好多初創公司準備打入市場時，老闆都會為訂價而煩惱，究竟應該將價格設定喺咩水平？太高好似Grand啲但又唔夠吸引；太低會吸引到多啲客但又可能無利潤。結果好多人訂價時，都係睇下競爭對手再憑感覺決定，最緊要唔好蝕錢就得。但事實上，價格太便宜未必唔係好事？而長期營運時又應該點樣調整價格？今次就同大家分析各種技巧，點樣用比較容易嘅方法制訂合適價格啦！ ‧訂價唔可以靠估亂咁嚟，要同產品質素、品牌定位相稱。 市場對手嘅產品價格，的確會影響你嘅訂價水平，最緊要價格同產品質素、品牌定位相稱，例如喺屋邨經營茶餐廳，一碟餐蛋飯居然賣$128，可以媲美五星級酒店水平，若果唔係有咩特別噱頭的話，好難會吸引到目標顧客。除咗了解市場外，另一種比較容易嘅就係成本加成法，指成本加指定一個百份比，例如產品成本為10元，再加指定百分比50%，售價為15元；日後成本上漲到20元的話，售價就會變成30元。好處係可以確保利潤，但壞處就係價格會變得唔穩定，客人好難適應。 講完訂價基本方法，點樣決定優惠都係好重要。減價要收到宣傳效果之餘，又要有錢賺唔容易，所以喺決定優惠價之前，必需要諗清楚減價目的係乜：究竟係純粹增加銷售量增加收入，抑或想吸引新客源。下面會因應市場、減價目的同產品種類而提供幾種折扣策略，想創業嘅可以參考一下喔。 浮動訂價：價格會隨市場需求而改變，但改變嘅時間一定要好短，例如每日甚至每分鐘變化，情況就如Uber一樣，繁忙、深夜時間空車較少，價格相對較高；另一樣就係某啲節日時改變價格，例如農曆新年前夕，大多波鞋店會減價。浮動訂價可以令「利潤最大化」，亦可以將貨物流轉速度增加，但有些產業如航空公司在天災時提高機票價格，會被批評為「發災難財」，同時亦未必適用用於日用品、食物等價格較低及購買次數極多的產業內。 ‧喺天災、選舉等情況之下，回國嘅機票需求特別大，因為供應有限，所以價格自然會大幅上升。 2. 犧生訂價法：若只為吸引新客源或打入新市場，很多商人會選擇第一件「試用價」、買一送一優惠或加一蚊多一件等方法，售價減到和成本價相近甚至蝕錢，看似無錢賺，但這些產品本身銷量可能並不好，商人實際只為吸引人流，顧客可能會在同一次購物體驗內，購買其他無優惠的商品，這樣可以增加產品流動及客源外，亦可帶來額外收入。 ‧超級市場幾乎從無用過原價，俾顧客一種減價幅度大嘅錯覺而增加消費。 3. 錨定價格：先為貨品定一個較高價格，然後再提供低價格，讓消費者有一種「減價幅度大」嘅錯覺。超級市場很多時都用這種策略，在貨架上的價錢牌，彷彿從未見過用原價售賣，永遠都是做優惠。又或者先借用市場調查，發放較高價格的訊息，當產品推出時價格遠比原先消息低，客人就會覺得「抵買」而入手。 不過若產品或服務質素不濟，再低的價格都不會有客人回頭再消費，所以從商必需要對做好產品及服務，還有出色價格政策配合，這樣才可以長遠經營下去。 ‧唔係訂價低就可以吸引客人，要了解市場需求、品牌定位，再配合各種策略先成功。