自由工作者（Self-employed / freelancer）指嘅係唔隸屬於任何組織或公司嘅人，靠腦力或勞動嚟提供服務嘅自僱人士。「你睇人好，人哋睇你好。」唔少人覺得Freelancer生活輕鬆，可以自己控制時間同工作內容，瞓到自然醒，唔駛點做同時又搵更多錢。呢啲發夢諗下好啦，做之前不如睇清Freelancer嘅真實生活同風險。
收入不穩定
做Freelancer朝不保夕，工作量未必穩定。冇年終假期、冇病假、冇公積金、冇獎金、每個月嘅人工按你工作量而定，多勞多得。有時遇着拖數公司，有時可能一個月都接唔到任何job，冇病冇痛都話咬緊牙關捱下，如果咁啱遇着啲咩，需要財務上嘅緩衝，就真係唔知點算。
權益欠保障
合約糾紛﹑被老闆壓榨同壓價係常有嘅事。周不時出現做完唔畀錢，追糧時又遇上「判上判」無從追數嘅情況。當然亦無辦法向銀行申請貸款，被人拖數時只可以向小額錢債審裁處提告，但效果通常唔算不理想。唔少人冇簽合約，做Freelance接近完全冇保障，香港冇集體談判權，又冇咩Freelancer工會，Freelancer處於不利處境。
另一方面係意外責任。市面少見以Freelancer為對象嘅保險，萬一自己或參與項目嘅人士發生意外，將難以獲得保障。諗下做Uber同Deliveroo嘅自僱人士，有咩事責任都係個司機到，僱主同企業將啲責任撇除晒。
Freelance工作求過於供
求職招聘平台HKESE創辦人Ming就指出，香港僱主比較保守，願意請freelance嘅職位唔多。而家該平台共有約一萬份工作，當中只有唔夠一成係自由工作，主要係設計、網站及程式開發、文案作者、翻譯等有關IT同文字嘅工。Ming認為香港僱主比較保守，傾向請長工為主。
自由中嘅「不自由」
做freelancer比返全職更需要嚴格自律。接咗job後，無論私底下花幾多時間都要準時交貨，佢哋背後嘅「艱辛」同「不自由」成日畀人忽視。Freelancer都有時間嘅限制，需要係固定時間內完成工作；仲可能隨時接新job，計劃成日跟唔上變化，時間要跟住工作而變動，分分鐘比全職時工作量仲大。
都市人成日話自己有拖延症，自律性對Freelancer嚟講非常重要。冇上司督促之下你可唔可以良好地自我管理時間，係冇office嘅情況下仍然保持專注工作嘅心？
但講咁多衰嘢，都係想你睇清Freelance嘅性質，再諗下當中嘅可行性。如果你有以下成為Freelancer嘅條件，去馬啦朋友：
- 搵到自己真正感興趣且能帶來收入嘅方向
- 喺某一領域有一定嘅技能﹑經驗同人脈積累
- 儲夠能維持你至少一年吃喝不愁嘅資金
- 心理建設：承擔失敗嘅心理成熟能力同自律性