小城故事

https://www.youtube.com/watch?v=GeApcgSHSUk 唔同人可能對張子丰都有唔同印象，早前有追電視劇嘅話，就會知佢係演員；有留意廣東樂壇嘅，就會知佢係歌手，不過佢最想展示比大家睇嘅，係佢導演嘅身份。三十出頭就成立自己嘅製作公司，執導過MV、廣告甚至電影等等，合作嘅藝人來自五湖四海，能夠自編自導似乎係唔少行內人嘅夢想。不過對佢嚟講，其實打拼嘅背後都有唔少辛酸，但知道自己做緊嘅嘢都係向導演方向前進，而成功脫穎而出嘅關鍵就係一個字「Creativity」 - 創意。 ‧張子丰集演員、歌手、導演於一身，但一切都是為咗電影導演而走。 從周星馳到科幻片 再到拍MV拍戲 「細個冇咩娛樂，自然就係將周星馳電影煲完再煲。我諗電影圈內差唔多年紀嘅人，都一定係睇佢大。」張子丰劈頭就講咗對電影有著情意結嘅來源，佢佩服周星馳演古裝又得時裝又得，最重要都係創造力爆燈，可以諗到好多無人諗到嘅橋段。但由鍾意電影變成想入行拍電影，就要數到《Back to the Future》呢輯科幻片。「科幻片最正就係啲劇情現實睇唔到，所以我嘅作品好想俾觀眾脫離現實，又有觀能上嘅刺激，最終帶出想表達嘅訊息或者社會現實。」佢將呢個想法放入自己歌曲嘅MV裡面，例如《推銷員之死》MV有麥皮蟲滿佈喺佢塊面，《完美情人》MV充滿AI、未來感嘅場景，所以Fred先會堅持唱歌，因為可以透過歌曲同自導自演MV，講佢想講嘅嘢。 ‧張子丰嘅歌曲MV中，可以到處見到科幻場景，目的要俾觀眾睇到現實不可能嘅事。（完美情人MV截圖） 除咗自導自演MV，張子丰仲幫尹光拍過MV。佢笑言大家唔好停留喺《少理阿爸》果個年代，其實尹光又In又玩得。「呢行一定要與時並進，但同前輩好似尹光，合作時就算年齡有差距，但佢嘅想法可能同我地唔同，話唔定會發掘到好多可能性。」作為導演除咗要夠幻想力，仲要有好好嘅溝通能力，了解成個片場運作。但呢種技能喺佢做電視劇演員時，又可能要稍為轉變。「因為拍劇個畫面係導演嘅幻想，其他演員收到Order就擺十個Pose俾你睇，但我就會諗『乜我咁樣幻想唔好咩？』話雖如此，佢依然好尊重其他導演諗法。「咁樣自己做導演時，人地都會尊重返我。」 ‧張子丰認為做得呢行除咗要夠勸力，仲要夠醒同夠Creativity。 真係有興趣同捱得先好入行 隨住媒體同網絡盛行，愈嚟愈多人想入行，但偏偏呢行成日有開工冇收工。張子丰都表示無辦法，新人唔單止要醒頭醒尾，仲要肯搏肯捱。「公司每年都會收Intern，但有啲人嚟面試問佢點解想入嚟，佢地話要計學分，咁你梗係話鍾意呢行或者電影啦，係咪先？但就算入到嚟都可能要由最低做起，我自己曾經試過洗一個荒廢好多年嘅廁所。」雖然大家未必頂得順洗廁所，但可能要做啲好基本嘅野，例如打掃Office、做Admin嘢甚至買飯盒。不過佢就話千祈唔好因為工作咁瑣碎而求其做，因為導演、上司可能會留意佢地表情反應，究竟係開心咁做定黑住面咁做，所以可唔可以係呢行發展得順風順水，事業更上一層樓，就係睇呢啲細微位，大家識做啦！ ‧《潮神》MV唔單止尹光打破傳統形象，更俾咗團隊唔少啟發。 「今日嘅MV係為咗下一套電影」 或者有人會覺得，張子丰想做導演，但點解又要拍劇又要唱歌？但其實所有工作都冇離開過「做導演」呢條路，因為透過同人合作先可以激發創作靈感。如果知道自己嘅路，就會識揀Project、工作嚟做。「開頭拍MV又辛苦但又冇咩錢，點解仲要做？就係為咗下一個廣告，拍廣告為咗可以拍戲，拍呢套戲為咗可以拍下一套戲。有咗呢個心態，人生條路就會走得易啲，未必會如願，但至少知做緊咩。」 ‧張子丰認為知道自己嘅終極目標，人生嘅路就會走得容易啲。

https://www.youtube.com/watch?v=Jf1-ItfJ4KM 藝術本應無時間限制，但在香港這片寸金尺土，似乎有點天方夜譚。就算傳統手工藝日漸式微，但超過90年歷史的粤東磁廠，仍然默默藏身於九龍灣工業區，還未被時代洪流所吞噬。作為香港第一間，也是最後一間手繪磁器廠，粵東磁廠第3代傳人曹志雄與老師傅多年來以廣彩為基礎，堅持用人手在瓷器上繪畫複雜而美輪美奐花紋，日復日展現工匠精神，令產品具有傳統精粹，亦不失時代韻味，更帶有實際用途。「有麝自然香」，固然至今客人依然不比當年少。 徒手畫圖盡顯功架 粵東磁廠早於1928年開業，至今為香港本土碩果僅存手繪瓷器廠。廣彩全名為「廣州彩瓷」，屬釉上彩一種，先在白瓷上繪畫彩色圖案，再入窑長時間燒製「鎖色」，確保餐具耐用。講到廣彩最重要部份，必定是構圖，不只是最少人精通一環，也是最值錢部份。「以前師傅人工好高而且好吃香，皆因佢地畫功了得，成個圖案設計都係佢地徒手憑空就咁畫出嚟。」大師傅落筆精準俐落，能夠輕易勾畫出精巧圖案，曹志雄慨嘆現今世代已經很難再找到這類人材。 ●廣彩瓷器繪工精細，色彩豐富。因上色時亦會加入真金，所以又叫「織金彩瓷」。 廣彩主要出口給外國客人，所以圖案取材不但廣泛，包括山水、花鳥、傳統中式風格人物等等，寓意吉祥，融合濃厚文化韻味，亦有客人專門訂製餐具時，會揉合中西甚至日本特色，簡約、華麗、複雜等全無問題。「傳統廣彩一路做落嚟有好多圖案款式，例如『百字花心』、『綠地白菜』、『錦邊鬥雞』同『龍鳳斗方』等等。而家我地將二十幾款通行圖案集結成目錄，方便客人揀花，當中織金人物同鬥雞特別受歡迎。」 ●「錦邊鬥雞」：活潑生動的鬥雞、寓意豐收的白菜和花團形成豐富畫面。 六、七十年代為磁廠興盛時期，當時廣彩師傅眾多，而且各有自己擅長圖案。「以前每個師傅有各自擅長嘅專利圖案，有啲畫雞叻，有啲專畫人，都係為咗保障收入。」不過人手繪製過程需時長，曹志雄笑說師傅如藝術家，無心情畫或突然請假，起貨時間可能長達以月計。後來為提高生產效率，在60年代後期，粵東磁廠引進蓋印章方法，師傅在紙上畫圖，然後做成橡膠印章，再把圖以蓋印方式壓到瓷器上，最後由學徒或女工人手上色。 ●粵東改用印章把構圖複製到瓷器上，再由學徒上色。保持手繪瓷風格之餘，也令生產過程更順暢，提高生產效率。 ● 客人特別喜歡在粵東磁廠內尋寶，隨時找到戰前產品！ 港督親自上門Shopping 不論最初在廣州，抑或在香港發揚，製成品很多時會直接出口至百貨公司或高級餐館，惟中國在80年代初改革開放後競爭加劇，曹志雄決心轉攻高端市場：政要、世家大族、各大海內外的酒店都是粵東客戶，較為人熟悉就是前港督之妻麥理浩夫人曾將百多年前已停產的歐洲古董瓷碟交予粵東磁廠，要求按圖案仿製新餐具。「當時好多廠搬晒上大陸。我哋就堅持留守香港，接餐廳或者酒店餐具訂單生意，連彭定康係97年離任個時都同我地買餐具。」 ●港督麥里浩夫人委托瓷廠仿繪前英國Hogarth圖案，因此又名「督花」。 或許香港人不常留意這種獨特工藝，反而外國遊客不時到瓷廠尋寶，近年日本人特別欣賞這類手繪瓷器。不過近年多了保育和推廣本土藝術文化，曹志雄多次借出不同年代珍品在公眾地方作展覽，最近它們再次和誠品書店合作，在尖沙咀分店內舉辦展覽及設立Pop up Store，令到手繪瓷器日漸被遺忘之際，重新得到大眾關注。「自從香港人知道廣彩文化之後，宜家唔少市民都會嚟訂少少送禮俾人，或者留個紀念。所以我哋對象好多樣化，豐儉由人。」 手藝瀕臨失傳 無奈未有新一代接棒  隨着師傅陸續退休，昔日曾經擁有三百名員工，如今只剩下4位師傅仍然坐陣工場，而且全部都已經效力超過數十載，這種忠誠是新一代無法想像。曹志雄讚揚老師傅們刻苦耐勞，夠毅力夠耐性。「啲師傅個個都尊師重道，正如我成日強調佢地本着工匠精神工作，又敬業樂業。」看著這門工藝似乎後繼無人，曹志雄表示對新人接棒不敢抱太大期望，皆因新一代來學習只是當興趣。「好多年青人嚟到學，係當興趣而唔係一種職業。另一方面現代人太少拎毛筆，叫佢地寫字都好難。」更現實的問題因行業逐漸式微，變相工作收入不多，慨嘆未能吸引新人入行。「舊時學成一門手藝可以用嚟搵食，但現時磁廠俾唔到高人工去請學徒，就算看更人工都高過我地。」曹志雄明白保育及承傳廣彩手藝有難度，笑言新一代當作興趣已經算是安慰，但自己仍期望可以守護這種本地傳統工藝直至最後。 ●廣彩構圖嚴謹，如今能畫出一手好彩瓷的畫師所剩無幾。  

https://youtu.be/9dB0K6yDUeU 早在廿年前，香港已被喻為「文化沙漠」，常聽到書店經營艱難，掙扎求存。面對租金高企和大企業壟斷，部份書店店主搬遷至樓上舖，或尋求市區邊緣，避免走向結業命運。不過，有愛書之人就一反常態，走入街市實現開二手書店夢想。「解憂舊書店」店主陳立程Phyllis收過不少經典佳作，吸引街坊及文青們前來尋寶，更設置漂書區，希望如《解憂雜貨店》劇情一樣，進入平凡的書店後可以脫離現實時光，好好享受字裡行間之樂。 選址街市只因租平 「解憂舊書店」位於大埔寶湖道街市內，介乎火車站與市中心之間。街市早已轉型，沒有濕??地板、魚腥味和叫賣聲，只有幾間肉檔進駐，乾貨則以賣花賣布為主。當大家以為Phyllis想增加噱頭才在街市開書店，非也，其實背後原因相當實際，兩個字︰「租平」。「當時選擇唔多，舊商場小舖租金都要過萬，根本負擔唔到，但我又唔想開樓上舖，所以揀左呢度，呢度都幾親民啊。」 寶湖道街市由食環署管理，就算加租也不會太離譜。「早幾年開業時，租金大約五千幾。前排續約個陣，租金有調整到加咗少少，不過都仲係合理範圍。」除租金相對便宜，食環署街市舖位租約一般以三年為限，就算退租只需要一個月前通知，極具彈性。就算人流並不是區內最旺，Phyllis都認為在街市「創業」，撇除一些刻板印象，其實對資金預算不多的人是不錯出路。 ●店鋪名稱正來自Phyllis鍾愛的東野圭吾原著《解憂雜貨店》。 主打舊書 愛書人的斷捨離 走入書店，第一下就是舊書卷味道，配合泛黃燈光和略窄的空間，真的好像脫離現實世界一樣，Phyllis從開業之前已經一心一意賣舊書。「新書投資大過舊書好多，同埋自己唔熟行情，賣舊書反而更彈性。」除了課本之外，收書近乎不設限，店內二手書都由街坊和書迷捐出來，部分更異常珍貴。「收過民國初年出版小說，有百幾年歷史，好多我都唔捨得賣。」其實不單止Phyllis，就連前書主在「斷捨離」時同樣依依不捨。「香港地居住空間唔夠，好多人逼不得已先將書送過嚟。」書本就暫時留在解憂舊書店不同角落，靜候惜書人把它們帶走，應該都是不少書迷心路歷程吧。 ●書店裝潢充滿格調，落地玻璃門、木招牌、字典內頁作牆紙，在街市內非常突出。 ● 能夠被自己最愛的書本包圍，這個工作環境應該很多人夢寐以求吧！﹖ 肯睇肯揭書已經好好 一排排舊書擺滿店鋪，種類包羅萬有，不少十元廿元已有交易。這樣經營，能夠有利潤可言嗎？「我淨係想書嘅流轉快啲，如果定價高，購買嘅意欲就會低咗。」Phyllis直言在電子產品氾濫年代，香港人閒時翻開書本閱讀，幾乎少之又少，定價實惠正是促使人們多閱讀的誘因之一。另一方面，店外設置漂書架，讓好書自由免費流轉，也是希望能帶動閱讀風氣。「消閒嘅書依然好多人出版，因為易入口所以多人睇；但有深度嘅書如文史哲類就會少人閱讀。不過我就覺得就算睇死一類書都不大問題，至少你肯睇肯揭嘛！」 不過追夢也要講求實際，Phyllis始終要維持營業額和成本開支。「政府街市租金加幅有限，反而現在因為租左三個大貨櫃擺書，支出多咗，收入僅僅夠填補。」書店賺不了錢，Phyllis卻賺了很多滿足感。「雖然日日都好忙，將書分類同清潔要用好多時間，但每天可以享受係書店嘅時光，以及同街坊書迷傾計，其實都有得著，希望書店可以繼續俾到空間大家解憂！」 ●店內是分類得井井有條的文、史、哲書櫃，店外則是一些流行讀物和漂書架。 ●Phyllis認為香港閱讀風氣不高，所以希望賣平一點，吸引更多人看書。

在智能手機普及時代，大家早已習慣電腦打字方法，執筆寫字機會極少。習字可訓練專注力外，手寫字更蘊含美感和溫度，在字裡行間展現個人風格品味。近年英文書法（calligraphy）熱潮強勁，西洋書法及插畫創作者「做作的Daphne」憑著一手好字，在Facebook吸引超過14萬人追蹤，作品從平面卡片到立體雕刻玻璃杯，實行將書法融入生活當中，文字不單可以閱讀，更可用來欣賞。 勇敢追夢  投身西洋書法世界 Daphne最初受到日本西洋書法大師小田原真喜子影響，產生濃厚興趣，從此跟英文書法結下不解緣。「初中時曾經在書店看到她的作品，驚艷之餘也在我內心烙下深刻印象。」可惜當時英文書法在台灣並不盛行，直到近年吹起一股習字風氣，要找專用工具再不是難事，Daphne便全情投入學習西洋書法。 現時以賣字維生的Daphne，手下的字充滿藝術感，其實她曾當美術編輯，英文書法只是興趣和副業。不過工作7年後，出版社減縮人手裁員。Daphne被迫離開，反令她走上全職西洋書法創作者之路。「我很幸運能夠將自己興趣變成全職，做自己想做的事。」Daphne將作品放上社交平台，還分享花體字工具資訊，想不到反應不俗，漸漸有不少粉絲會透過專頁詢問。 ●「摩登體」目前最受歡迎，字體用點尖沾水筆書寫起來粗細有緻，給人精緻優雅印象。 ● 不少人向Daphne訂製玻璃酒杯作為結婚賀禮，難度和藝術感不分高下。 基本功最重要 不少人追求生活品味，希望做到獨一無二風格，Daphne工作機會自然大增。「一些公司主要委託我書寫給VIP，或在香水或商品上刻字題字。」芸芸作品中不乏在玻璃杯刻字或瑪瑙片書寫作品，難度之高不言而喻，不過玻璃如此堅硬，刻字時要注意甚麼呢？ 「玻璃刻字考驗手穩定度，因為刻字工具會震動、加上玻璃本身光滑有曲面。所以其實最重要的還是寫字基本功。」 書法不一定古板 可以很「貼地」 「做作的Daphne」專頁現時有14萬粉絲，絕對有影響力，Daphne希望讓更多人知道「西洋書法」不一定是上一代喜好，其實可以很貼近日常生活。「英文書法能夠融入我們生活中，例如卡片、喜帖、刻字、招牌設計等，所以不是一般人想像只是高高在上、看不懂又無用的藝術。」 ● 英文書法不一定是刻板落伍，稍微改變呈現的形態，可以很貼近日常生活。 都市人經常手機不離手，親手寫字機會很少，Daphne反而認為現代人更適合習字，從提筆練字過程中，學會放慢生活步伐。「隨時可以拿起筆，練習幾個字後再做你的事，再回來繼續練習。」不過，她指習字不是純粹腦袋空空抄寫，需要顧及到的事情很多。「寫字過程需要高度專注，不但姿勢和結構要正確，還要注意適當空間和間距。」很多人渴望寫得一手好字，但練來練去還是原地踏步，Daphne認為關鍵在於「讀帖」。「要先好好觀察字體結構，對照自己寫出來的和字帖有什麼不同，比漫無目的抄寫幾百遍更有用。」 ●習字能夠讓人專注於心，讓心靈得以平靜。 要寫得一手好字，還是要多練習 Daphne的書法猶如印刷品般，工整美麗，背後花費不少時間勤勞練字。「習字最重要是每天持續，時間多我會花兩、三個小時，沒時間也要抽十幾分鐘出來練習。」Daphne形容習字是一種「見山是山、見山不是山、見山又是山」過程。和很多興趣或專業一樣，只要練習到一個程度，藝術家會有自己見解和審美，進而寫出自己風格。「忠實臨摹古人書體，這是基礎；在基礎上寫出自己風格，這才是創作。」 ● Daphne認為習字不是單純抄寫，還要了解字體結構和打好基本功，長久就會練出自己風格。

https://youtu.be/Peb-UKjeV6g 電影《花樣年華 》中，張曼玉一身舊上海風情傳統旗袍，盡顯女性體態美，至今仍教人津津樂道。然而不論旗袍，還是經過演變嘅長衫，呢啲曾經流行嘅大眾服飾，如今只能喺婚宴、典禮等隆重場合先有機會著上身，展現風采魅力。面對外國成衣時裝興起，本地時裝設計師林春菊(Janko) 帶着一股熱誠，並創立自家中式服裝品牌「新裝如初」，揉合現代服飾特點和傳統工藝，讓中裝重歸日常生活。 「連現代中國人都唔太重視中裝」 現今工業與科技發達，製衣成本下降，造就「速食時裝」(Fast Fashion)興起，款式要不斷推陳出新，「生命週期」只有一季甚至更短，務求緊貼當季潮流。Janko讀現代時裝出身，深明行業發展，她慨嘆人們漸漸忘記衣服蘊含嘅內涵。「唔理係高級、中級、低級或者街邊檔品牌都好，你唔會對好多舖留有深刻印象，或者有值得去講嘅價值。」 眼見不少亞洲國家例如日本、韓國或越南等，國民十分重視自家民族服裝，相比之下香港以至中國也顯得遜色，Janko認為與文化認同有關。「漢服對中國人嚟講，本身都唔算好重視。大家日常便服都係西服為主，好難喺街上見到長衫蹤影。」Janko希望通過新派設計，盡量將傳統特色保留，再加入現代剪裁設計，簡約地呈現華服長衫之美，令大家唔會輕易遺忘佢嘅獨特風格。 ●Janko畢業於時裝設計系，曾在電視台服裝部工作。她創立品牌新裝如初，以現代元素重新演繹傳統中裝。 ●Janko指中裝加多點現代設計，其實很適合日常穿搭。 潮爆牛仔布旗袍 叫好叫座 對好多人嚟說，旗袍長衫是上一代產物，會覺得老土不入流，又點會肯著出街？Janko覺得要令年輕人接受旗袍作為日常服飾，最重要係「時尚度」同「舒適度」。「過往傳統旗袍多用真絲，圖案又龍又鳳又花，唔係大排延席都唔會著。如果人地覺得老土，其實呢條路好難行落去。」為咗令長衫回歸生活，即使著返工或出街都唔會突兀，Janko只保留傳統中裝標誌性特徵如企領、斜襟和中國鈕，布料使用牛仔布，再加上拼貼同水洗效果，令華服臉貌即刻年輕化。「牛仔布係非常平民化既物料，現代人無邊個屋企無牛仔產品。」不過用牛仔布做中裝，一啲都唔易。「中國鈕講求細緻，但牛仔布料好硬，每次做完之後，手指都會腫哂。」除牛仔布外，Janko亦愛用棉、麻、絲等天然物料物料作面料，配合新式線條剪裁，著得舒服又可以融入周圍。 ●Janko只保留傳統中裝標誌性特徵如企領、斜襟和中國鈕，布料使用牛仔布，再加上拼貼同水洗效果，令華服臉貌即刻年輕化。 ●度身訂造和複雜步驟如手針、鈕會堅持本地製造，但製作時間可能以月計。 ●高山劇場內除咗一般門市外，仲舉辦「華服學堂」，傳授中裝製作基本功。 承傳艱難 要靠新血重組 雖然Janko銳意保留傳統中式服裝文化與工藝，可是始終難敵時代洪流，傳統旗袍裁縫師傅早已買少見少。「宜家喺香港仲有接生意嘅師傅，我諗十隻手指數得晒。」所以Janko還在高山劇場門市舉辦「華服學堂」，傳授中裝製作基本功，俾新一代感受一件手工衫嘅矜貴。「即使最後唔係作為職業，但過程中提升大家對華服興趣，其實都係一種教育同推廣。」不過Janko補充，要做到真正傳承，不能只單靠老師傅存在。「傳承需要喺傳統加入新元素進行重組，令到下一代人能夠容易接受，否則人哋唔會有興趣，咁樣就好難做到傳承。」 ●牛仔布洗水效果千變萬化，造出來的旗袍自然不同，所以每件作品都是獨一無二。

https://youtu.be/53XoUS765gs 理論上，路牌就係俾司機睇，但有冇諗過簡單一塊路牌，隨時蘊藏重要嘅香港發展史？舊式道路及路牌設計愈見稀有，彷彿同城市發展競賽一樣，最短時間搵到同埋紀錄。「道路研究社」社長邱益彰Gary Yau幾年前肩負重任，唔單止收集路牌特有嘅「監獄體」，更研究將呢啲文字「復活」，喺網絡分享俾大家。任務看似艱鉅，但佢好樂在其中，究竟路牌有咩吸引之處？ 不完美，反而有人情味 包括編者在內，很多人都唔知路牌都有分新舊。新路牌字體工整，望落順眼；相反舊路牌睇上去粗糙，字體唔平衡甚至好似寫錯字，Gary指所謂嘅「錯字」只係異體字。「以前路牌都係囚犯手劃上去，例如葵涌嘅『涌』字；清水灣嘅『清』字，同埋舊式商場會用『商塲』，其實冇寫錯，只係舊式寫法。」有人會問，監獄體不過係中文字，有咩值得保留嘅地方。他認為人手製路牌充滿懷舊氛圍之外，字裡行間更有一份人情味，正正係今日嘅香港所欠缺。」 ‧細心留意葵涌嘅「涌」字，監獄體路牌會使用「コ」而非「マ」。 1997年西隧通車，政府全面改用電腦印刷路牌後，今日只剩返約六百塊「監獄體」路牌。大家可能覺得九龍舊區捕獲機會較大？咁就錯啦，新市鎮先係真正「監獄體集中營」。Gary指市區重建不時要換路牌，相反殖民地政府發展荃灣、屯門、沙田等衛星城市時，道路網絡早已規劃好，路牌自然可以「五十年不變」。唔單止咁，佢亦指香港嘅道路設計，至今仍然屬於世界頂級。「唔同台灣、日本，政府好聰明利用兩段式過路同調較燈號順序，令道路唔會出現人車爭路，即係行人過馬路果陣，汽車會喺白線前等待。」 ‧一年多前因颱風吹爛界限街其中一塊路牌，背後嘅初代路牌唔小心「走光」，原來當年中文係右去左邊呢！ ‧Gary指監獄體路牌之外，坊間仲有唔少有趣路牌字體，隨時有一塊喺身邊。 好嘢就會有保留價值 鍾意一樣嘢，真係在所不辭。Gary坦言保育「監獄體」一啲都唔易，影相之餘仲要返去數碼化。「用喺路牌嘅大約只有幾百字，但常用字有7000-13000個，我地唯有喺電腦後製『造字』，亦係最花時間嘅工序。冇辦法，盡做啦！」小編同好多網民一樣，希望有機會可以喺電腦用到監獄體。雖然佢話要再等下，但可能係呢幾年懷舊同本土文化興起，反應意外地好。「呢啲嘢政府唔會主動提起，但大家可以用生活化角度，感受細微而且在地嘅香港城市發展，對傳承文化有好大幫助。」 提到喺網上分享字體，Gary幾年前喺Facebook同Instagram開設「道路研究社」專頁，幾年間搵到唔少志同道合，反應唔錯。佢覺得要引起觀眾興趣，文章數量係其次，識得「抽水」之餘仲要保持質素先係最緊要。「例如一年幾之前，因為打風吹爛咗界限街一塊路牌，暴露咗幾十年前初代路牌出嚟。喺專頁分享之後，唔少人發現路牌文化同生活息息相關，而且消失速度好快，漸漸就會自己發掘落去。」監獄體路牌終有一日會消失，但Gary認為吸引到大家一齊研究同紀錄，就係專頁希望做到嘅嘢。 ‧Gary指坊間紀錄路牌文獻和書藉不多，資料也很零碎，故特意出書講香港道路及路牌大小事。 ‧Gary希望將監獄體「重生」，就算將來在路牌上消失，大家仍可以在電腦使用。

https://youtu.be/kQLOsQHwikM 董嘉儀，大家通常都叫佢「大埔Lulu」，睇開足球嘅可能會唔客氣直呼佢做「燈神」。自與本地足球隊和富大埔結緣開始，各種話題一直同佢形影不離。鍾意佢嘅粉絲有好多，但負評嘅都唔少。由做啦啦隊至今，不經不覺近十年時間，到底呢位小女子經歷各種風雨之後，點樣將真正嘅「Lulu 董嘉儀」帶俾大家呢？ 一切從啦啦隊開始 Lulu也坦言和大埔密不可分，事關17歲時已經擔任和富大埔足球大使。「大埔Lulu」成功吸引唔少球迷入場，更被網友選為當年「港甲十大最具影響力人士」，其實都唔係壞事。喺機緣巧合之下加入足球隊，Lulu直認初時對足球係一無所知。「有99%女仔問『越位』係咩嚟架，想當日我都係會問呢啲問題，啲男仔都會解釋到嬲，哈哈！」但多得隊友同球迷幫手惡補，宜家認球員、分析戰績，到踢法風格都難唔到佢，對一個二十出頭嘅女仔，記到咁多嘢都唔容易㗎！ 攻擊令「燈神」成長 做足球大使之餘，Lulu亦係模特兒。本身著波衫係工作需要，到世界盃歐國盃期間影下波衫相，講下撐邊隊，點知被冠以燈神之名。「初初大家只喺講笑話我著邊隊波衫，個隊就會輸，但後來好多人都真係唔開心。」Lulu回憶當時不知所措，又覺得好無奈。「睇波應該係一件開心事......睇返啲留言，我有諗過自己到底係咪做錯，令到大家咁唔好受。」 面對排山倒海嘅批評，Lulu承受住唔少壓力，但同時亦令佢急速成長。「我又唔會對著波衫呢個舉動而後悔，不過網上言論一定有好評同負評，點樣面對逆境都係人生重要一課。」 ●經歷打擊過後仲企得穩，Lulu表示上咗人生重要一課，學識面對逆境同攻擊。 打開Lulu社交媒體平台，除咗出席各種公開場合同埋活動，仲有唔少跑步、瑜伽相。Lulu話自己體弱多病，原本唔係運動型，不過宜家已經將跑步變成生活習慣，仲成功衝出海外比賽。「近年我參加唔同馬拉松比賽，10K同半馬都有。最難忘個次係去德國跑馬拉松，居民喺兩邊拎哂屋企啲工具為跑手打氣，加埋當地風景好靚，唔係跑步都冇機會感受。」唔單止咁，Lulu仲好努力學瑜伽，打算考埋導師牌。如果佢開班，大家又有冇興趣上佢堂？ ●Lulu喜歡做運動，令佢暫時忘卻生活各種煩憂，好好做自己。 決心多元發展 唔怕被定型 「燈神」一役後，Lulu聲名大噪。今年26歲嘅佢決心跳出Comfort Zone，簽咗經理人公司，幾年間做過主持，更參與過舞台劇演出，又拍過電影，慢慢進軍成全方位藝人。「好多人都同我講：『你咪繼續去講波，喺足球界發展，你一定得啦！』但我都想試多啲唔同嘅工作，俾大家見到唔同嘅一面。」Lulu希望喺演戲方面有突破之餘，再放多啲個人想法喺角色入面，所以特登報咗演藝班Upgrade自己。「我本身對自己自信心唔係好強，上堂唔單止練基本功，仲就可以突破自己。老師講過『Lulu你唔係得呢條路，你都可以潑辣可以瘋狂！』」Lulu認為內心堅定同樣重要，畢竟好容易會俾其他人影響而迷失方向，所以要目標清晰，知道自己想追求乜嘢，先可以行到自己嘅路。 ● Lulu指足球的確令更多人認識佢，但自己並冇忘本。嚟緊LuLu都會繼續去球會幫手同宣傳。 ● 大埔Lulu這個名字早已成為董嘉儀代名詞，不過佢都希望大家會記得，佢係Lulu董土口。  

https://www.youtube.com/watch?v=NWxkkaW69x4 大家嘅YouTube帳戶總會Follow幾個YouTuber，返工搭車冇嘢做都係靠佢地嘅片過活。小編相信唔少人都有Follow熊仔頭，或者用「初代YouTuber」形容佢同好拍檔藍仔頭，以及一班熊女郎，應該冇咩人反對。當年用幽默方式剖析港男港女好有共鳴，幾年間足足吸咗56萬Subscribers，每條片Clickrate都廿幾萬起跳。究竟喺呢個超級搶眼頭套底下，熊仔頭喺現實又係一個點樣嘅人？ 鏡頭前型男 私下係毒男？ 2012年，果陣只有19歲嘅熊仔頭同老友藍仔頭成立FHProductionHK，拍短片講年青人心聲。「初初唔識拍片，驚拍出黎啲野唔好睇，怕瘀俾同學笑，咁就話不如笠住個頭套啦！」結果鬆馳熊呢個頭套深入民心，至今仍然繼續以頭套形象示人。YouTube入面熊仔頭搞笑幽默，完全唔怯場。不過熊仔頭形容自己私底下係一個毒到不能嘅毒男。「我拍片個陣時會chok聲，感覺上精神啲有中氣，但自己平時毒到連去M記拎茄汁都唔敢插隊，哈哈！」 ‧鏡頭前嘅熊仔頭搞笑有趣，但背後其實都係一個唔敢拎茄汁嘅「毒L」。 爆笑Idea源自日常生活 之所以吸引咁多觀眾，就係因為主題圍繞生活日常，例如讀書、父母、時事等等。「我個IG有一句寫住：『I am surrounding the planet.』意思係我圍住個地球轉。大家想睇乜，咁我就去拍乜。」最令熊仔頭人氣急升必定係代表作《男人有話兒》系列，短片描述男女朋友相處，令唔少人（按：相信係男士為主，Right？）好有共鳴。本身佢地會上討論區搵下網民有咩趣事分享，但佢話之後根本唔駛再搵料。「之後嘅片都係真實故事演返出嚟，女人真係好可怕！」 既然睇得熊仔頭，又點少得一班「熊女郎」呢？佢地令影片生色不少之餘，亦引起（男）網民熱烈討論，當中最受歡迎必定係杜小喬，仲入選過幾屆「高登女神總選」。問到點先做到熊女郎，佢答咗一個字「靚」！「唔知點解靚女做戲特別好睇。我哋研究咗好耐，同一個角色比唔同人做，點解差咁遠？哦！原來純粹因為靚。」不過唔係靚女咪冇機會做熊女郎？答案係未必！「隨住觀眾想要另類口味，都會搵啲好肥或者性格趣怪，要夠極端先有戲劇效果，清一色靚女唔Work㗎啦。」熊仔頭覺得冇拍攝經驗嘅素人夠「出於污泥而不染」，能夠為觀眾帶來新鮮感，都係佢地Target嚟㗎。 ‧熊仔頭認為Idea唔駛天馬行空，反而夠寫實夠日常先會多人睇。 ‧杜小喬唔單止令熊仔頭嘅片更受歡迎，更令佢踏上藝人之路同高登女神。 Project「錢來就做」 顧客未必永遠是對的 熊仔頭形容自己「錢來就做」，但要喺成本之下攪盡腦汁，又想玩盡唔同主題，例如微電影《一天》、《我的小鬼兵》以及《我來自YouTube》，都未必人人接受。「拍咗多短嘅，又想試下拍長片，諗住多啲變化。初時大家都好鍾意，點知又有人話短好啲，應該keep住以前風格，咁我咪又拍返短。」大家可能同小編一樣，睇熊仔頭啲片都係講求直接，唔駛太有深度，最後帶出個「MK道理」，但近年風格變得愈來愈高深，出片量亦減少。「細個拍片為自high，講下MK嘢搞下笑就算。但如果片長十幾分鐘，就可以舖陳多啲，等觀眾自己去感受當中道理，咁先會俾大家有更深印象。」 隨住知名度增加，不少品牌都搵熊仔頭合作拍片。但商業同創作之間要點樣取得平衡？佢認為雖然「客戶永遠是對的」，但有唔少老闆已經願意放手，盡情俾佢地發揮。「同老闆講咁樣拍會好笑啲多人睇啲，可能我地夠多Reference，大多數都會認同。有啲客戶就好堅持自已個套，但我地會講太過hard sell唔好笑，反而會嚇走觀眾，最後佢地都會交返比我地去度橋。」熊仔頭坦言站係觀眾立場，當然唔希望太過商業化，所以盡力將影片拍到符合佢地風格，希望觀眾會欣賞同受落。其實佢地嘅成績表記係每條片點擊率同Comments，總有網民會在討論區批評，但熊仔頭一向都抱持開放態度，唔單止輕鬆面對，更樂於聽取各種意見。「當太多人鬧你個時，都會諗下係咪自己有錯呢？不如聽下人地講不斷改進。」喺呢個競爭激烈、花招百出嘅YouTuber時代，熊仔頭認為要成功，努力喺不二之法。「其實都係老土一句，面對競爭要不斷努力，盡量做好自己。」熊仔頭覺得做自己想做嘅事先係最重要，有熱誠先可以喺YouTube舞台上繼續發揮佢地嘅小宇宙。 ● 熊仔頭好尊重網民批評，甚至反思係咪自己有錯，再俾空間自己改善。

https://youtu.be/UZdDXGzteQY 了解一個地方嘅風土人情，睇下當地嘅酒係一個好方法。不過香港地域同政策所限，一直都冇咩本地代表作，直到張寅傑（Kit）和張穎雋（Joseph）埋首新界八鄉一所青磚屋實驗室不斷鑽研，最終釀製出「白蘭樹下」(Perfume Trees Gin)。呢款代表香港嘅Gin酒，用盡本地植物製作，蘊含香港獨特文化，自然深受大家歡迎，難怪連Kit都好自豪話：「終於造出一款屬於香港人嘅酒啦！」 釀酒熱情結合農家智慧 「白蘭樹下」係第一支由土生土長香港人所製作嘅Gin酒，融合白蘭花淡香和草本植物清新。「好似一個感覺清爽，喜歡慢活嘅女孩子咁。」Kit係一名調酒師，有次喺調酒課結識當時任職護士嘅Joseph，兩人一見如故成為酒友，成日一齊飲靚酒，Kit笑言飲大兩杯之後萌生釀酒念頭。「酒可以話係唔同地方對自己身份認同嘅重要元素，我地身為香港人，不如整返隻有香港特色、有地區性嘅酒啦。」Kit和Joseph絕對唔係下爬輕輕，他們買哂材料同設備，喺錦田八鄉租咗間80年歷史嘅青磚屋，再翻新成工作室著手研究。「呢度夠靜，車都入唔到嚟，而且造酒同植物好大關係，好接近農作物，可以見識到各種農村智慧，例如老人家識得將剩餘農作物釀酒，但份量幾多呢？佢地又答唔到你。」Kit笑言造酒唔止要落手做，仲要觀察其他人點做，將啱用嘅嘢套用喺自己身上，咁就容易成功啦。 來自眾人回憶的白蘭花 好多人講過，成功係來自無數次失敗。Kit和Joseph應該好明白箇中道理，佢地試過將唔同種類的花入釀，包括雞蛋花、洛神花等等，但一係效果未令人滿意，一係Marketing唔啱。「雞蛋花其實唔係唔好飲，但飲落去令人諗起峇里島，冇香港Feel喎。」最終決定採用清新優雅，而且為人熟悉嘅白蘭花作基調。「外國人眼中代表香港嘅可能係洋紫荊，但公公婆婆晨早拎住白蘭花叫賣嘅情景，先係每個香港人最地道嘅集體回憶，見證香港精神同傳統價值。」有留意樽身的話，仲可以睇到其他配料，例如當歸、陳皮、龍井、檀香等傳統草本植物，令「白蘭樹下」每一滴都充滿香港獨有氣息。 雖然白蘭花香氣怡人，但要釀製成酒絕對係一項挑戰，皆因白蘭花保存時間極短，所以時間掌握非常重要。「我地同農夫喺白蘭花開花前採摘，然後即刻將花蒸熟，先拎到白蘭花提萃液拎去蒸餾。」一年多造酒過程中，兩人經歷無數次試驗，Kit笑指唔成功反而仲開心。「唔同成份、比例、配搭順序都會影響味道，令到成個研發過程變得好好玩。我唔鍾意浪費，就算整出嚟唔成功都會照飲。」 ● Kit認為要親身認識農作物，選擇最好材料造酒。 無奈遠赴荷蘭蒸餾 Kit與Joseph要將所有原材料由香港送到荷蘭蒸餾，但佢地認為係值得。「要喺外國蒸餾嘅話，最好選擇一定係Gin酒發源地 - 荷蘭，因為當地有好多豐富經驗嘅釀酒師。」「白蘭樹下」樽身於法國製造，樽蓋產自葡萄牙，單單將樽身和樽蓋運到荷蘭入酒再組裝，又增加唔少運費。問到點解唔喺香港建造有蒸餾裝置嘅酒廠，佢就坦言面臨不少阻礙。「香港土地有限，蒸餾廠佔地多，而且租金成本好高。」申請蒸餾廠牌照牽涉多個政府部門，包括食環署酒牌、環保署排污牌、消防處危險品牌等等，手續繁複。「如果可以係香港設廠，釀造香港人嘅酒梗係最好啦，但香港政府好得意，要先租場先傾點做，傾唔成就要浪費哂啲錢同時間。」Kit坦言政府對製造業支援力度不足，令他們無法在香港設立蒸餾酒廠。「希望幾年後可以喺香港開到蒸餾廠，造出一支百分百來自香港嘅Gin。」 ● 樽身由香港書法品牌「賣字」繪畫，樹上還寫滿各種原材料。 讓香港味道永久保存 釀造過程經歷重重難關，「白蘭樹下」終於在2018年12月推出市面，大受香港人歡迎，唔少酒吧都有引入。Kit和Joseph更希望將白蘭花香擴散至世界各地，現時「白蘭樹下」已在台灣發售，英國和日本巿場則正在洽談。「我地下年四月會去英國參展，希望等多啲人認識呢支香港Gin酒。」除擴闊銷售渠道，Kit很高興「白蘭樹下」令更多香港人願意了解「酒」嘅內涵。「我見到飲酒文化慢慢改變緊，以前啲人飲酒係因為生活太辛苦，宜家飲酒就係為享受生活。所以佢地會嘗試認識好酒，想知道自己飲緊乜嘢。」Kit希望這位「清新慢活的女孩子」，能夠在香港人心中佔一席位。 ● Kit坦言白蘭樹下不便宜，但要將原料由香港拿到荷蘭蒸餾，「一分錢一分貨」自然仍受追捧。 ● 香港人飲酒不再花天酒地般表面，現代人願意了解「酒」嘅內涵，其實都是一件好事。  

電影角色要怎樣才會給觀眾留下深刻印象？浮誇外表？色彩絢爛？作為電影創作關鍵部份，塑造角色形象任務落在特效化妝及造型設計師身上，但實際創作時如何帶出表現力和感染力呢？今次請來參與過多部荷里活電影及電視角色人物製作，來自日本的電影特效化妝及角色造型雕塑家片桐裕司（Hiroshi Katagiri），將製作現場工作思路歷程大公開！ 崇尚電影角色設計 隻身勇闖荷里活 片桐裕司自少喜歡動漫和美國電影，特別是恐怖電影。在他13歲時，無意間在書店中發現一本有關特效化妝的書，他就下定決心要去美國學習，立志成為電影特效化妝師，創作角色造型。片桐裕司明白在電影世界中，充滿魅力的角色人物往往能夠第一時間吸引觀眾注目，是向觀眾傳遞信息的重要途徑，因此電影界非常重視角色造型製作。「人們看電影或作品時，角色造型會直接影響觀感，假若做得不好，就會影響觀眾投入度，變相不會享受劇情。」在18歲高中畢業後，片桐裕司隻身遠赴美國，學習粘土雕刻技術。後來他加入知名特效化妝工作室「Stan Winston Studios」擔任造形師，累積經驗。當時曾參與《A．I》、《侏羅紀公園３》、《時光機器》等眾多電影作品角色創作。現時為角色造型雕塑家及導演，繼續在荷里活及不同地方從事各種不同藝術製作。 ●18歲高中畢業後，片桐裕司隻身遠赴美國，學習粘土雕刻技術。後來他加入知名特效化妝工作室「Stan Winston Studios」擔任主要造形師，累積經驗。（被訪者提供圖片） ●要塑造一個又一個經典角色，不論是人物、怪人、怪獸、機器人，每個都要有獨特之處。雖有看似非常困難，不過片桐裕司有一套人物設計法則。 角色人物設計法則 要塑造一個又一個經典角色，不論是人物、怪人、怪獸、機器人，每個都要有獨特之處。雖然看似非常困難，不過片桐裕司有一套人物設計法則。「角色人物設計最重要因素就是了解生物肢體結構，能夠理解就可以大幅提升角色人物設計效率，同時加強角色魅力。例如利用各種姿勢動作，從而表現出角色人物真實感。」只要能夠掌握設計法則，就可以讓整個設計過程更有效率，最長時間也只需時約6個月就能從設計到完成人物塑造工作。 ●特效化妝師會利用陶坭捏出或雕出角色造型雛形。（被訪者提供圖片） 不能單憑想像 醉心研習解剖學 別以為特效化妝及造型師的工作只需要專注設計出電影角色造型，片桐裕司表示了解劇本內容是前期工作重要一環。「要令角色形象深入民心，需要很多元素結合。除角色細膩造型和特徵外，角色登場方式以及導演拍攝手法都會有所影響，所以我們會向導演了解整個故事後，才開始構思外型。」 接下來的階段，特效化妝師會利用陶坭捏出或雕出角色造型雛形。「有時只需製作小型雕塑便可，但亦會因應導演要求，整出1:1實際大小。」有些角色需要演員配合試身，為減少溝通誤會，片桐裕司會與導演確認心中所想。「特效化妝師和造型師較了解實際人物整體造型，可與導演互相協調，同時抓緊製作時間，避免變動而延遲完成。」 為追求更高階的造型雕刻製作水準，達至栩栩如生，片桐裕司還進一步研習解剖學，深入了解人體結構。「好多時候大家覺得角色融入奇幻元素，其實都要憑空想像出來。但不論真實生物還是幻獸，很多時觀眾會將眼前角色與現實比較。要讓觀眾投入電影之中，信服有這種生物或角色存在，就必須回歸到掌握生物的骨骼、肌理、毛髮膚質和姿態。」 ●片桐裕司認為，要讓觀眾投入電影之中，信服有這種生物或角色存在，就必須回歸到掌握生物的骨骼、肌理、毛髮膚質和姿態。（被訪者提供圖片） 「落手做」才是王道 靠著細膩藝術技巧電影角色創造與眾不同的造型效果，片桐裕司獲得不少好評。在荷里活奮鬥近30年，他認為這份工作有趣之餘，也非常特別。「在電影業中，造型雕刻這個部份讓他覺得十分快樂，有時更像一班喜歡著怪獸的大小孩一樣在玩耍。」近年，片桐裕司專注於傳授雕塑技巧，學生不乏有藝術工作者，更多是對行業有興趣的年輕人。「如果希望從事角色造型設計工作，我建議要自己親手製作作品，因為單純喜歡設計並不足夠，而是必須享受創作過程，真正落手實行才可。」他認為角色造型師要具備熱情，以一顆純粹的心，專注於製作上。「能力不是最重要，而是自己對這個愛好有多投入。」片桐裕司希望每個人都能夠放膽實踐自己的夢想，享受自己喜歡的工作，毋忘初心，方得始終。 ● 片桐裕司主要代表作品非常多，例如《環太平洋》、《超人：鋼鐵英雄》等等。而他最喜愛《加勒比海盗－神鬼奇航4：幽靈海》中的美人魚。（被訪者提供圖片） ●片桐裕司教授雕塑課程，不分技巧程度與職業，能夠運用在不同領域及工作上。（被訪者提供圖片）