有人話香港人特別鐘意打邊爐，鍾意嘅程度，甚至要喺Facebook開group分享。無非一大班人夠曬熱鬧，鍾意食乜都可以放落去，難怪火鍋店開到成行成市，作為顧客揀間好食又有格調嘅都唔易。不過在酒吧林立的蘭桂芳，居然有一間用青樓做主題嘅港式fusion火鍋店，以古時中國著名的「怡紅院」做包裝，不過女士們唔駛擔心，老闆之一嘅Kason就話唔會尷尬，歡迎全部朋友一齊嚟「滾」。唔好以為「怡紅院」裝修古色古香得個樣，佢地嘅菜式仲大玩crossover，即刻睇睇呢間怡紅院點樣令一眾客官樂而忘返啦！
完美還原怡紅院場景 裝潢餐牌通通玩一餐
老闆Kason與拍檔同好多香港人一樣，成日都打邊爐，由此萌生開火鍋店念頭。不過而家火鍋店要吸引食客，一定要玩味夠重，所以特意命名為「怡紅院」，就算客人唔知餐廳有咩食，聽個名都已經引起興趣。「我同拍檔都鍾意睇戲，成日都聽到怡紅院呢個名，不如試下將兩者結合，令到大家嚟到真係會玩得開心。」火鍋店開宗明義以古代青樓為主題，兩層從外到內的裝潢都加入大量中式設計元素，務求還原「怡紅院」經典場景，當中又不乏現代搞笑元素，例如仿安全套包裝濕紙巾，不過最令Kason自豪嘅係餐牌設計。「除咗餐牌改為『賣身契』，我地喺Drink list設計上大膽少少，加咗插圖偏成人向，不過放心全部睇完都唔會覺得尷尬，純粹想玩味多啲，娛樂吓大家。」唔好以為火鍋店只係賣裝修比客人打卡，其實Kason更注重食物質素，唔單止有成十多款湯底任均選擇，亦提供特色小食，例如黃金炸魚皮同涼伴萵筍絲，切合港人口味，所以有好多捧場客。
●怡紅院特色小食之一「遍地黃金炸魚皮」。
●可以坐四、五位官人的包廂除參考涼亭設計，更別緻地提上富有玩味名字，包括「撚雀園」、「吹蕭亭」跟「含春角」，鬼馬得來又有意境。
●從店內裝潢到餐牌設計構思都是出自老闆手筆，大玩趣味創意。
疫情下轉攻外賣、場地出租
無奈2020及2021年受疫情影響，Kason指整體營業額下跌近8成，在晚市禁堂食措施之下，佢地推出午市火鍋，以及提供午市堂食及外賣價惠。Kason坦言外賣業務只能夠有限地幫補到整體營業額，但在細節處理上如在外賣包裝絕不馬虎了事。「我地著重packing，包到整整齊齊，又會預先處理好全部食物，所以客人只需要準備爐頭同煲，加熱滾起之後就食得。」目前除咗唔同外賣平台外，「怡紅院」仲有自家外賣送貨火鍋服務，方便客人直接落單。不過餐廳環境咁搶眼咁有特色，基本上每個角落都可以影相，以往吸引唔少明星、網紅幫襯之餘，亦會影相放上社交平台，多咗一個宣傳功能。所以除咗疫情期間轉攻外賣之外，Kason亦將場地出租，善用最大優勢，俾客人或公司企業可以包場舉辦活動。
●疫情期間轉攻外賣之外，Kason亦將場地出租，善用最大優勢，讓客人或公司企業可以包場舉辦活動。
逆境下的領悟
計劃往往趕唔上變化，一場突如其來嘅疫情影響餐廳生意，但就令Kason有更多經營及管理方面嘅體會。成功之道好簡單，就係親力親為，堅守食物質素。「真係事事都要親力親為跟到足，仲要不停上網做research，搵吓邊度有平靚正貨源。只有知道全部支出，先可以喺成本方面控制得好。」經營有成嘅另一個秘訣係「用心，將心比己」，員工對Kason嚟講就係最重要資產。佢覺得做管理層最緊要係將心比己，對待員工就似對家人一樣，員工先會有歸屬感，流失率都會比較低。工作氛圍快樂，員工自然就有「向心力」願意為公司打拼，唔單止令餐廳經營蒸蒸日上，更可以將歡樂氣氛帶比客人，相輔相成。
●Kason建議初次創業的話，事事都需要親力親為，做好把關，對控制成本非常有用。