致勝之道

【創出時機】洞悉市場先機再搞噱頭起江山 「後生仔唔駛驚輸唔起!」- 專訪時昌迷你倉創辦人 時景恒(Kevin Shee)

香港地少人多,莫講話買新樓,就連想擺多件傢私都要諗過度過。當年只有27歲的時景恒(Kevin Shee)靈機一觸,睇準迷你倉租賃生意,利用獨特出位推廣手法,就算唔記得個外國人,都一定記得「81777778」呢個電話,奠定時昌迷你倉業界龍頭地位,營業額一度高達兩億元。不過,一場無情大火,令Kevin同迷你倉行業狠狠跌一跤。事件至今已經三年,呢位老行尊點樣喺深淵中搵到重新出發嘅機遇?

● Kevin年紀輕輕就帶領時昌迷你倉成為行業龍頭,睇準市場需求同出色Marketing缺一不可。

出位廣告成功入屋

回想當初由一盤小型生意做到香港人人皆知,Kevin笑言要配合天時地利人和。香港居住環境狹窄,唔少人要搵地方存放雜物,但租一個單位又貴又用唔哂。他諗到用迷你倉解決用戶需求,所以決定大膽嘗試創業。「當年物業平,迷你倉用家多,收租回報好,加上銀行處理貸款手續好順利,就咁開始呢盤生意。」當年《宣傳易》熱播的廣告深入民心,Kevin指關鍵係Marketing定位要夠鮮明,諗到一條出位好橋,用「鬼佬」轟炸式大叫公司熱線「81777778」,冇幫襯過都記得個電話號碼。時昌迷你倉唔單止成功入屋,一提起迷你倉就諗起佢,確實經過一番功夫。

挽回大火燒掉的企業形象

當Kevin準備大展拳腳推向國際,2016年淘大工業中心迷你倉四級火事件令他差點斷送事業,大火引起大眾關注消防安全問題,呢位商界明日之星亦面臨巨大壓力。政府部門推出新消防指引,令部份倉庫需要重新改動間隔同增加防火設施,不合規格就要關閉。「政府提出唔同嘅改善措拖,我地都理解同盡量配合。雖然時間可能會長啲,但最重要係俾到大眾信心。」Kevin強調會盡力監督,加強整體管理,防止再出現事故。「雖然而家生意已經恢復得八八九九,不過呢件事對我影響好深,上咗重要一課。」

● 迷你倉大火加埋上市失敗,曾令Kevin走進事業低潮,但諗返都係一個轉變嘅機會,就當上咗一課。

● 點先算成功Marketing?睇到張相已經有聲,仲要記足咁多年,咁咪成功囉!

傳統迷你倉轉型 更具競爭力

政府嚴格規管迷你倉防火規格,曾估計至少四成迷你倉倒閉。究竟而家迷你倉市場仲有冇得做?Kevin就有一套見解:「迷你倉集中喺舊工業區,但新發展市鎮一間都冇,所以要逐步轉型,例如用實體舖或者自提點,咁佢地就唔駛山長水遠走出市區。」自推行新業務以來,公司發展唔錯。「香港人唔夠地方放雜物仍然冇變,所以迷你倉仲有得做,但挑戰就會愈嚟愈大。」

創業趁年輕 勇氣膽識不可缺少

經歷過事業和人生低潮,Kevin希望突破自己。除了遠赴非洲,仲體驗過激流、鬥牛、跳傘等極限運動,更跨界別推出自家節目《創出時機》,一嘗做主持人滋味,訪問各行各業創業家營商經驗和思維,更剖白當中心路歷程。「從中識到好多唔同嘅人,佢地仲會準備啲行內秘密,令大家對每個行業都有新睇法,連我都學到唔少嘢。」創業需要勇氣,Kevin表示人愈大顧慮愈多,已經唔可以如年少時一直向前衝,所以他鼓勵年青人趁後生創業,但要搵一個有潛力嘅市場。「後生仔千其唔好怕失敗,當你搵到一個行業喺有前景,亦無咩人嘗試過,就可以大膽All in,唔駛擔心輸唔起。」Kevin靠雙手打拼出迷你倉王國,即使經歷挫折,但磨練出一份堅強 ,甚至成功化解危機,絕對值得大眾敬佩。

‧Kevin近年創立自家節目《創出時機》,邀請知名企業家分享行內趣聞。

 

Facebook