無論大人細路，相信都好難抵抗零食誘惑。零食市場雖然龐大，但要如何在激烈競爭中突圍而出？從事零食代理及批發的僑豐行，至今已經營超過半世紀。作為家族第二代的現任行政總裁Ellis（黃偉鴻博士）深明不變通便難以競爭，除了持續發展代理及批發零食，亦花費很多心血建立自家品牌。近年更積極開展本地門市零售業務，生意額已達億元規模！到底這個零食王國是如何成功逆市突圍？
痛失代理權改推自家品牌
僑豐行前身是士多，由Ellis的父親在1965年創立，後來涉足零食代理及批發，不過做代理商需要承受不少風險。「做代理就要有俾人搶咗及收番品牌代理權嘅風險。之前試過做緊某個品牌代理，突然轉咗畀第二個，花嘅心血咁就咁冇咗，又要重新搵其他產品代替，再部署過，真係好冇安全感。」代理隨時被人搶生意，不太保障，惟自家品牌別人搶不走。於是Ellis決心投放更多精力建立自家品牌上，最為人熟知就是EDO Pack。近年親手原創則有巨浪大切、Dessert Duet甜品二重奏等自家零食品牌。
● Ellis認為公司要發展不能墨守成規，除了持續代理產品外，還創立EDO Pack、巨浪大切及Dessert Duet等自家零食品牌。
● 僑豐行旗下連鎖零食店「アメ橫丁」在香港共有數十間分店。
入貨要夠快夠潮
在香港好容易就買到各地零食，不過港人始終最鐘情日本零食。由EDO、巨浪大切到2011年起開設的連鎖零食門市「アメ橫丁」，Ellis旗下品牌名稱都很「日本化」。他解釋：「日本零食質量好，同埋口味種類選擇又多，所以日本化名稱對消費者黎講有一定吸引力。」
零食和潮流一樣，一定要不斷求新、捉摸口味和靈感，產品才能延續下去。年輕人是零食市場主要消費群，對零食口味及喜好變化非常快速。「門市每個月都會推出新款零食，保持新鮮感。」Ellis表示捕捉商機方法，關鍵是時機，除了依靠廠家提供資訊，亦要留意社交網絡消息。「後生仔女都鍾意貪新鮮試新野，今日食完呢樣，聽日就會轉下試其他新口味。例如之前蜜糖牛油薯片在網絡爆紅，俾人搶到冇晒貨。但熱潮嚟得快去得快，慢一步就會冇咗商機。」
● 「アメ橫丁」主打日韓品牌零食，除了針對市場潮外，還要「夠快夠準」捉緊商機。
開門市「試水溫」
為了緊貼市場走勢，Ellis經常到各地取經。雖然了解到市場概況，但就未能得到準確數據。因此Ellis認為開設門市直接接觸消費者，對收集意見非常有用，更可進一步加強消費者印象，提升銷售及歡迎度。「門市除咗作為一個銷售點外，仲可以成為監察點，收集客人對唔同零食喜好變化，幫助發展自家品牌零食。我地曾推出包裝薯片測試市場反應，發現競爭太大，轉以筒裝出售，銷路更佳。」提到產品設計，Ellis與開發團隊都會針對客戶群，用足心思考慮：以顏色為例，紅色代表喜慶，會用於賀年食品上。年輕人喜歡單色為主，外國人則喜歡彩色；至於包裝方面，獨立包裝始終是市場主流。「香港天氣潮濕，獨立包裝容易存放，每次想食先逐包開，同埋就算拎出街都會方便好多。」
● 袋裝盒裝、顏色設計對零食價值高低有很大影響。
「アメ橫丁」分店多數位處鬧市，每天人流極多，但如何吸引顧客行入店內「幫襯」，Ellis直言一點都不容易，要制定多種策略刺激銷量。他認為首先要弄清楚產品定位。「我地希望用四個字就可以清楚表達訊息，例如『原裝行貨』、『最後今天』、『日本同步』等字眼。」其次就是價錢便宜和價值高。「消費者都係睇呢樣野抵唔抵食，價錢平又大盒，通常都會好吸引。」Ellis補充每當新分店開張，該店就會進行一天「大割引」，全場貨品低至半價。他們亦會不時轉換零食組合和優惠，由於是自家經銷，貨品售價也較其他地方便宜。
●巨浪大切薯片定價相比市面上其他同類產品便宜，所以不足4年，銷量勁升3倍，越出越多口味！
保持品牌延續性 建立鮮明形象
Ellis認為清晰的市場定位僅為建立品牌第一步，能否保持品牌延續性，才是成功關鍵所在。「我地一路經營，認證「八二定律」，即少數產品佔大部份公司生意額，所以我地都會強化已有品牌及產品。例如Dessert Duet甜品二重奏，一開始係栗子，宜家就發展到有埋啫喱杯、蛋糕、夾心餅、酸奶飲品等等唔同甜品。」
近年網上商店大行其道，但Ellis堅持以實體店做先導，務求減低經營失誤。「我地嘅產品希望帶俾人開心，加上香港買野太方便啦！大部份人情願親身去睇，親手去摸，咁樣更加有實在感，有助增加購買意欲。我地目前有不同網上銷售渠道，例如士多Zstore及HKTVmall，但主力都係實體門市。如果網上買包薯片，結果寄到黎係碎嘅，人地都會投訴點食啊？」展望未來，Ellis表示公司將不斷嘗試新路向。「我們在香港推出左一個Friemily品牌，它係結合朋友（friend）及家庭（family）元素嘅植物性健康食品，主打健康休閑；另一方面國內零食市場龐大，亦會考慮開拓中國零售門市。消費者購買頻率不斷增長，希望透過設立內地門市，令到公司零售平台能夠持續發展。」
●Ellis堅持實體店經營，原因是顧客在實體店的消費體驗與網購相差甚遠。
問到Ellis的人生觀，他認為不論做人抑或管理公司，都可以主張「3S思維結構」。「第一個『S』係Seed，指尋找問題；第二個『S』是Solution，搵到一個問題，至少要有一個解決方法；第三係Self-Criticism，就係自我反思 。如果我地抱住呢種態度，每一件事都可以持續反思，就會慢慢達至成功。」
3S思維結構：
1.SEED(尋找問題)
2.SOLUTION(解決方法)
3.SELF-CRITICISM(自我反思)