25.8 C
Hong Kong

Related tags

Latest

Latest

Latest

More From Hit Consultant Media

【風光不再?】日本通勤觀光客減JR收少過百億 或將掀起一場持久減價戰﹖

武漢肺炎感染人數不斷增加,當中日本也是重災區之一,然而不少民眾批評當局抗疫不力,出現社區傳播。日本政府直到3月9日才正式宣佈中、港、澳、韓旅客只能在東京成田空港、大阪關西空港入境,並需要接受14日檢疫,旅客隨即大減,京都、奈良出現景點空無一人的「百年奇景」。不過在此之前,北海道政府知事也告誡民眾如非必要不應外出,各地公司都陸續改在家居辦公或遙距工作,減少交叉感染。在旅遊和通勤乘客減少之下,JR、高速巴士出現久違空載場面,近日更出現減價戰,最「過份」可以去到哪個程度﹖立刻帶大家看看。 ‧ JR東日本擁有不少皇牌路線如山手線、中央線等,在肺炎影響下皆無一倖免,旅遊地區路線更甚。 JR東日本收入減少過百億日元 擁有全日本各大高客量鐵道路線的JR東日本,因武漢肺炎疫情嚴重,政府提出封關、家中辦公、取消大型活動等等,使出行人數大減。最新資料顯示JR東日本預計2月收入將減少110億日元,折合約港幣7億據NHK報導,JR東日本在2月28至3月1日(五至日),分別在東京、上野、新宿、舞濱站(迪士尼樂園接駁站)閘口計算客量,發現乘客量分別減少45%、30%、39%及71%,可見情況嚴重。山手線、新幹線,繁忙時間使用量亦減少約20%,不再出現臉貼玻璃畫面;而港人常用的成田特快列車(N'EX)更減少近半。JR東日本社長深澤佑二表示每日損失約15億日元,預約3月情況將更嚴重。 至於依靠觀光遊客的JR九州,表示九州周遊券購買量大減70%,原本已經經營困難的JR北海道更雪上加霜,2月收入減少32億日元,折合約港幣2.37億。各大鐵道公司各出奇謀「迎戰」,包括停駛客量低的特急列車;將列車重新編排,減少自由席、指定席車廂數量;停駛活動列車和相關活動,減少交叉感染等等。 ‧ 來往大阪市區和關西空港的南海特急,平日繁忙時間竟出現全車空載情況。 長期減價戰展開﹖ 在疫情之下,各地乘車率都嚴重下降,私營公司紛紛推出優惠救亡。早前有日本網民指「黃金夜行路線」東京至大阪高速巴士,以往曾出現每5分鐘一班經典場面,可惜現時班次大減,周末車費僅需1500日元,折合港幣約$105,足足比平常時期便宜近75%。該網民上車時詢問座席位置,怎料車長表示「全車只有你一人乘坐,喜歡坐哪就坐哪」,可見低廉車費依然無法使客量回升。而一些售賣平價車票的金券店,不論新幹線、內陸機票價格皆下跌15-20%,不少網民都認為價格戰還僧維持一段時間,似乎日本經濟在奧運之前將會更差,甚至不少私營運輸公司會倒閉。 ‧ 在通勤乘客和旅客大減下,相信日本交通公司依然有一段長時間冰河期。

【日鐵Database】香港人走訪全日本鐵道 「火車唔止交通工具咁簡單」 – 專訪「Johnny鉄道撮影札記」版主Johnny Li

https://youtu.be/FkqRkYT1v4s 望住日本鐵道圖,99%香港人都會睇到頭痛,用放大鏡都搵唔到要搭邊條線。但對於鐵道迷嚟講,佢地醉心研究路線、車輛、時刻表,覺得火車唔止交通工具般簡單,更係旅程中重要一環。呢股驚人鐵道迷風潮,連香港人都被吸引,Johnny Li亦係「落坑」份子之一。火車究竟有乜咁特別?呢次就由呢位「鐵路達人」帶大家領略日本鐵路魅力吧! 「鍾意火車最開心幫到大家」 男人似乎對車情有獨鍾,Johnny揀火車全因佢屋企對住港鐵車廠,日日睇住地鐵出出入入,對佢嚟講係「世界奇觀」。以前俾人知道自己對某種交通工具,可能會被恥笑「死毒L」、「宅男」。不過Johnny一於唔理,任由大家叫佢「鐵道迷」、「鐵膠」,除咗已經聽慣之外,佢知道愈嚟愈多人會搵佢解決困難,原來係有「利用價值」。「以前有親戚覺得我個興趣好奇怪,不過當佢地去到東京大阪蕩失路,急call搵我救命,自此唔敢睇少我,哈哈!」Johnny自己都覺得幾安慰,研究一樣嘢十幾年,再活用知識幫大家Plan行程搵路,已經唔係興趣咁簡單,係一門專業,試問又有幾多人有咁嘅耐性? ‧Johnny覺得鐵道迷唔係「毒L」,自己開心又幫到人,「唔識路咪又係打俾我求救」,佢又講得啱喎! 每次去到日本,大家為去食好嘢狂買藥妝,但Johnny就選擇鐵道旅行,到訪偏郊車站及鐵路博物館成為必去行程。「我可以坐喺個無人嘅車站幾個鐘,乜都唔理淨係望住個大海,有火車經過就影相,不知幾舒服。乜旅行唔係應該咁樣架咩?」不過要數最瘋狂一次,就係Johnny和朋友特登飛東京留兩日,為咗睇一個喺上野限定開放嘅荒廢車站,Johnny坦言好慶幸自己能夠親身到訪。「出發前幾日先決定買機票,好純粹咁因為車站荒廢近二十年,開放次數絕無僅有,連網上都只係得好少相同影片,真係好難得。如果今次唔去,呢世都未必有機會。」 ‧Johnny走訪不同特別小站,其中北海道的北舟岡站眼前海景,令佢非常難忘。 ‧Johnny鍾意結合火車與海,因為香港睇唔到呢啲景色。 開Page聚腳吹水 Johnny正職係媒體攝影師,研究日本火車十年有多,佢兩年前喺Facebook成立專頁「Johnny鉄道撮影札記」,記錄各種千辛萬苦旅程。「還掂我啲相放喺硬碟,都係得個擺字,不如分享俾大家睇下不一樣嘅日本,同埋自己嘅第一身探險體驗。」雖然去嘅地方同景點唔主流,但反而吸引唔少鐵道迷同鍾意深度遊嘅人。「香港好多人講日本,但無咩專頁會深度講日本鐵道同鐵道旅遊,呢個平台就變成大家聚腳地。有讀者PM我,睇完我嘅文章,下次旅行去咗果個地方,對我嚟講係好大鼓舞。」 ‧兩年前開設「Johnny鉄道撮影札記」,將Hard Disk大量相片分享俾讀者,成功吸引一班固定觀眾,反應好好。 「鐵人」必去朝聖推介 鐵道旅日方便快捷,但望住路路線圖密密麻麻,車站啲名咁複雜,Johnny坦言都試過搭錯車。「唔敢講自己識哂每個站每條線,但大家問到嘅通常都識。」講到佢私伙推薦景點,一定係「日本三大最美無人車站」嘅四國下灘站,亦是他人生第一個鐵道旅行目標。「下灘站係海邊小站,車站無職員得個小月台,但眼前就係無盡嘅大海,睇日落真係世界級!同時呢度經常被JR揀做青春18車票海報拍攝地,當年去四國真係為咗去下灘架咋。」 ‧下灘站係Johnny私伙推介地點,雖然列車班次少,但可以無障礙咁欣賞絕美日落。 體驗在地文化最佳方式 鐵道與生活息息相關,Johnny要揀一啲影相靚位,有時經過住宅區工廠區,完全感受當地人在地生活,以及鐵路嘅深厚感情。「有一次喺新宿送別一架行埋當日就退役嘅火車,好多人嚟到都唔捨得,唔少小朋友喺度喊,職員同大家合照,證明鐵道喺日本人心中,已經唔係交通工具,香港一定冇可能做到。」Johnny認為旅程就算因各種意外無法完美結束,但當中一定有值得回憶同驚喜嘅地方,亦是佢堅持鐵道旅行嘅原因。 ‧對Johnny嚟講,鐵道唔係單純交通工具,更加係體驗在地文化最好方式。

ADVERTISMENT