J Arie

https://youtu.be/fvHO95P1o7Y 肺炎疫情之下，好多人嘅收入都有影響，連幕前演員同歌手都無一倖免，小肥同J.Arie 雷深如都笑言搵得一千得一千。不過難得多咗時間，佢地兩個早前開咗YouTube Channel「肥JLL」，實行拍「Seven」片做YouTuber同開Live大展歌喉，點知仲忙過平時生活。不過咁樣反而有意想不到收穫，發現好多人先覺得香港歌手唱Live係得㗎！究竟可以點樣喺日漸狹窄嘅廣東歌市場，獲得大家喜愛之餘，又搵到自己一片天？ ‧兩人開設「肥JLL」YouTube Channel，內容貫徹佢地「Seven」風格，仲吸引古天樂出手協助！ 拍片大爆「Seven」事！竟引起古天樂興趣 疫情令好多活動唔係延遲就取消，歌手生計都好受影響，J. Arie作為獨立歌手，無固定底薪，坦言有嘢就做，搵得一千得一千；小肥就好彩啲，因為簽嘅合約有固定月薪，但大家都不約而同話時間多咗，於是就將上年年尾已經想開Channel拍片嘅計劃正式出爐。「最怕係睇得太多Comment，咁樣反而會打擊信心，所以我地就想拍自己嘅嘢，一嚟題材冇限定，二嚟拍片都係Just for fun，夠Fun先會拍得開心。」佢地除咗分享平日打拳健身嘅搞笑事之外，仲拍片煮「地獄料理」送俾Fans，點知吸引到演藝人協會會長古天樂出手幫助，將佢地嘅「Seven」事推俾更多人知。「古會長好好人，佢同我地討論拍咩題材先適合，始終歌手形象都好重要，所以有啲玩得太盡嘅題材就要收斂一下，仲有會長千叮萬囑我地一定要唱歌！」為咗貫徹又搞笑又癲嘅風格。佢地仲搵咗填詞人梁栢堅，改篇《逼得竉物太緊》做《Switch得動物咁盞》，成功吸引網民注意。 ‧除咗《逼得竉物太緊》外，仲搵咗梁栢堅等填詞人改詞翻唱《Switch得動物咁盞》。 小肥：原來開Live好易提升人氣 有啲嘢真係唔做唔知咁好反應，小肥不忘古會長建議，閒時會開Live唱下歌，同粉絲互動，點知FB Page嘅Like數即刻破萬！「原來好多觀眾覺得香港歌手啲Live係唔得，可能偶爾佢地聽到我地啲Live係得㗎喎，咁就會去專頁聽埋其他作品。唉點解唔早啲開Live呢？」佢覺得要將自己掂嘅地方講俾更多人知，但歌手都係職業，演出亦要保持水準，咁先會做到個Brand出嚟。 J. Arie：寫到好歌俾人更滿足 作為唱作人，J. Arie曾經面對迷失同低潮期，佢用廣東歌市場做例子，指歌手近年偏向做單曲，首首都計到盡想係Big Hit，但最後又爆唔起，好易會走入迷失期。「究竟要堅持同一樣嘢做到成功，定係要不斷蛻變俾新鮮感觀眾？我會覺得唔好計咁多，做自己想做嘅嘢，話唔定仲有意外收穫呢！」除此之外，佢上年寫咗《Dream My Dreams》俾剛踏入18歲嘅黃淑蔓，原來首歌本身係J. Arie自己唱，但監製覺得Feanna更適合，最後獲得叱咤歌曲獎，令佢好感動。「將適合嘅作品送俾適合嘅人演繹，會更加快樂同滿足！」 ‧J. Arie覺得將適合嘅旋律送俾適合嘅人，滿足感反而仲大。 樂觀面對就有出路 樂壇打滾多年，問到兩人有咩人生座右銘，小肥好簡單答咗七個字：「船到橋頭自然直。」佢話再困難日子都要過，當行到盡頭時，就自然有路俾你繼續行落去。J. Arie就以自己由唱Demo變成正式歌手做例子，鼓勵大家千祈唔好睇低自己微少力量，正如經驗一樣積少成多，可能幾年後就會有好好回報，到時望返轉頭，就會覺得今日嘅付出都係值得。 ‧小肥表示疫情過後都會繼續開Live，證明香港歌手都好唱得！