24.4 C
Hong Kong

Related tags

Latest

Latest

Latest

More From Hit Consultant Media

【多舊魚專營的士】起錶36蚊 想制衡Uber定普通的士?

香港的士司機有「十大罪狀」,拒載﹑兜路﹑黑面﹑叫乘客帶路﹑揀客同目的地等等,大家都怨聲載道,唔少人寧願搭Uber,又方便服務又好,美中不足在於冇保障。香港大學民意研究計劃發現有84%受訪者對Uber服務感滿意,而對的士服務感滿意嘅就得43%。 市場現況係咁,近日政府就提出想搞個專營的士,主要客路係消費力較高嘅乘客。個計劃唔止制衡Uber,仲嚇到班普通的士司機,引起傳統的士車行嘅一致反對。   政府想以試驗計劃形式批出三個專營權,引入合共六百架專營的士,收費貴過普通的士約五成,即起錶價大概36元。車身顏色建議劃一規定,可以定為黑色,但營辦商可以以合適嘅方式,加番公司標記。政府會在專營權條款清晰訂明服務標準和水平。如果營辦商未能達到,政府可對營辦商施加罰則,甚至撤銷專營權。 第一個疑問係:本來畀的士錢就包埋司機服務,最應該係培訓好本身班普通的士司機,政府搞多舊嘢係「斬腳趾避沙蟲」,仲夠膽死收貴啲。我係普通的士司機會大條道理諗:扯!我服務好又無多啲錢收,繼續黑你面先。 另外,專營的士服務好啲都咁話,正常嚟講,咁貴搵鬼搭咩?又唔係有錢冇埞使。消費力較高人士都有自己車,唔會下下靠專營的士。   再睇落去,為咗行車安全同改善車輛外觀,限定專營的士車齡同專營權最高五年。另外,營辦商最少五成車輛可供輪椅上落,營辦商亦必須要提供召喚服務嘅手機應用程式。專營權不可轉讓同不能續期,屆滿後營辦商必須重新競投。 第二個疑問出嚟喇:嘩,咁嘅條件營辦商都難搞,啲車用五年就唔用得,又分分鐘投資完政府收番專營權,隨時虧本,專營的士有冇人入場搞呢? 而手機應用程式呢樣嘢同Uber嘅概念咁相似,專營的士似係合法化同貴價版嘅Uber。咁又見到政府喺到逃避:當世界其他地區都制訂針對網絡call車服務嘅規管機制時,香港面對Uber呢啲創新科技嘅時候就採取迴避政策,由得個灰色地帶存在,唔發牌又唔理保險問題。   業界人士就認為,計劃撼動咗傳統的士行業嘅營運模式,令擁有的士牌照嘅車行同車主憂慮專營的士會搶走普通的士嘅乘客,造成司機收入下降,面臨減車租壓力,引致牌價下跌。「忠誠」的士車行助理董事鄭敏怡指:「政府淨係話我哋做得唔好,即時性地唾棄業界,推出而家嘅『優質的士專營權』計劃。係政府嚟同我哋爭﹑衝擊我哋。」   資料來源:綜合報導

ADVERTISMENT