想觀眾聽到CD冇嘅質感，打鼓嘅時候可以加啲新嘢入去，令到入場同表演嘅人都有唔一樣嘅體驗，我地就會覺得係一場成功嘅表演。」 ‧ 多得《玩爆你個腎》，令KB同好多歌手更易溝通，工作起嚟更方便，大家不妨參考下！ 做演唱會唔可以出錯，但KB試過記錯時間幾乎失場，嚇死製作人員。「有時做紅館除夕、新年場，可能9:30先開Show，有一次做四個男人嘅演唱會，綵排完無聽清楚集合時間，諗住都會遲開Show。點知嘆嘆下奶茶有人打嚟︰開Show啦！然後三分鐘由尖東跑返紅館，著件衫就直接上台，諗起都真係抹一額汗。」多得真係「Frd過夾Band」嘅樂手們，先可以齊齊整整表演，不過呢種關係要時間建立，而職場世界未必咁多時間時間由零開始認識，KB勝在幕前幕後都會見到佢，例如有啲新合作嘅歌手一嚟就會話︰喂我睇過你《玩爆你個腎》！大家有咗共同話題，工作時就更加順利。「多啲發掘下新嘢，未必會發達，但至少有得玩又俾大家識到你，幾好啊！」 ‧ 本來走Tour嘅Schedule排到年尾，但一場疫症無哂，反而令佢多咗時間搵下自己興趣，都未嘗唔係好事。 一講玩新嘢，KB計仔多多，由幕後鼓佬跳上幕前唱歌、節目主持，甚至遠赴北海道開酒吧都難佢唔到。不過一場疫情就無得出埠，令好多本地或巡迴演唱會都停哂，但亦係好時機尋找自己的根。「我覺得要諗方法抵抗艱難，做啲以前未做完嘅嘢，例如近排拍返靈探節目，兩年前因為太恐怖停咗，但其實冇嘢恐怖得過人同疫情，哈哈。」拍返《又要睇又要驚》令佢覺得好High，仲會花心機研究每個細節。唔單止咁，仲特登整咗首主題曲同七分鐘嘅MV，完全係電視節目水準，亦令唔少觀眾High埋一份，正正就係佢所講「帶到娛樂俾香港人」，唔係下爬輕輕㗎。 KB認為呢個年代做藝人最緊要嘅係夠真，若果鏡頭前後兩個人，咁辛苦拍條片都無意思。除此之外，只要抱住做每一件事都應該要全程Enjoy，觀眾係會睇得出，感染到大家嘅話，機會就會搵你。「一係唔玩，一玩就玩到盡！」 https://www.youtube.com/watch?v=iFTv8xQkuTs ‧KB為咗提升靈探節目質素，不惜拍咗個七分鐘嘅主題曲MV，淨係睇佢嘅反應都值回票價。 ‧ 拍嘢、做Show都好，只有享受過程先可以感染觀眾，機會自然好易會搵上門。

https://youtu.be/t0QY-5iSXas 今時今日做歌手很難，做廣東歌歌手更難，陳慧敏(慧敏哥)還要奔波港澳兩地，雖然辛苦，但她笑言「自己鍾意，值得嘅」。從大型唱片公司轉到獨立歌手身份，在無瓦遮頭的日子，凡事都要自己管理，但可以自由選擇想合作的音樂人，藉住交流急速成長。不過慧敏哥認為這並不足夠，她決定出走100日，用旅行尋找真正自我，雖然途中曾面對錢財和性命危險，但回想起來便覺得是上天提醒她凡事要堅強和勇敢，才可以安然無恙回家，和音樂生涯不謀而合。「我寧願食少啲，都想做啲自己鍾意同嚮往嘅作品，咁先開心架嘛！」 ‧ 慧敏哥坦言做音樂成本很高，但只要是喜歡或覺得有價值的，就應該即管嘗試。 唱片成本數以十萬計 「唔係YouTube聽幾次歌就得」 廣東歌市場愈見狹窄不能賺錢，早已不早新聞，但仍有很多人願意繼續出歌，無非都是愛與夢想。慧敏哥從香港大型唱片公司轉到澳門唱片公司，近年更開公司成為獨立歌手，自由度大大增加。「以前會有人幫你安排一切，而家就要自己負責，不過我覺得係好事嘅。不過我覺得以前嘅經驗，對而家一腳踢好有幫助。」慧敏哥坦言現今不可能單純唱歌，一定要發掘更多技能，例如做幕後音響控制；自己剪輯有份拍的廣告片等等，然而做音樂凡事都是錢，資金不足只好放慢製作新歌速度，「增值」自己尋找更多收入來源。「做一隻專輯八隻歌，就算有自己嘅創作，好便宜咁計都可能要40萬，唔係喺YouTube聽好多次就可以Cover到。」 ‧ 就算連同自己創作曲詞，一張碟成本都要數以十萬計，對獨立歌手來說絕不容易負擔。 不過慧敏哥依然堅持出歌做碟，不單是想藉歌曲抒發自己或對城市的感受，更是和音樂人交流成長的過程。在年初發佈的新歌《莫名哀傷》，邀得周國賢作曲，小克填詞，她表示是人生收過最艱深的一份歌詞。「小克嘅歌詞蘊含好多哲學思想同個人情感，五個字有五十個意思，但消化完歌詞你就會明白咩叫真正嘅『哀傷』，真係會得著好多同埋趣味所在。」坊間對此曲讚不絕口，她覺得歌曲本身就是有價值的藝術品，但每個人心中對它的價值都不同，亦未必能紅遍天下。不過她認為只要自己喜歡的音樂，希望可以創造價值的事，都值得放手一試。就算最後回報不如預期，但過程中一定會有可歌可泣的故事值得回味和學習。 https://www.youtube.com/watch?v=E4diyD0RJI0 ‧ 周國賢和小克合力炮製的《莫名哀傷》，慧敏哥坦言是入行以來最難閱讀的歌詞。 旅活100日 與死神擦身而過 上年適逢自立門戶開公司，甚麼都要自己做的時候，慧敏哥才發現不夠熟悉自己，於是決定出走一百日，尋求外界衝擊和自我對話，順道一圓少時夢想。好多人都覺得長時間旅活很美好，但事實卻非如此般美好，她從少到大對埃及很有憧憬，可說是「Dream City」，但去到時才感覺不如預期所想。「埃及嘅生活節奏好急速，無車停俾你過馬路，次次都好怕魂斷此地，再加上太多事發生，離開時真係有啲失落。」除了埃及，她又試過在巴基斯坦遇到騙子，但她堅持不付錢，更大膽和騙子說一不就放我走，一不就死在這裡，最終真是被她的氣場震攝，再加上Hostel職員協助成功逃離。事後她也笑言當時不知哪兒來的膽量，但她更加深切體會到，女子獨遊一定要給人一個強悍的形象，以及不好就範付錢，否則受害者只會更多。 ‧ 旅活一百日令慧敏哥學懂要堅持不就範，以及要給人一個強悍的形象。(陳慧敏FB專頁圖片) ‧ 縱然旅途上有不快，但慧敏哥依然覺得得著很多，甚至很想再一次旅活。「可能下次就由埃及開始！」(陳慧敏FB專頁圖片) 話雖如此，旅行總有美麗與哀愁，慧敏哥走到巴基斯坦北部城市Passu，她形容當地大自然景色比新西蘭更壯麗；另外伊朗人都很友善和親切，而且真的說到做到。「喺伊朗遇到動亂，無上網無飛機成個星期，大家喺Hostel反璞歸真咁傾計、唱歌、煮飯、捉棋，反而成為旅程最開心嘅回憶之一。」有想去的地方，就會有想回來的地方，慧敏哥返來澳門後，當下就覺得物價水平差太遠，治療腳傷都要幾百元，但幾百元已經可以在巴基斯坦生活一個月，但經歷過洗澡、三餐甚至生命都未必穩定的時候，反而會更加珍惜生活在大都市以及擁有一切。 疫情之下工作大減，慧敏哥覺得有讓自己寫歌、反思人生的機會，最希望可以繼續出歌和舉辦音樂會。另外她亦在澳門參與舞台劇及電影，若疫情放緩的話，預計年底就會上演。正如前文提到歌手已經不可以單靠唱歌維持生計，但勇於跳出舒適圈圓自己心底的夢，抱著一試無妨的心態，隨時會收到不錯效果，不單是慧敏哥，所有人也是。 ‧ 慧敏哥認為做任何事都不用計算得太清楚，隨心同覺得值得就已足夠。

https://youtu.be/Hr5RCEd5d9k 曾經有被訪者和編者講過一句話「好多嘢唔敢做係因為冇人踢你一腳，走出去先發現其實冇想像中咁難。」辭職講就講得多，仲要去環遊世界，聽落好離地，但有冇諗過點解冇做過？旅遊專欄作家查花（Chary）面對工作不快，決心喺30歲之前裸辭，揹住Backpack走遍六大洲同埋好多未知國度，就算成個行程用咗527日同花咗十幾萬，但佢覺得當中嘅遭遇、不同地方嘅人物故事、仲有世界萬千景色，呢份收穫嘅價值已經遠遠唔止十幾萬。究竟流浪在外嘅生活係點？點樣慳錢？點靠一個Backpack過哂四季？今次就等查花親身同大家分享呢一年心路歷程啦！ ‧ 查花花了527日環遊六大洲，但自言仍有很多地方意猶未盡。 探索未知國度  尋找「赤子之心」 好多鍾意旅行嘅人都不甘於朝9晚6嘅工作環境，加上辦公室政治氛圍，令查花覺得工作同佢初衷愈走愈遠。而且有咗第一次獨遊澳洲經驗後，佢更希望30歲前遊歷七大洲，於是決心辭去NGO社企工作，踏上五百多日，橫跨2018 - 2020年嘅超長旅程，從俄羅斯到中東，再到南美秘魯馬丘比丘都有佢嘅足跡。女仔獨個兒流浪在外無依無靠，然而正正因為冇人同你傾計，你會更加留意周邊嘅人同景物，例如可能識到同行者會搭順風車，會被當地人邀請去佢地屋企食飯，呢啲都係一般五日、七日旅行唔會體驗到。佢曾經走入一啲未被國際承認嘅國家，例如位於非洲嘅索馬里蘭，儘管佢嘅知名度好低，遊客極少，但當地人卻是世界數一數二友善同熱情。「果度嘅人生活好簡單，只係想大家開心就足夠，例如行行下街會有司機會停低，拉低車窗純粹問你今日過成點﹖呢種赤子之心係無辦法喺任何一個國家搵到。」 ‧ 到訪索馬里蘭後，她發現很多人連離開國家都很困難，香港人能夠環遊世界實在很幸福。 查花笑言旅活外地超過一年，佢好驚訝原來好多人都識香港。「幾乎每次都被外國人問︰究竟香港人點睇佢地？」查花憶起一次在俄羅斯，剛巧遇到電視台採訪，反而令到佢擔心會傷害佢地民族自尊心。「其實俄羅斯同好多國家一樣，未去過嘅人會覺得佢地好冷漠，係『戰鬥民族』，但真係相處落嚟時係非常熱情，個個當你家人而令你唔想離開。」不論身處俄羅斯，抑或經常被傳媒為危險國度嘅土耳其東部，大家油然自生果種恐懼，只係基於無好好了解過果個地方。當你去到嘅時候，自然搵到有人情味同自己喜歡嘅一面。 ‧ 五百多日旅程收穫豐富，左上方來自馬達加斯加的「孤獨棋」，更吸引不少朋友請求代購。 零下40度苦等一個鐘巴士 編者同樣熱愛旅行和攝影，睇住查花喺俄羅斯貝加爾湖冰天雪地嘅靚相，就知道背後其實藏著好多逾越生死嘅關頭嘅故事。「當時因為接我去貝加爾湖嘅司機甩底，結果我要冒住零下40度企喺一個冇樓冇室內地方嘅郊區一個幾鐘，好驚好徬徨，不斷問路過嘅車有冇多一個位俾我去，幾經辛苦先搵到一架車車我去貝加爾湖。」好多人覺得環遊世界好爽，但佢坦言途中都有好多難忘經歷，有時為咗慳錢要露營，又試過因為撞車幾乎命喪異地。不過最終成功喺30歲完成目標，再辛苦再危險都值得，至少為人生刻上不能磨滅嘅難忘回憶。「我仲有好多地方未去，或者去得唔夠，例如印度、斯里蘭卡等等，既然人生有限，何不走出去見識更多世界嘅美態﹖」 ‧ 查花很喜歡收集海報，由訊息和繪畫手法都彷彿紀錄著一個時代變遷。 最好嘅計劃就係無計劃 527日嘅長旅程，令查花學識最好嘅計劃就係唔計劃，因為計劃永遠趕不上充滿意外嘅現實。既然無計劃就不如好好認識當時身處嘅地方，了解周圍人民嘅故事。「我覺得呢個世界有千千萬萬種生活方式，透過同當地人傾計，你會發現生活以至生命都有好多可能性。」正因為查花喺Facebook同Blog寫過好多細膩嘅人物故事，亦無咩人分享過不存在國度嘅見聞，反而感動到出版商邀請佢，將兩年旅活的經歷結集成書，成為《那些陪我走過世界的故事》。佢覺得陪佢走過咁耐嘅，唔止旅途見到嘅風景同人，仲有一直堅持下去嘅信仰。「戴頭巾係唔想啲汗滴落去塊面同件衫，都代表旅程好熱好辛苦，後嚟就變咗一種信仰，勉勵自己發生咩事都一定解決到，放棄的話，之前辛苦走來嘅路都會白白浪費。」好好記住一路走過來嘅原因，自然有走下去嘅動力。 ‧ 查花覺得問清楚自己「點解當初決定走呢條路」，先有堅持完成旅程的信念。