27.6 C
Hong Kong
城中熱話【「安心偷食」贏家】 壹傳媒能否鋪好「收費訂閱制」之路?

【「安心偷食」贏家】 壹傳媒能否鋪好「收費訂閱制」之路?

「安心偷食」事件鬧到滿城風雨,最大贏家反而係壹傳媒。琴日(16日)爆完「安心偷食」事件,「蘋果」就錄得200萬人訂閱,人人登記做免費會員好跟貼成件事。呢個可以話係「蘋果」一個里程碑,為佢日後嘅收費訂閱制鋪路。
 
4月頭「蘋果日報」開始會員免費訂閱制,讀者要登記做訂戶,先可以免費睇「蘋果動新聞」同網上足本內容。呢一舉措,好明顯係為先儲好一批目標讀者,待下一步開展收費訂閱制。
 
傳統印刷報業衰落,呢個係不爭事實,而家仲有幾多人真係落街畀錢去買份報紙?以前媒體收入主要靠廣告,但而家喺報紙落廣告嘅廣告商越嚟越少,網上廣告嗰塊收入好多都唔入佢哋袋,反而被社交媒體食得七七八八,免費媒體單靠廣告難以生存。
自從網上世界興起,報業生態被徹底扭轉,人人都可以係記者,資訊周街都係,大家都唔覺得自己要為內容付費。「扯!你呢間要畀錢,唔睇你咪睇第二間囉。」而為咗迎合觀眾,唔少媒體都係內容農場同標題黨,大家都搏命追流量。搞深度內容嘅媒體,用嘅人力物力多,但流量往往唔及乜乜「偷食斷正」﹑「震驚七百萬人」,真係食力不討好。傳統媒體要諗點轉型,新媒體就諗點站穩陣腳。
 
回到「蘋果」,「蘋果」網上社交媒體係做得比較好,每日錄得超過4,500萬次點擊同200幾萬Facebook粉絲,但都係連年虧蝕。無論係廣告收費,定賣報紙嘅收入都不斷下降。睇番壹傳媒年報,「蘋果」印刷業務方面,17/18年度廣告收益較去年同期大跌 40.5%。「蘋果」已經唔可以靠廣告嚟營生,走向收費訂閱制都無可避免。

「蘋果」免費訂閱時,有唔少人嘈覺得「冇晒私隱」又嫌麻煩。而家「安心偷食」一出,大家咪又係即刻登記。八卦嘅心理大家都有,有時爆料推一推好過花唇舌解釋一餐。
但問題在於下一步:你會唔會畀錢睇「蘋果」?

理念上嚟睇,可以畀嚟支持下,畢竟真相唔係個個傳媒夠膽講,畀錢支持都係對抗霸權惡政﹑守護公義嘅一種方法。
內容上嚟睇,未必想畀。好似「安心偷食」咁嘅獨家震撼新聞唔係時時有,就算有,網絡咁流通,呢啲花邊新聞照樣可以喺其他媒體睇到,香港人不嬲好精。
「蘋果」係內容上一向行即時新聞﹑即食娛樂化短片「動新聞」嘅路線。比起報深度內容嘅《端傳媒》﹑《紐約日報》,你會想畀錢睇邊個多啲?會唔會覺得「蘋果」內容膚淺,份錢唔抵畀?
但「蘋果」只可以頂硬上,為咗唔食谷種,收費訂閱制係冇辦法中嘅辦法。

更多文章