好多插畫家鍾意喺社交平台開Page分享作品，同時亦希望向大眾傳遞唔同訊息。乍看本地插畫家彌歌魚筆下人物圓潤大眼、俏皮可愛，如同日本少女漫畫般，卻從中展現社會唔同面貌，有對體制反抗；也不乏描述兩性關係之間平衡等等。佢希望透過每一筆，可以從討論漫畫延伸到表達內心感受，再昇華到希望對社會重要議題引起討論。 用畫筆為不同議題發聲 一般人覺得插畫是一種藝術，但自細鍾意畫畫嘅彌歌魚，認為插畫本身具有溝通和表達作用，所以喺中學時開始將自己感受結合畫作。「初時喺電視睇到一啲新聞，有感受想講，但又唔知點樣用言語講，咁不試下用畫畫方式直接表達出嚟。估唔到反應唔錯，而且大家會好理性討論，俾到一個渠道大家抒發，幫到自己又幫到人，絕對唔係單純用錢或者Like數滿足到。」 彌歌魚指畫插畫都係自己興趣，所以都唔會迫得太緊。「一星期大概作畫三至四次，每次2至4個鐘。如果有動畫要做，一日有36小時都唔夠！」佢嘅筆下題材多樣化，包括情緒、校園欺凌、性別平權和勵志等等，希望大家可以多啲關愛身邊嘅人。「曾經有一幅畫係講學生自殺潮，指岀教育系統及情緒嘅問題，看到唔少讀者關心同討論內容，從中獲得很大的支持和鼓勵。」 ● 在彌歌魚作品之下，不乏各種社會議題，佢覺得係一種使命感，希望大家關注。 ● 彌歌魚作品有時會係小動物嘅溫馨故事、搞笑圖文，也有連載漫畫故事。 「我只係做緊正確嘅事」 圖文創作嘅另一個特色，就是以政治時事梗引起廣泛迴響。彌歌魚從無畏懼大膽表態，勇於批判社會，也表明自己政治立場。「有時對某啲社會議題甚至政治立場，如果專頁有一定支持者，反而會多咗一種責任感同抱負，唔係要迫大家表明立場，但至少要俾人知道呢個社會發生緊咩事。」不過宣示政見後，彌歌魚坦言有唔少追隨專頁嘅粉絲Unlike，或者有人覺得唔應該喺呢度講政治，佢就好平淡而堅定地接受。「其實Facebook點都會有人Unlike，Instagram相對會好啲，但始終初初讀者唔係因為香港時事而follow我，未必個個都想睇。」尊重大家，本身就係創作者甚至大眾最應該有嘅品德。 不過，原來表態對自己插畫前途有影響，呢點讓彌歌魚覺得好意外。之前整過一個紙娃娃公仔機，可以俾大家製作自己想要嘅髮型、道具、背景，曾經網上好受歡迎，但自從表態之後不久就被下架。「雖然的確係好影響到我，話唔開心都一定係假，不過我覺得值得。」 ●彌歌魚曾在今年推出紙娃娃公仔機廣受歡迎，惜最終因政治因素被下架。 你所關心的，就是靈感來源 彌歌魚表示任何題材，只要自己想畫，或者大家又有興趣去探討嘅，都會喺佢部Ipad Pro嘅Procreate出現。「我會出多啲街睇多啲新聞，了解一下社會同身邊嘅人發生咩事。」佢希望自己可以繼續畫出唔同主題作品，同大家一同成長。「雖然內容同訊息都會一直變動，但鍾意畫畫嘅心情會一直持續，我發覺自己愈畫愈鍾意！」 ●彌歌魚現時仍為大學生，上年同朋友開左動畫媒體公司「甜椒工房」，身兼導演同動畫師，笑言「36個鐘都唔夠！」  

嚟到年尾諗緊去邊度玩，不如去西班牙睇返場藝術展？乜玩到咁大啊！小編都知大家冇錢冇假，不過唔緊要，早前馬德里三大博物館之一嘅提森博內米薩國立博物館，聯同高迪所設計嘅世界遺產巴特羅之家，嚟到將軍澳MCP新都城中心舉辦『冬日「影」畫館』，亦係佢地首個海外展覽。呢次展出嘅名畫結合VR、AR技術，增加趣味同互動，一家大細嚟睇都唔會覺得悶！ ‧由今日開始到出年1月5日，可以去到MCP新都城中心，用VR/AR欣賞名畫。 難得嚟到又點可以唔打卡？一入去位於二期嘅『冬日「影」畫館』，就會見到一條光影時空隧道俾大家盡情打卡；入到主場館就分開VR同AR區，只要喺VR區帶上眼鏡，就可以置身梵高的《奧維的風光》及另外兩幅名畫裡面，以360度角度欣賞好多不為人知嘅細節，連策展人Juan Ángel López都好鍾意。另一邊AR區就更加特別，透過手機App影住八幅畫，就可以體驗額外嘅動畫元素，話唔定俾大家有更多啟發！去到另一間房仲會透過3D光雕投射廿幾幅名畫，最特別係可以利用雙腳喺地下自行創造影像，話唔定會成為下一個著名藝術家！ ‧用VR睇梵高嘅《奧維的風光》，連策展人都大呼過癮！ ‧入場前可以先下載商場嘅App，就可以用睇到名畫配合AR嘅效果。 ‧觀眾可以用雙腳喺地面改變花紋形態，等緊下一個藝術家誕生！ 喺商場另一邊仲有西班牙建築鬼才高迪改造嘅巴特羅之家珍貴展品，以及打卡一流嘅馬賽克玻璃屋，仲有可以落手玩嘅馬賽克藝術牆。出發前諗定想砌啲咩字，早啲嚟到整返幅自己嘅牆啦！問到策展人Juan Ángel同Encarna，佢地都對呢次海外展覽好有信心，Juan Ángel認為除咗亞洲市場龐大之外，亦可以令「藝術鑑賞」變得貼地。「以往藝術館都係文化、專業觀眾為主，但喺大型商場搞就可以直接面向大眾。不過喺形式上就要增加互動同趣味，唔駛齋睇就唔會咁悶。」 佢地兩位都認為VR同AR技術將會廣泛應用喺各地展覽，Encarna認為利用科技可以減企搬運風險，成本同時間都可以大大減少。另外多利用科技亦對商業運作有幫助。「其實係連帶關係，多咗展覽對科技需求都會增加，甚至有觀眾體驗VR/AR之後，會飛到當地睇實體展品，對旅遊都係有幫助。我相信跨界合作，將會成為未來藝術界嘅重要方向。」 ‧Juan Ángel同Encarna都認為VR/AR將會成為藝術界發展趨勢。 『冬日「影」畫館』 日期: 2019年11月13日至2020年1月5日 時間及地點: 12nn - 9pm 『冬日「影」畫館』期間限定店 日期: 2019年11月13日至2020年1月5日 時間: 11am - 9pm 地點: MCP CENTRAL...