為咗換隻平底鑊或者一張廿蚊Coupon，不斷購物儲印花，滿心歡喜之際，計返起其實得不償失？應該唔少香港人都有試過，其實一切都係嚟自「順便」同「怕執輸」心態。明知道回報未必好大，但依然唔想放棄，結果中哂商人嘅下懷，多咗好多無謂消費。呢種「稟賦效應」(Endowment Effect) 究竟點樣影響消費者購物習慣，以及佢地嘅思維？關鍵就係 - 顧客可唔可以喺消費之中體驗同培養習慣！ ‧有時為咗唔好執輸而唔理性消費，就係「稟賦效應」嘅最佳例子。 稟賦效應好講求一樣嘢，籠統少少講就係「有冇人提你或推你一把」。以往有心理學家曾經進行一次實驗，兩家飲品分別推出類似嘅蓋印優惠，A飲品店買嘢飲會送一張蓋咗一個印嘅卡，只要買多五杯共六個印就送一杯；B飲品店只係俾卡俾客人，下一次開始先有得儲印花，儲夠五個同樣送一杯飲品。實驗證明同樣消費多五次，A飲品店嘅客人比較容易儲夠六個印，因為可以培養消費習慣，以及不想「怕蝕底」放棄手上那個蓋印，但變相要消費多五次，正正墮入商人「圈套」了。 ‧好多消費者唔想放棄少部份著數，但要花更多錢先有價值未必咁大嘅回報，所以必需要思考清楚。 除咗怕蝕底之外，另一樣就係改變現狀。好多時消費者習慣某種模式，若貿然要改變模式，就算新嘅模式喺用戶體驗上比較出色，消費者「轉軑」嘅意慾都會比較低，因為金錢成本以及適應新模式嘅時間成本都會比較高。情況就好似轉工一樣，長時間留喺一間公司都唔會想放棄準時出糧、唔會俾人炒嘅環境，所以轉工嘅意慾都會低啲。而喺商業角度嚟講，例如相機用家好多時都只會購買同牌子唔同型號，因為已經有一種使用慣性，就算其他牌子出新機，用家轉會嘅機會都好低。若想增加消費，可以推出該牌子相機周邊配件，咁樣佢地就會更有意慾消費。 ‧消費者下決定時，可根據自己實際需要和使用習慣，再決定是否購買。 不過作為消費者，有冇辦法減低稟賦效應造成各樣無謂消費呢？編者建議可以完全擺脫該產品或消費模式，以上面提過的飲品店為例，若一段時間都不光顧，感受一下自己對該產品的需求是否如預期一樣高企。或者如文章開頭所講換到隻平底鑊，不妨問下人覺得值幾錢，再計算一下你嘅付出是否成正比，咁樣就可以減少唔理性嘅消費行為啦。