31.5 C
Hong Kong
- Advertisement -spot_img

TAG

自願醫保

【自己揞荷包? 扣稅得$40?】自願醫保4大注意位 投保前諗一諗

4月1日係自願醫保全面推行嘅日子。自願醫保由政府監管,又保到100歲,聽落實無死。但以下4樣嘢係你必須留意嘅。轉唔轉保?自願醫保包啲咩?抵唔抵玩?你有幾認識「自願醫保」?買自願醫保前要「停一停、諗一諗」。 患病紀錄 首先喺自願醫保入面,保險公司仍然可以拒絕承保高風險人士,高風險人士未能保證受保。如果受保人本身有病歷,再去買自願醫保,都係需要經過正常嘅核保程序,結果可能係不受保﹑要加附加保費或不保事項先受保。 另外要特別留意,就算轉投自願醫保,受保人都可能要重新核保。如果受保人曾經患上嚴重疾病,自願醫保都未必肯保障原有疾病。相反,如果係受保期間確診,同一份保單會繼續承保該症。係呢種情況下,受保人轉自願醫保,重新「核保」就唔抵玩。 不過,轉新保單唔一定要核保。自願醫保計劃列明,市民喺登記參與自願醫保後,保險公司須提供一次機會畀現有投保人選擇將現有保單轉移至認可產品。若果投保人將現有保單轉移至同一公司嘅自願醫保產品,就有可能唔需要重新核保。   扣稅優惠 自願醫保其中一個吸引之處,係有得扣稅,每名受保人會有8,000蚊扣稅額。但扣稅同退稅好唔同,實際可以慳嘅稅款係「以 $8,000為上限 x 邊際稅率」。對於只需要按 2%稅率繳付稅款嘅低收入人士,買價值2,000蚊嘅自願醫保保單,所得稅務扣減金額可能得40蚊。 不過,申請稅務扣減嘅受養人數不設上限,唔止可以幫自己嘅醫保保費扣稅,仲可以幫自己配偶﹑子女﹑父母等嘅醫保保費扣稅,實際慳到嘅稅款又多咗。   醫療保障額 「標準計劃夠唔夠做」都係另一個我哋要諗嘅地方。自願醫保嘅「標準計劃」保額可能太低,我哋要比較埋「靈活計劃」下嘅醫保產品。 「標準計劃」不設「額外醫療保障」,遇到重大疾病或手術,使費突咗,投保人就要自己另外揞荷包。根據官方資料,標準計劃承保項目只得好基本嘅保障額,保額有機會唔夠畀晒全部費用。以白內障手術為例,手術屬於「中型手術」,一般私院或私家診所收費介乎20,000至40,000蚊,但標準計劃下嘅保單賠償限額只有12,000蚊,剩低款項要自己畀埋。   「未知的已有病症」 自願醫保另一個賣點係承保「未知的已有病症」,只要患上嘅疾病病徵屬於「不察覺亦理應不察覺」,無論係機能退化定先天性疾病,就算患病時間發生喺簽保單﹑購買自願醫保前,亦可獲賠償。傳統醫保計劃,則係投保前未知嘅已存在疾病唔會獲任何賠償。不過「不察覺亦理應不察覺」該如何詮釋?難以確切定義病徵係咪「理應不察覺」,claim錢時或會引起爭拗。 而且要留意番,確診患病嘅第一年不獲賠償,之後償款逐年遞增,投保4年後先可以獲100%全面保障。   資料來源:政府﹑mythfocus

Latest news

- Advertisement -spot_img