小城故事

【童年回憶】收藏《美戰》產品十年多到開工作室 「玩具買返嚟就唔諗價錢好好Enjoy!」- 專訪魔法少女動畫產品收藏者阿Yuen

以前細個放學返屋企,做完功課有得玩吓玩具,對小朋友嚟講已經係一日最開心時光。90後嘅阿Yuen當年同好多女生一樣,夢想擁有一個美少女戰士專用嘅變身器。不過對玩具嘅熱愛並冇喺踏足社會後退卻,反而更想搵返呢股童年回憶。10年前阿Yuen開始搜羅各種魔法少女動畫周邊產品,仲喺Facebook開設「Yuen Yuen Toy 魔法少女日常」,將歡樂帶俾大家。訪問當日走入工作室,與其話係工作室,用魔法屋形容可能更加貼切。「工作室就係我嘅玩具房,入嚟之後就會唔記得所有煩惱!」望住阿Yuen玩玩具嘅神情,先知道擁有一顆童心,確係最快樂不過嘅事。

●阿Yuen自細鍾意睇《美少女戰士》等魔法少女卡通。「主角又靚又識變身,仲會教訓壞人,宣揚愛與正義,覺得好吸引。」

長大後快樂愈走愈遠

工作室幾乎被一片粉紅色淹沒,當中佔大多嘅係經典動畫《美少女戰士》,從玩具向嘅變身器、攻擊棒、毛公仔;到糖果玩具、文具等日用品都係佢嘅收藏目標。雖然收藏品豐富,但原來阿Yuen都係近10年先踏上收藏之路,更成為佢嘅生活重心。「當年偶然行過深水埗嘅文具舖,見返細個時用過嘅嘢,勾返起好多童年回憶,於是決心搵返嚟儲。」後來阿Yuen甚至連當年見過但唔夠錢買,或者錯過入手機會嘅玩具都有收藏,希望重拾昔日嘅童年快樂,就算過程有幾辛苦,但獲得嘅快樂同滿足感卻係無價。「好似當我地長大左,擁有嘅野愈來愈多,但相對快樂就同我地就愈來愈遠,所以我就想借助玩具嘅分享,將快樂帶比大家。」

早前《美少女戰士》動畫推出25週年之際,推出各種復刻版玩具,雖然外型完美而且結構精密,但阿Yuen覺得還是當年嘅玩具多咗一份純真。「可能個時社會經濟唔算發達,玩具製造商用親民定價,務求可以帶比人最大快樂,糖果玩具就係最好例子,有得食又有得玩,重點係夠平,可以一次滿足晒幾個願望。反而復刻版太過完美,冇咗『玩具』嘅感覺。」正正就係簡單嘅小玩意,先至最能夠反映當年生活以至社會面貌。

●25年來推出過嘅美少女戰士產品,種類多到匪夷所思,講得出嘅都可以有。近年還推出接近生活的化妝品和日常用品,繼續吸乾粉絲荷包。

難忘初次日本尋寶體驗

網絡世代之下,不論《美戰》或其他動漫周邊產品,入手變得好容易,甚至可能低價買到好嘢。阿Yuen除咗去實體舖尋寶之外,日本嘅「Yahoo! 拍賣」(簡稱日拍)及各大拍賣網站亦係佢成日流連嘅地方。「不過『日拍』畢竟喺海外而且可能語言不通,無辦法確保寄出時狀態,大家可能要睇下個價錢承唔承擔到風險。」佢建議新手可以喺本地網站熟習流程,溝通好再影埋相先寄或者當面交收。不過佢最難忘都係第一次去有「收藏家天堂」之名嘅中野Broadway,幾乎令佢銀包「血流成河」!「果陣去到見到成個櫥窗都係《美戰》,男朋友形容我係癲咗,成粒鐘點拉都唔肯走,又逐件影相睇價錢,日本人睇到我應該都嚇親。」不過買到心頭好嘅話,再辛苦再難搵都值得,喺佢收藏品之中最有價值嘅係「永恆攻擊棒」、「永恆聖杯」及「延長棒」,阿Yuen指因為三件玩具可以合體,當年嚟講好有Gimmick,但好難搵齊哂三件,所以而家市面上好稀有,可能要差唔多七、八千蚊港紙先買到,真正「千金難買心頭好」。

除此之外,為咗有得玩又有得收藏,阿Yuen曾經有「雙收」甚至「三收」習慣,代表買兩至三件同一款產品。「一件用嚟玩;一件用嚟儲;一件用嚟後備 ,可能有人會唔明白點解要咁做,但玩具本身唔係應該用嚟玩架咩?」不過因為地方所限,阿Yuen近年都調整心態減少呢種習慣。或者咁諗,希望更多人可以買到佢地,其實都未嘗唔係好事。

玩玩具要在意價值?

好多人都會推介手上最貴嘅收藏品,但芸芸《美戰》產品之中,阿Yuen最鍾情反而係同自己細個有連繫嘅小物,包括一條唔起眼嘅香口膠同計數機。「其實愈平愈簡單嘅產品就愈難搵,好似呢條香口膠咁,好難先搵得返一條包裝咁完整嘅,所以買到個刻好興奮!」阿Yuen覺得儲玩具最重要儲得開心,唔需要太過在意到底保唔保值。「儲玩具本來係一個開心減壓過程,如果太過focus落個價錢度,令到自己心情波動,咁樣反而喪失初衷。所以買咗返黎就唔好後悔,好好enjoy,暫時忘記生活嘅煩惱啦。」

●最多人收藏變身器玩具,因為收藏及升值能力夠高。不過對佢嚟講,最有意義嘅3樣收藏品係美少女戰士漫畫、兒時用過嘅計數機同香口膠。

●以往有朋友質疑「咁大個人仲玩玩具」、「冇價值」,阿Yuen甚少在意他人目光,最重要可以忘記煩惱。

●阿Yuen曾親身飛到日本參與當地限定活動,順道到中野尋寶。

●阿Yuen曾經同朋友舉辦「MG魔法少女市集」,集合唔少經典少女動畫玩具及精品,吸引大家交流同回憶童年。

Facebook

Instagram

Please enter an Access Token on the Instagram Feed plugin Settings page.