城中熱話

【轉工熱潮】想搵工見工一擊即中?除咗做好自己仲要知HR諗緊乜!

新年難得幾日假,除咗周圍拜年,唔少人都會順便諗下工作大計,拎埋Bonus就轉工。雖然工作空缺多,但見工嘅人同樣都多,所以唔好以為可以「坐定粒六」,以為有得見工就掂。不過你需要份工,公司都需要人,想增加見工成功機會,除咗要裝備好自己之外,仲要由公司HR角度出發,諗諗佢想揀一個咩人,揣摩一下佢地嘅心理,絕對係百利而無一害。今次筆者就分享幾個HR喺見工時關心嘅細節,希望大家喺鼠年都可以步步高陞!

‧新年係換工熱潮,但想有一份好工,除咗做好自己,仲要洞悉HR諗咩先得。

  1. 應徵者啱唔啱公司文化?

好多應徵者都會喺求職網不斷Send CV,搏十份有一份有回音。不過唔少人會忽略咗一點,究竟間公司文化啱唔啱自己?HR除咗會考慮工作能力同經驗外,仲希望可以同團隊溝通同合作得宜,一般都係請返同大部份職員年紀相近嘅人。試想下自己可能三十歲都未夠,但公司職員年紀偏大,就算做得掂但溝通唔到,一定做唔得耐。所以見工前可以搵下公司嘅相、片,甚至出版物嘅用字;現場不妨多望周圍,了解職員年齡層同工作氣氛係點。如果真係落差好大,但又好想做到呢份工,可以展示自己彈性大之餘,都可以講下以前點樣同同事溝通等等,俾HR知道你有呢方面經驗就Perfect啦!

2. 唔識唔緊要 但咪講大話!

理論上HR同應徵者素未謀面,HR淨係靠份CV認識應徵者,所以叫得見工嘅都對份CV滿意同合適。不過大部份都會要求應徵者認識某啲軟件,文職嘅可能係PowerPoint、Excel;媒體、廣告嘅可能係Photoshop、Premiere Pro等等,其實HR喺Jobs Description寫要識十萬樣手藝,總無可能樣樣都識。究竟點樣化危為機?以見編輯、記者為例,有啲會要求識用Premiere Pro呢類剪片軟件,就唔好講大話呃人用過,因為一埋檯試機就知,踢爆咗就代表「玩完」。與其係咁倒不如誠實講:「未用過Premiere,但我知佢係用嚟剪片,以往都用過Mac嘅Final Cut Pro等類似軟件。」咁樣唔單止俾HR見到你有做功課,同時可以展示埋你有MAC機同剪片經驗。

‧唔識唔緊要,但唔好講大話,誠實講出甚至可以係反危為機。

3. 工作經驗、人工

HR係咪見人工低就請?一定唔係。Send CV就如潑出去嘅水一樣,覆水難收,如果喺行業內打滾幾年,點都會知道市價大約幾多,開得太大HR只會擔心有伏,開得太高亦會Out-Budget。但大家啲價都差唔多,就要睇工作經驗啦。不過對普通職位而言,HR一般都唔會請能力太勁嘅應徵者,有可能會打擊其他員工士氣,而公司亦未必提供應徵者所需要嘅嘢,最後好快做唔住。

‧唔係人工開得低就會成功;同樣能力太高都未必適合一般職位。

Facebook