《復仇者聯盟4：終局之戰》（Avengers：Endgame）上映一日就打破香港史上開畫票房紀錄，截至琴日夜晚9點，票房已超過1,861萬元。連無追開Marvel電影嘅朋友都會討論一兩句，甚至為咗跟上潮流，追番未睇過嘅英雄電影。究竟點解Marvel超級英雄系列咁成功？以下為你揭曉。   英雄交纏的宏大宇宙觀 如果提起電影產業中嘅宇宙觀，相信大家會第一時間諗起Marvel嘅超級英雄系列。宇宙觀係Marvel成功嘅第一個要素。 Marvel由2008年嘅《鐵甲奇俠》開始，到最近嘅《復仇者聯盟4》，11年間總共出咗23套英雄電影，當中有超級英雄個人獨立電影；亦有一次過集合眾多人物，滿足觀眾「越多越抵」心理嘅Avengers系列。 幾乎每一部Marvel作品間都有關連，涵蓋好一段時間，各人物故事間嘅銜接息息相關。影迷不時探討Marvel嘅正確時間軸，再討論作品同角色間嘅關係。牽涉人物越嚟越多，Marvel宇宙亦日漸擴闊，Marvel塑造出一個觀眾會墜入去嘅超級英雄世界。   英雄與觀眾之間零距離 Marvel每年推出2至3套電影，一直保持話題度和新鮮感，令觀眾想一直追落去。例如2016年有《奇異博士》同《美國隊長 3：英雄內戰》；2017年有《雷神奇俠3：諸神黃昏》﹑《銀河守護隊 2》﹑《蜘蛛俠：強勢回歸》。 每個超級英雄平均有一至兩套獨立電影，核心英雄如美國隊長更有足足3套，足以令每個英雄都有血有肉，顯示佢哋個性係點：美國隊長謹慎﹑古板；鐵甲俠就玩世不恭﹑個性自卑而外象自傲。 觀眾有足夠時間了解角色嘅故事和成為英雄嘅動機，對每個英雄暸如指掌。即使觀眾唔係漫畫迷，都唔會對英雄感到生疏。如此一來，每個超級英雄建立起個人品牌，有佢哋各自嘅fans同目標客群。   彩蛋增添趣味 Marvel人物經過長時間嘅打造，觀眾大多對每個角色嘅存在價值﹑地位同彼此關係有一定了解。超級英雄係主角定配角，個別存在定一齊打鬥都唔奇怪。 英雄之間其實起互相支援嘅作用，片尾嘅彩蛋為每部電影增添趣味，更深係建立角色之間嘅關係，不同角色係《復仇者聯盟》碰面時，先唔會咁突兀。 同時彩蛋引起討論，一環扣一環，前一部戲會透露後一部戲嘅內容，增加戲迷「追戲」嘅欲望。好似《奇異博士》片尾彩蛋出現雷神飲啤酒情節，其實係為2017年尾上映嘅《雷神奇俠3：諸神黃昏》鋪路。 而《復仇者聯盟》系列可謂係Marvel最核心嘅產品。佢係票房保證，係市場上競爭力十足，串聯起所有超級英雄，畀佢哋聚首一堂，人氣想唔高都難。