你可能遇過咁嘅情況：聚會上識咗勁人，活動中一路有講有笑，佢似乎成為咗你朋友之一。但拎完電話，散band之後，你哋之間就再冇交習；又或者你冒昧搵佢幫手，佢冷淡回覆「有啲忙，之後再傾」。成日話「人脈」，人脈究竟係咩？
美國人際關係大師卡耐基經過長期研究得出結論：「專業知識在一個人成功中的作用只佔15%，其餘的85%取決於人際關係。學會處理人際關係，擁有豐厚的人脈資源，你在成功路上走了85%的路程，在通往個人幸福的路上走了99%的路程了。」
人脈資源係一種潛在嘅資產，佢同錢一樣，都需要管理﹑儲蓄同增值。而家已經唔係單打獨鬥嘅年代，所有行業都仰賴人際關係，經唔經營好人脈會決定你嘅事業高度。
好多人以為喺公司做嘢，最大收穫係賺到幾多錢，積累到幾多經驗；錯晒！最重要應該係你識到幾多人同朋友，積累到幾多人脈資源。人脈不單止對你做打工仔時有用，你離開公司，創業做老闆時更需要呢樣資產。
財富嘅積累最初係靠本事賺番嚟，然後靠資本錢滾錢，最高層次靠資源嘅整合同人脈嘅經營。
有人脈當然好，但唔係每一個聯絡人都係有效人脈。你提供唔到價值畀人，憑咩要勁人帶挈你？同你有親呀？所以有個迷思係「我識得夠多人就得」，呢樣完全錯晒。你話自己有馬雲電話，佢幫唔幫你先？
人脈玩緊嘅係價值交換，睇你個人價值有幾大。你能夠識到邊個，取決於你對周邊人嘅價值幾高。與其費盡心思去結交人脈，不如先搞清楚自己價值，專心做可以提升自己嘅事，成為一個值得交往嘅人。
專注做好自己嘅事比任何事重要，人脈唔喺其他人身上，而喺自己身上：只有當你幫到越來越多勁人，你嘅人脈先會越嚟越廣，品質亦會越嚟越高。
兩個人嘅行業位置或知識處於一致嘅情況下，先可能傾得埋欄，達成深入合作。假設你咩都冇咁走去同馬雲傾偈，機會係好難得，但你畀唔到貨，只好講下「啲buffet幾好食喎」。
原則都適用於跨行業交流，好多娛樂圈明星都有商人好友。只要你喺某個行業做到咗一定高度， 行業間嘅人脈圈就已經打開。唔好試圖去識勁人，自己做得好勁人自然想識你，亦只有係勁人自己想識你，咁先叫人脈。
股票有「潛力股」，人脈都一樣。人脈間嘅互助好重要，不嬲都係你幫下我我幫下你。投資同我們程度差唔多嘅人，建立一種平等互助嘅關係。另外，多啲帶挈有潛力同能力﹑只係暫時差啲機會嘅人，幫咗人人會記得。就好似逢低買潛力股，呢類股票先係真正令人賺大錢。
資料來源：Top Sales