為了做心愛嘅事，你願意付出幾多？在香港做內容創作很難，要全職做更難，偏偏就有三個人願意如斯瘋狂，經營IG和YouTube channel 「OKLA」。「拍片剪片好容易，但更多人半途放棄咗。」成員之一的Hoi Ki在訪談中講出這一句，的確道出不少香港人對Content Creator的誤解。究竟一個街訪、一個Podcast背後要做幾多嘢？更有成員大爆背後辛酸？今次約齊佢地三個人，講講經營Channel嘅心得同秘密。
‧ Skylar (右)、Hugo（中）覺得幫人搞Channel不如幫自己搞，毅然同埋戰友Hoi Ki一齊喺今年重新整返OKLA，全職拍嘢同做Podcast。
幫人搞Channel不如自己搞？
而家OKLA由Hugo、Skylar同Hoi Ki三位一齊經營，Channel早喺2019年成立，但做咗兩年又停咗，當時Hugo同Skylar正職都係幫人搞YouTube Channel，然後有日覺得與其日日幫人Promote，點解唔幫自己搞？呢句話激起佢地重拾創作初心，仲搵埋Hoi Ki一齊喺今年全職搞Channel，主要用Podcast或街訪形式分享兩性關係、生活搞笑事。
全職看似風險好大，最初佢地都定個期限，發現支出唔算太大，而且反應比預期都幾好，最重要係難得三個人一條心，都係鍾意做呢件事，對每一位成員都係不可多得嘅強心針。
‧ Hoi Ki大爆冇興趣街訪，但偏偏就係最多反應，有時覺得好難喺「鍾意」同「市場反應」兩者間取得平衡。
最唔鍾意做街訪！
大家睇片可能好搞笑，但背後工作好多，Hugo就拎Podcast為例，定題目、資料搜集、邊個要講咩、控制時間等等缺一不可，Live緊仲要答觀眾問題，真係少啲精神同轉數都唔得。未完！做完仲要剪輯同加效果，樣樣都要時間，樣樣都要心機，未計仲要拍街訪、整圖、剪片等等，真係唔好睇少前期同後製工作。
不過最令佢地驚訝嘅係街訪迴響好大，Hoi Ki突然大爆自己唔鍾意做街訪：「其實問其他人愛情觀……我真係唔想知！」此話一出嚇倒Hugo同Skylar，但原來係因為街訪做得多，內容好重覆，但偏偏係大眾最想知，結果最好反應都係街訪。（按：IG最好嗰條有超過17000 Likes！）不過街訪嘅反應令佢地發現欠缺個人特色，所以未來都要喺自家內容上下苦功。
‧ Skylar認為Hate Comments會令心情唔好，但偏偏又好想睇人地講咩，不過有時睇到啲建議例如咬字、表情管理等等都好有幫助。
訓練EQ好方法
Channel面對嘅係廣大群眾，唔可以用平時講嘢方式創作，但內容做得再好、再紅嘅人都一定有Hater同Hate Comments，呢個亦係好多同行必經階段。Skylar坦言曾經被惡意批評影響，都試過問自己係咪真係好差，但多得兩位戰友開解，佢已經睇開一切人身攻擊：「唔啱你嘅咪唔好睇！」或者換個角度諗，都要多人識先有Hater，唔係連留言嘅意慾都冇啦，係咪先？
不過唔在意Hater，唔代表唔駛在意網絡生態。Hugo指其實觀眾鍾意睇深度內容，只係唔同平台適合唔同類型，例如YouTube擺多啲聽Podcast或者內容較多嘅影片；IG就主力喺Reels分享搞笑短片或者精華，咁先可以吸納到唔同觀眾。
創作係漫長旅程
拍片、剪片好易，但好多人好快就放棄，然而創作係好漫長甚至好孤獨，面對觀眾可能只係成個過程嘅一小部份。Skylar認為想做YouTuber呢一類事業嘅人，一定要堅持，仲要夠鍾意；Hoi Ki覺得如果知道自己目標係咩，就唔好浪費時間，俾心機努力去做，有麝自然香，做得好終會有回報。
‧ Hugo認為興趣成為職業係好難，而Hoi Ki認為最難得係三個人都願意全情投入經營Channel，並相信做鍾意嘅嘢就會有好嘅回報。